သျှမ်းပြည်နှင့် မန္တလေးနယ်စပ် မိုးကုတ်မြို့ရှိ ဂေါက်ကွင်းနေရာတွင် တအာင်း(ပလောင်) အမျိုးသားလွတ်မြောက်ရေးတပ်မတော် (TNLA) က ဒေသခံများကို ကျောက်တူးခွင့် လုပ်ကွက်ခွဲဝေ ချထားပေးနေကြောင်း သတင်းရရှိသည်။

မိုးကုတ်မြို့မှ မကြာခင် ဆုတ်ခွာမည်ဟု ကြေညာထားသည့် TNLA တပ်ဖွဲ့သည် နိုဝင်ဘာ လဆန်းပိုင်းမှ စပြီး ၎င်းတို့ထိန်းချုပ်စဉ် အကြီးအကျယ် ကျောက်တူးဖော်မှု ပြုလုပ်ခဲ့သည့် မိုးကုတ်ဂေါက်ကွင်းအတွင်း ဒေသခံများကို ကျောက်တူးခွင့်ပြုသည့် လုပ်ကွက်များ ခွဲဝေ ချထားပေးနေကြောင်း ဒေသခံများက ပြောသည်။

မိုးကုတ်မြို့ကို TNLA စတင်ထိန်းချုပ်စဉ်ကာလ ၂၀၂၄ခုနှစ် စက်တင်ဘာလတွင်ကျောက်လုပ်ငန်းရှင်နှင့် ကုမ္ပဏီများကိုသာ ကျောက်တူးဖော်ခွင့်ပြုခဲ့ရာမှ ယခုအခါ ဒေသခံများကို မိုးကုတ်ဂေါက်ကွင်းအတွင်း လုပ်ကွက်သတ်မှတ်ပေးပြီး ဝင်ရောက်တူးဖော်ခွင့်ပြုထားကြောင်း မိုးကုတ်မြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“ဂေါက်ကွင်းမှာ ဒေသခံတွေ ကျောက်တူးနေကြတယ် ဆိုတာက ဟုတ်တယ်၊ တူးလည်း တူးနေကြပါတယ်။ တူးနေတဲ့ လူတွေနဲ့ TNLA နဲ့ ဘယ်လို အပေးအယူ၊ ဘယ်လို ပေးတူးတာလည်း ဆိုတာတော့ သေချာမသိရဘူး” ဟု မိုးကုတ်ဒေသခံ အမျိုးသားတစ်ဦးက ပြောသည်။

လက်ရှိ မိုးကုတ်ဒေသခံများကို တပိုင်တနိုင် ကျောက်တူးခွင့်ပြုလိုက်သည့် နေရာသည် မြို့အနောက်ဘက်ရှိ ဂေါက်ကွင်းဖြစ်ပြီး ကျောက်လုပ်ငန်း ကုမ္ပဏီကြီးများလည်း ဆက်လက် တူးဖော်နေကြကြောင်း သိရသည်။

ထိုသို့ တပိုင်တနိုင် ကျောက်တူးဖော်ခွင့်ရသည့် ဒေသခံများသည် TNLA ထံသို့ အခွန်ပေးဆောင်ရမှု ရှိနိုင်ကြောင်း မိုးကုတ်ဒေသခံ ကျောက်ကုန်သည်တစ်ဦးက ထပ်လောင်းပြောသည်။

“ဂေါက်ကွင်းထဲမှာ ကျောက်တူးနေတုန်းက မြေပြိုပြီး လူတွေ သေတာမျိုးလည်း ကြားမိတယ်။ ကျောက်တူးလို့ ရရင် ရတာကို TNLA ဆီ ၃ ပုံ ၂ ပုံ ပေးရတယ်”ဟု ၎င်းကုန်သည်အမျိုးသားက ဆက်ပြောသည်။

မကြာမီတွင် TNLA တပ်ဆုတ်ခွာမည့် မိုးကုတ်မြို့၌ ဒေသခံများကို တပိုင်တနိုင် လုပ်ကွက်များ ခွဲဝေချထားပေးမှုအပေါ် မေးမြန်းနိုင်ရန် TNLA ပြောရေးဆိုခွင့်ရှိသူ လွေးယေဦး ထံ သျှမ်းသံတော်ဆင့်မှ ဆက်သွယ်ခဲ့သော်လည်း အဆက်အသွယ် မရရှိခဲ့ပါ။

မိုးကုတ်မြို့ကို TNLA ထိန်းချုပ်ထားစဉ်အတွင်း ဦးဆောင်ဖွဲ့စည်းခဲ့သည့် ကျောက်မျက်ကော်မတီတွင် TNLA ကိုယ်စားပြု ၄ ဦး၊ PDF ဘက်မှ ကိုယ်စားပြု ၂ ဦးနှင့် ၎င်းတပ်ဖွဲ့တို့ အဆင်ပြေသည့် မြို့မိမြို့ဖ ၄ ဦးတို့ ပါဝင်ဖွဲ့စည်းထားကြောင်း ကျောက်မျက်ကုန်သည်များထံမှ သိရသည်။

ထိုစဉ်က မိုးကုတ်ဒေသခံများသည် ယခင်က လုပ်ကိုင်ခဲ့သည့် ပေါလံ ကျောက်မျက်တွင်းများ၌သာ တူးဖော်ရပြီး ရသမျှကို TNLA ထံ အခွန်အခအနေဖြင့် ၄၀ ရာခိုင်နှုန်းအထိ ပေးဆောင်ရကြောင်း၊ ထွက်ရှိလာသည့် အရည်အသွေးကောင်း ကျောက်များကိုလည်း ရောင်းချခွင့် ရထားသည့် တရုတ်ကုန်သည်ထံသာ ရောင်းချရကြောင်း ကျောက်ကုန်သည်များက ပြောဆိုသည်။

TNLA အနေဖြင့် မိုးကုတ်မြို့မှ နိုဝင်ဘာလ ၂၀ ရက်နောက်ဆုံးထား တပ်ဆုတ်ခွာရမည်ဟု သတင်းထွက်ပေါ်နေပြီး၊ လက်ရှိအချိန်ထိ စစ်ကောင်စီတပ်ဘက်မှ မိုးကုတ်မြို့ထဲ မည်သို့ ဝင်ရောက်လာမည်ကို မသိရသေးဘဲ လုံခြုံရေးစိုးရိမ်မှုကြောင့် ဒေသခံအချို့ ထွက်ပြေးတိမ်းရှောင်နေကြောင်း သိရသည်။