သျှမ်းပြည် မြောက်ပိုင်း ကျောက်မဲမြို့နယ်တွင် နေရပ်မပြန်နိုင်သေးသည့် စစ်ဘေးရှောင် ပြည်သူ (၇၀၀)ကျော် ကျန်ရှိနေပြီး၊ နေရပ် ပြန်နိုင်ဖို့အတွက် မျှော်လင့်နေကြကြောင်း စုံစမ်း သိရှိရသည်။
ထိုစစ်ဘေးရှောင်များသည် ပြီးခဲ့သည့် ၂၀၂၁ ခုနှစ် နှစ်ကုန်ပိုင်းကတည်းက တိုင်းရင်းသားလက်နက်ကိုင်တပ်များ ဖြစ်သည့် မြောက်ပိုင်းမဟာမိတ်တပ်ပေါင်းစုနှင့် RCSS/SSA တို့အကြား တိုက်ပွဲဖြစ်ပွားမှုကြောင့် ထွက်ပြေးတိမ်းရှောင်ခဲ့ကြ သူများ ဖြစ်ကြောင်း သိရသည်။
“သူတို့တွေက အရမ်းကို ပြန်ချင်နေပြီ၊ ပြန်သွားရင် လုံခြုံမှုရှိဖို့ နယ်မြေထိန်းချုပ်ထားတဲ့ လက်နက်ကိုင်အဖွဲ့နဲ့ ဆွေးနွေးတာတွေ လုပ်ထားတယ်၊ ပြီးခဲ့တဲ့ တစ်ပတ်လောက်က ဆွေးနွေးကြတာ။ လက်နက်ကိုင် အဖွဲ့တွေလည်း စစ်ရှောင်တွေ နေရပ်ပြန်ဖို့ ကူညီပေးမယ်လို့ ပြောထားတယ်။ ဆိုတော့ မကြာခင် ပြန်ရမယ်လို့တော့ မျှော်လင့်တာပဲ” ဟု ကျောက်မဲ သျှမ်းစာပေနှင့် ယဉ်ကျေးမှုအသင်း ဥက္ကဌ လုံးလျန်းဟန် က သျှမ်းသံတော်ဆင့်ကို ပြောသည်။
စစ်ရှောင်ထွက်ပြေးခဲ့ရသည့် ပြည်သူများသည် ၄င်းတို့နေရပ်တွင် တောင်ယာ စိုက်ပျိုးရေးလုပ်ငန်းနှင့် လက်ဖက်လုပ်ငန်းကို အဓိက လုပ်ကိုင်ပြီး အသက်မွေဝမ်းကျောင်းပြုနေရသည့် ပြည်သူများ ဖြစ်သည်။
ထို့ကြောင့် ရွှေဖီ လက်ဖက်ခူးရာသီ (ယခုလအတွင်း) ရောက်ရှိတော့မည် ဖြစ်သည့်အတွက် နေရပ်သို့ စောစောပြန်ရဖို့ မျှော်လင့်နေကြတာဖြစ်ကြောင်း စစ်ရှောင်များထံမှ သိရသည်။
“စောစောပြန်ရရင် ပိုကောင်းတာပေါ့၊ ဘာလို့ဆို ရွှေဖီလက်ဖက်ချိန် အမှီ ပြန်ရောက်မှ အလုပ်ရှိမှာလေ၊ နောက်ကျရင်တော့ ဘာအလုပ်မှ မရှိတော့ဘူး၊ နေထိုင်စားသောက်ဖို့ အခက်ခဲ ဖြစ်နိုင်တယ်” ဟု စစ်ရှောင် သက်ကြီး အမျိုးသား တစ်ဦးက ပြောသည်။
ကျောက်မဲ စစ်ရှောင်များထဲတွင် ကိုဗစ် ကူးစက်ခံရသူနှင့် ကျန်းမာရေး ကုသစရိတ်အတွက် ငွေကြေးခက်ခဲနေသူများလည်း ရှိနေကြောင်း စစ်ရှောင်ကူညီသူများထံမှ သိရသည်။
ထိုစစ်ဘေးရှောင်များသည် ကျောက်မဲမြို့နယ် ဟူးစွန်၊ တွန်ဟိတ်၊ နမ်းဆိုင်း၊ ခြုံးသစ်၊ ခြုံးဟောင်း၊ နားလင့်၊ ပန်ကွမ်၊ ဟိန်းဝိုးနှင့် အခြားကျေးရွာများမှ ဒေသခံများ ဖြစ်ပြီး စစ်ရှောင်စခန်း၊ ဘုန်းကြီးကျောင်း၊ ဓမ္မာရုံ၊ သျှမ်းစာပေယဥ်ကျေးမှုမြေနေရာနှင့် အခြား ဆွေမျိုးအိမ်များတွင် ခိုလှုံနေကြရကြောင်း သိရသည်။
Leave a Comments