သျှမ်းပြည် တောင်ပိုင်း ရပ်စောက်မြို့နယ် နောင်ဝိုး ကျေးရွာအနီးတွင် ယမန်နေ့ (ဖေဖော်ဝါရီ ၂၈)ရက် မနက် ၁၀ ခွဲဝန်းကျင်က ဆိုင်ကယ်စျေးသည် အမျိုးသားတစ်ဦး မိုင်းနင်းမိကာ ဒဏ်ရာရရှိခဲ့ကြောင်း သတင်းသိရသည်။
ထိုစျေးသည် အမျိုးသားသည် ရပ်စောက်မြို့နယ် နောင်ဝိုးကျေးရွာမှ ကုန်းသာရွာတို့ သွားသည့်လမ်းပေါ် နောင်ဝိုးကြိုးတံတားအနီးတွင် ဆိုင်ကယ်ဖြင့် မိုင်းနင်းမိပြီး ပြင်းထန်ဒဏ်ရာ ရရှိခဲ့တာဖြစ်ကြောင်း သိရသည်။
“ဖြစ်တာက နောင်ဝိုးကြိုးတံတားအနီးမှာပါ။ ဘယ်ဘက် ခြေထောက် အနောက်ပိုင်းက အကုန်ပါသွားတယ်။ အောက်ပိုင်းက တော်တော်ဆိုးတယ်။ ဖနောင့်ဆိုရင် မရှိတော့ဘူး” ဟု နမ့်လန် လူငယ် ပရဟိတအဖွဲ့ ဥက္ကဌ ကိုဇော်ဇော်ဦး က သျှမ်းသံတော်ဆင့်ကို ပြောသည်။
မိုင်းနင်းမိသည့် စျေးသည် အမျိုးသားသည် အသက် (၄၁)နှစ် အရွယ်ရှိပြီး သီပေါမြို့ တောင်မြို့ရပ်ကွက်တွင် နေထိုင်သူဖြစ်ကာ သျှမ်းတောင် – သျှမ်းမြောက် အစပ်ဒေသဖြစ်သည့် ရပ်စောက်မြို့နယ် နောင်ဝိုးကျေးရွာ ဘက်သို့ ဆိုင်ကယ်ဖြင့် စျေးသွားရောင်းသူဖြစ်သည်။
သျှမ်းမြောက် သီပေါမြို့နှင့် သျှမ်းတောင် ရပ်စောက်မြို့နယ် နောင်ဝိုးကျေးရွာထိ ကားဖြင့် နာရီ ၃ နာရီခန့် မောင်းနှင်ရကြောင်း သိရသည်။
ထိုစျေးသည် မိုင်းနင်းမိသည့်နေရာသည် ပြီးခဲ့သည့် ဖေဖော်ဝါရီလ အစောပိုင်းတွင် တိုင်းရင်းသားလက်နက်ကိုင်အချင်းချင်းကြား တိုက်ပွဲဖြစ်ပွားဖူးသည့် နေရာဖြစ်ပြီး၊ ကန့်သတ် နယ်မြေအဖြစ် သတ်မှတ်ထားပြီး ထိုလမ်းကို မသွားရန် တားမြစ်ထားမှုလည်း ရှိနေကြောင်း သွားရောက်ကူညီသူများက ပြောသည်။
“အဲ့လမ်းက တိုက်ပွဲတွေ ဖြစ်ထားဖူးလို့ မသွားဖို့ တားမြစ်ထားတဲ့လမ်းပါ။ သူက ဖြတ်လမ်းအနေနဲ့ သွားတာ။ အဲ့လမ်းကို မသွားဖို့ သူများတွေ ပြောသေးတယ်တဲ့။ သူက ဆိုင်ကယ် စျေးသည်ဆိုတော့ ဖြတ်သွားတာ။ ဆိုင်ကယ်နဲ့ မိုင်းနင်းမိသွားတာပဲ” ဟု နမ့်လန်ဒေသမှ လူငယ် အမျိုးသားတစ်ဦးက ပြောသည်။
လက်ရှိတွင် မိုင်းနင်းမိသည့် အမျိုးသားကို နောင်ဝိုး ပရဟိတနှင့် နမ့်လန်ပရဟိတ အဖွဲ့တို့ က ညစ်စဉ်ရွာတွင် ကားချိန်းပြီး လားရှိုးဆေးရုံကို ပို့ထားကြောင်း၊ ခြေထောက် ဖြတ်ရမည့် အနေအထားရှိကြောင်းလည်း သိရသည်။
ပြည်သူများ မိုင်းအန္တရာယ် ကင်းဝေးနိုင်စေဖို့ သက်ဆိုင်ရာ လက်နက်ကိုင်တပ်ဖွဲ့များအနေဖြင့် မိမိထောင်ထားသည့်မိုင်းများကို ပြန်ဖြုတ်ပေးသင့်ကြောင်း နမ့်လန်လူငယ်တစ်ဦးက တောင်းဆိုထားသည်။
“ပြီးတော့ မိုင်းကို လူသွားလမ်းတွေမှာ မထောင်သင့်ဘူး။ ဒီလို မိုင်းတွေထောင်ထားတော့ စျေးသည်တွေ မဟုတ်လည်း ဒေသခံတွေ တစ်ယောက်မဟုတ် တစ်ယောက်က ထိမိမှာပဲ။ သက်ဆိုင်တဲ့ တပ်ဖွဲ့တွေ ပြန်ပြီးဖြုတ်ပေးစေချင်တယ်” ဟု နမ့်လန်ဒေသခံမှ အသက် ၃၅နှစ် အရွယ်ရှိ လူငယ်အမျိုးသားတစ်ဦးက ပြောသည်။
ထို ရပ်စောက်မြို့နယ် ကျောက်ဂူတိုက်နယ် နောင်ဝိုး ကျေးရွာအနီးတွင် ပြီးခဲ့သည့် ဖေဖော်ဝါရီလ ၁၂ ရက်နေ့တွင်လည်း အမျိုးသမီး နှစ်ဦး မိုင်းနင်းမိ ဒဏ်ရာ ရရှိခဲ့ပြီး ယနေ့အချိန်ထိ ဆေးကုသမှု ခံယူနေရဆဲဖြစ်ကြောင်း သိရသည်။
