သျှမ်းပြည်တောင်ပိုင်း မိုင်းကိုင်မြို့ နယ်အတွင်းရှိ စစ်ရှောင် (၅၀၀) ခန့်ကျန်ရှိနေပြီး စားနပ်ရိက္ခာ နှင့် စောင်များ လိုအပ်နေကြောင်း စုံစမ်းသိရှိရသည်။
ထို စစ်ရှောင်များသည် မိုင်းကိုင်တပေါင်းပွဲကွင်းပြင် ၊ ဘုန်းကြီးကျောင်း တစ်ချို့ နှင့် ဆွေမျိုးမိတ်ဆွေ အိမ်များတွင် နေထိုင်နေကြကြောင်း စုံစမ်းသိရှိရသည်။
“ခု အစားအသောက်တွေပဲ လိုအပ်တယ်။ စောင်တွေလည်း နည်းနည်းတော့လိုအပ်နေတယ်။ တစ်ချို့ မနေ့က စောင်တွေ လိုက်တောင်းနေတာတွေ့ရတယ်” ဟု စစ်ရှောင်များကို ကူညီပေးနေသူ တစ်ဦး ကပြောသည်။
ဇန်နဝါရီ (၃၁) ရက်နေ့က ထိုစစ်ရှောင်များထဲ စစ်ရှောင်တစ်ချို့ နှစ်ထပ်ကွင်း ပြန်ပြေးလာရကြောင်း စုံစမ်းသိရသည်။
“အိမ်မှာ (၂) ရက်လောက်ပဲ နေရသေးတယ်။ လက်နက်သံကြားလို့ ပြန်ထွက်ပြေးလာရတယ်။ ရွာမှာ စစ်ရေးတင်းမာလို့ မပြန်ရဲသေးဘူး” ဟု စစ်ရှောင် တစ်ဦး ကပြောသည်။
လက်ရှိချိန်မှာ မိုင်းကိုင်မြို့နယ်အတွင်း တိုက်ပွဲများ ငြိမ်သက်သွားသော်လည်း ကျေးရွာအတွင်း စစ်ရေးတင်းမာမှုများ ရှိနေသဖြင့် စစ်ရှောင်များ မပြန်ရဲသေးကြောင်း စစ်ရှောင်များက ဆိုသည်။
မိုင်းကိုင်မြို့နယ်အတွင်း တိုင်းရင်းသားလက်နက်ကိုင် တပ်ဖွဲ့တွေအချင်းချင်း တိုက်ပွဲဖြစ်ပွားသောကြောင့် ဇန်နဝါရီလဆန်းပိုင်းကတည်းက မိုင်းကိုင်မြို့ပေါ် ဒေသခံ အပါအဝင် မြို့နယ်အတွင်းကျေးရွာများလည်း စိုးရိမ်ထိတ်လန့်ခဲ့ရကြောင်းသိရသည်။
Leave a Comments