သျှမ်းပြည်အရှေ့ပိုင်း ကျိုင်းတုံမြို့ ယနေ့ (ဖေဖော်ဝါရီ ၁၅)ရက်တွင် အာဏာသိမ်းစစ်ခေါင်းဆောင် ကာချုပ် မင်းအောင်လှိုင်က ရောက်ရှိလာပြီး လုံခြုံရေးကို တင်းကြပ်ထားကြောင်း စုံစမ်းသိရှိရသည်။
ကာချုပ် မင်းအောင်လှိုင်သည် ယနေ့ မနက် (၇)နာရီဝန်းကျင်က ကျိုင်းတုံမြို့ မဟာမြတ်မုနိဘုရားကြီး နှစ် (၁၀၀)ပြည့် အထိမ်းအမှတ် ပူဇော်ပွဲနှင့် ထီးတော်တင်ပွဲကို ရောက်ရှိလာပြီး လုံခြုံရေးကို အတင်းအကြပ်ယူထားကြောင်း သိရသည်။
“သူ ဒီနေ့ အဲ့နားမှာ မဟာမြတ်မုနိဘုရားကြီးနား ထီးတော်တင်ပွဲကို လာတယ်လေ။ လုံခြုံရေး အတင်းကြပ်ယူထားတယ်။ သူ မရောက်ခင် ကတည်းက (၅)ရက် အလိုကတည်းက လုံခြုံရေးကို တင်းကြပ်နေတာ” ဟု ကျိုင်းတုံမြို့ ဒေသခံ အမျိုးသားတစ်ဦးက ပြောသည်။
ကာချုပ် မင်းအောင်လှိုင်သည် ယမန်နေ့ ဖေဖော်ဝါရီ ၁၄ ရက်တွင် တာချီလိတ်မြို့သို့ ရောက်ရှိလာပြီး ယနေ့ ကျိုင်းတုံမြို့သို့ ရောက်ရှိလာခဲ့ကြောင်း သိရသည်။
ကျိုင်းတုံမြို့သို့ အာဏာသိမ်းစစ်ခေါင်းဆောင် ကာချုပ် မင်းအောင်လှိုင် ရောက်နေချိန် တာချီလိတ်ပြည်သူများက ယနေ့
(ဖေဖော်ဝါရီ ၁၅) ရက်တွင် ၎င်း၏ပုံများကို ဖယောင်းတိုင်၊ အမွှေးတိုင်များဖြင့် စီမံပြီး ကျိန်စာတိုက်ခဲ့ကြောင်း သိရသည်။
ကာချုပ် မင်းအောင်လှိုင်သည် အာဏာသိမ်းပြီးနောက်ပိုင်း ကျိုင်းတုံမြို့သို့ (၂) ကြိမ် ရောက်ရှိလာခဲ့ကြောင်း သိရသည်။
Leave a Comments