မိုးကုတ်မြို့တွင် ယနေ့ (ဖေဖော်ဝါရီ ၂၅)ရက် မနက်အစောပိုင်းတွင် မီးလောင်မှု ဖြစ်ပွားခဲ့ပြီး သက်ကြီး အမျိုးသားတစ်ဦး သေဆုံးခဲ့ကြောင်း သတင်းသိရသည်။
ယနေ့ (ဖေဖော်ဝါရီ ၂၅)ရက် မနက် (၁)နာရီဝန်းကျင်တွင် မိုးကုတ်မြို့ အနောက်ပိုင်း ကသဲအုပ်စု ရန်ကြီးအောင်ရပ်ရှိ နေအိမ်တစ်လုံး မီးလောင်မှု ဖြစ်ပွားခဲ့ကြောင်း သိရသည်။
“ညက ၁ နာရီလောက်မှာ မီးလောင်တာ။ အဘိုးအိုတစ်ယောက် စိတ်ဝေဒနာသည်ပေါ့ သူတော့ မီးထဲ ပါသွားပါတယ်။ အချိန်မီ မကယ်လိုက်နိုင်ဘူး။ အသက်အရွယ်ကတော့ (၆၀)ကျော်လောက်တော့ ရှိမယ်။ မီးလောင်တာက တော်တော်ပြင်းတယ်။ တစ်နာရီလောက်ကို မီးငြိမ်းသတ်ရတာ” ဟု မိုးကုတ် ပါရမီ နာကူမှု အသင်းမှ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။
ထိုမီးလောင်ရာနေရာသို့ မိုးကုတ် အရံမီးသတ်တပ်ဖွဲ့၊ ပါရမီ လူမှုကူညီရေးအသင်း၊ ရပ်ကွက်နေ ပြည်သူများက (၁)နာရီဝန်းကျင်အကြာထိ မီးငြိမ်းသတ်ခဲ့ရကြောင်း သိရသည်။
မီးလောင်မှုကြောင့် ဆုံးရှုံးမှုတန်ဖိုးနှင့် မည်သည့်အကြောင်းကြောင့် မီးစတင်လောင်ကျွမ်းသည်ကိုတော့ မသိရသေးပေ။
မီးလောင်မှုကြောင့် နှစ်ထပ် ပျဉ်ထောင်အိမ် ပျက်စီးခဲ့ရပြီး အိမ်တွင်းနေ သက်ကြီး အဘိုးအိုတစ်ဦး မီးလောင်သေဆုံးခဲ့ကြောင်း သိရသည်။
ထိုမီးလောင်မှုသည် ယခု ၂၀၂၂ ခုနှစ်တွင် မိုးကုတ်မြို့နယ်အတွင်း ပထမဆုံး မီးလောင်မှုဖြစ်ကြောင်း သိရသည်။
