သျှမ်းပြည်တောင်ပိုင်း လဲချားမြို့နယ် ဝမ်ယိမ်းကျေးရွာအုပ်စုတွင် ဒေသခံ တချို့ စိုးရိမ်စိတ်ဖြင့် နေရပ်သို့ ပြန်လာနေပြီဖြစ်ကြောင်း စုံစမ်းသိရှိရသည်။
မြောက်ပိုင်းမဟာမိတ်တပ်ဖွဲ့ နှင့် RCSS တို့ စစ်ရေးတင်းမာသဖြင့် ဖေဖော်ဝါရီ (၁၉)ရက်တွင် လဲချားမြို့နယ် ဝမ်ယိမ်းကျေးရွာအုပ်စုမှ ဒေသခံ ပြည်သူများသည် တိုက်ပွဲဖြစ်ပွားမည်ကို စိုးရိမ်သဖြင့် ထွက်ပြေးတိမ်းရှောင်ခဲ့ ကြောင်း သိရှိရသည်။
“ပြန်လာတဲ့သူတွေတော့ရှိတယ်။ အကုန်တော့ မလာသေးဘူး။ ခုလက်ရှိ အခြေနေတော့ ဘာမှမဖြစ်ဘူး။ အခြေအနေကောင်းလို့ လာတယ်ဆိုတာလည်း မဟုတ်ဘူး။ အလုပ်ပြန်လာလုပ်ဖို့ရှိလို့ ပြန်လာတာ။ တိုက်ပွဲဖြစ်မှာကိုတော့ စိုးရိမ်တာပေါ့” ဟု နေရပ်သို့ ပြန်လာသည့် အမျိုးသမီးတစ်ဦးက ပြောသည်။
ဝမ်ယိမ်းကျေးရွာအုပ်စုအတွင်း မြောက်ပိုင်းမဟာမိတ်တို့ ရောက်ရှိလာသဖြင့် ဒေသခံများ တိုက်ပွဲဖြစ်ပွားမည်ကို စိုးရိမ်စိတ်ဖြင့် ပင်လုံမြို့ရှိ ဆွေမျိုး မိတ်ဆွေအိမ်များဆီသို့သော်လည်းကောင်း၊ အိမ်ငှားဖြင့်သော်လည်းကောင်း သွားရောက် တိမ်းရှောင်ခဲ့ကြသည်။
“အဓိက ကတော့ တိုက်ပွဲဖြစ်မှာကြောက်ရတာပေါ့နော်။ ခုက မြောက်ပိုင်းမဟာမိတ်တွေလည်း ရှိတယ်။ အာစီဘက်လည်း ရှိနေတယ်ဆိုတော့ ထိတွေ့မှုရှိရင် တိုက်ပွဲကတော့ ဖြစ်မှာပဲ။ လူကြီး နဲ့ ကလေးတွေတော့ မလာရဲသေးဘူး” ဟု ထွက်ပြေးတိမ်းရှောင်ရင်း နေရပ်သို့ ပြန်လာသူ အမျိုးသားတစ်ဦးက ပြောသည်။
လက်ရှိ မြောက်ပိုင်းမဟာမိတ်တပ်ပေါင်းစုတို့သည် ဝမ်ယိမ်းဘုန်းကြီးကျောင်းတွင် ရှိနေကြောင်း စုံစမ်းသိရှိရသည်။
မြောက်ပိုင်းမဟာမိတ် နှင့် RCSS တို့သည် မိုင်းကိုင်မြို့နယ်အတွင်းသို့ တိုက်ပွဲပြင်းထန်ခဲ့ပြီး ယခုရက်ပိုင်းတွင် လဲချားမြို့ နှင့် ပင်လုံမြို့ကြားရှိ ကျေးရွာတချို့သို့ စစ်မီးကူးစက်လာမည်ကို ဒေသခံများ စိုးရိမ်ခဲ့ကြသည်။
