သျှမ်းပြည် မြောက်ပိုင်း သီပေါမြို့နယ်တွင် နေရပ်ပြန်သွားသည့် စစ်ရှောင်ပြည်သူ ၃ ဦး မိုင်းထိ ဒဏ်ရာရရှိခဲ့ကြောင်း သိရသည်။

ထိုစစ်ရှောင်များသည် ပြီးခဲ့သည့် ဇန်နဝါရီလ လကုန်ပိုင်းက နေရပ်ပြန်သွားတာဖြစ်ကြောင်း၊ နေရပ်ပြန်ပြီး ရက်ပိုင်းအကြာ ယခုလ (ဖေဖော်ဝါရီ) ၃ ရက်နေ့တွင် မိုင်းထိခဲ့တာဖြစ်ပြီး ၂ ဦးမှာ ဒဏ်ရာပြင်းထန်ခဲ့သည့်အတွက် လားရှိုးဆေးရုံသို့ ပို့ဆောင်ကုသနေကြောင်း သိရသည်။

“ဘော်ကြိုဘုန်းကြီးကျောင်းမှာ စစ်ရှောင်လာပြီး ရွာပြန်သွားတာ မကြာသေးဘူး မိုင်းနင်းမိတာပဲ။ ခု လားရှိုးဆေးရုံကို ပို့ထားတယ်လို့ သိရတယ်။ ဒဏ်ရာအခြေနေ ဘယ်လိုရှိနေမလဲတော့ မသိဘူး” ဟု သီပေါမှ စစ်ရှောင်ကူညီသူ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

သီပေါမြို့နယ် ကျင်သီကျေးရွာအုပ်စု တွန်ဆောက်ကျေးရွာမှ ဒေါ်ခင်ဌေး (အသက် ၅၄)နှစ်နှင့် အသက် (၃၀)အရွယ် ၄င်း၏ သားသည် ရွာနှင့် (၂)မိုင်ခန့်အကွာတွင် မိုင်းထိခဲ့တာဖြစ်ပြီး ဒေါ်ခင်ဌေးမှာ ဒဏ်ရာပြင်းထန်ရရှိခဲ့ကြောင်း၊ ထို့အပြင် မန်ဆိုင်းကျေးရွာမှ စိုင်းကော (၄၀)နှစ်သည် ၄င်း၏ တောင်ယာထဲတွင် မိုင်းနင်းမိပြီး ဒဏ်ရာရရှိခဲ့တာကြောင်း သိရသည်။

ထိုကျေးရွာအနီးပတ်ဝန်းကျင်တွင် ပြီးခဲ့သည့် ဇန်နဝါရီလအတွင်းက တိုင်းရင်းသားလက်နက်ကိုင်တပ် ဖြစ်သည့် RCSS/SSA နှင့် တပ်ပေါင်းစု(TNLA ၊ SSPP/SSA) တပ်တို့ ထိတွေ့တိုက်ပွဲဖြစ်ပွားခဲ့သည့် နယ်မြေဖြစ်ကြောင်း၊ ထို့ကြောင့် တိုက်ပွဲဖြစ်ပွားခဲ့သည့် နေရာပတ်ဝန်းကျင်တွင် ဒေသခံပြည်သူများ မိုင်းအန္တရာယ်ကင်းစွာ သွားလာနိုင်ဖို့အတွက် မိုင်းများကို ရှင်းလင်းပေးစေလိုကြောင်း ဒေသခံ အမျိုးသမီးတစ်ဦးက ပြောသည်။

“ဖြစ်နိုင်ရင်တော့ အဲ့ဒီကျေးရွာအနီးနား နယ်မြေကို ထိန်းချုပ်ထားတဲ့ လက်နက်ကိုင်တပ်ဖွဲ့တွေအနေနဲ့ ဒီ မြေမြုပ်မိုင်းတွေကို ရှင်းလင်းပေးစေချင်တယ်။ ပြည်သူတွေ အန္တရာယ်ကင်းကင်းနဲ့ သွားလာနိုင်အောင် ကူညီပေးစေချင်တယ်။ ဒီရက်ပိုင်း နေရပ်ပြန်တဲ့ စစ်ရှောင်တွေ မိုင်းနင်းမိပြီး ဒဏ်ရာရခဲ့တာဆိုတော့ ခုဆို ရွာကလူတွေလည်း စိတ်မချတော့ဘူး။ သွားလာဖို့ ကြောက်ရွံ့နေကြပြီ” ဟု အဆိုပါအမျိုးသမီးက ပြောသည်။
ထို့အပြင် ပြီးခဲ့သည့် ဇန်နဝါရီလအတွင်း တိုင်းရင်းသားလက်နက်ကိုင်တပ်အချင်းချင်း တိုက်ပွဲဖြစ်ပွားမှုကြောင့် ပုံဖမ်းနှင့် လောင်ခွန်ကျေးရွာမှ ပြည်သူနေအိမ် (၃)အိမ် လက်နက်ထိမှန်ပျက်စီးမှု ရှိခဲ့ကြောင်းလည်း သိရသည်။