သျှမ်းပြည်တောင်ပိုင်း ပင်လုံမြို့တွင် တိုင်းရင်းသားလက်နက်ကိုင် တိုက်ပွဲအချင်းချင်းကြောင့် စစ်ဘေးကြိုတင် ရှောင်လာသည့်သူ (၅၀၀) ကျော် ရှိကြောင်း စုံစမ်းသိရှိရသည်။
လဲချားမြို့နယ် ဝမ်းယိမ်းကျေးရွာအုပ်စု နှင့် ပင်လုံမြို့ နားတစ်ကျေးရွာအုပ်စုတွင် ရှမ်းပြည်ပြန်လည်ထူထောင်ရေး ကောင်စီ (RCSS) နှင့် မြောက်ပိုင်းမဟာမိတ် တို့ တိုက်ပွဲကြောင့် ဒေသခံပြည်သူများက ပင်လုံမြို့တွင်းသို့ စစ်ဘေးရှောင်လာခဲ့ကြောင်း သိရသည်။
“သူတို့တွေက စစ်ဘေးကို ကြိုရှောင်လာကြတာ။ တချို့နေရာမှာတော့ ပစ်ခတ်နေကြပြီ။ ပင်လုံမြို့ထဲက ရှောင်လာတဲ့သူတွေက ၅၀၀ ကျော်လောက်တော့ရှိနေပြီထင်တယ်။ ကျနော်တို့လည်း စာရင်း အတိကျ မရသေးဘူး။ အခုပဲ လိုက်ကောက်နေသေးတယ်” ဟု ပင်လုံမြို့ ဒေသခံ အသက် ၃၅ နှစ်ကျော် အမျိုးသားတစ်ဦးက ပြောသည်။
ပင်လုံမြို့သို့ ရောက်ရှိလာသူများသည် တစုတစည်းတည်း စစ်ရှောင်စခန်းတွင် နေထိုင်ခြင်းမဟုတ်ဘဲ ဆွေမျိုးအိမ်များတွင် သွားရောက် ခိုလှုံနေကြကြောင်း သိရသည်။
ထိုသို့ တိုက်ပွဲပြင်းထန်လာပါက စစ်ရှောင်များကို ကူညီနိုင်ရန်အတွက် ယမန်နေ့ ဖေဖော်ဝါရီ ၂၀ က ပင်လုံမြို့ဒေသခံများနှင့် သံဃာများက အစည်းအဝေးတစ်ရပ် ပြုလုပ်ခဲ့ကြောင်း သိရသည်။
“အခုပင်လုံမှာရောက်နေကြတဲ့ စစ်ရှောင်တွေဟာ မိတ်ဆွေ၊ ဆွေမျိုးအိမ်တွေမှာပဲ သွားနေကြတာ။ တစ်နေရာထဲမှာ စုနေကြတာတော့မဟုတ်ဘူး။ ကျနော်တို့လည်း အခု စာရင်းကောက်နေတယ်။ တကယ်လို့ စစ်ဘေးရှောင်တွေများလာပြီး နေစရာမရှိဘူးဆိုရင်လည်း ကျနော်တို့ဘက်ကနေ နေရာတွေ စီစဉ်ပေးထားတယ်” ဟု စစ်ရှောင်များကို ကူညီပေးနေသည့် လူငယ်အမျိုးသားက ဆိုသည်။
RCSS နှင့် မြောက်ပိုင်းမဟာမိတ်တို့သည် မိုင်းကိုင်မြို့နယ်အတွင်းသို့ တိုက်ပွဲပြင်းထန်ခဲ့ပြီး ယခုရက်ပိုင်းတွင် လဲချားမြို့နှင့် ပင်လုံမြို့ကြားရှိ ကျေးရွာတစ်ချို့သို့ စစ်မီးကူးလာခဲ့ခြင်းဖြစ်သည်။
လက်ရှိအချိန်ထိ နှစ်ဘက်တပ်များ စစ်ရေးတင်းမားနေလျက်ရှိကြောင်း သိရသည်။
Leave a Comments