သျှမ်းပြည် တောင်ပိုင်း ပင်လောင်းမြို့နယ် နောင်တရားမြို့သို့ ရောက်ရှိခိုလှုံနေသည့် ကရင်နီပြည်မှ စစ်ရှောင်တချို့ စိုးရိမ်စိတ်ဖြင့် နေရပ်ပြန်သွားခဲ့ကြောင်း သတင်းသိရသည်။

ကရင်နီပြည်(ကယားပြည်)တွင် ပြီးခဲ့သည့် ဇန်နဝါရီလအတွင်းက စစ်ကောင်စီနှင့် ပြည်သူ့ကာကွယ်ရေးတပ်ဖွဲ့သို့ တိုက်ပွဲပြင်းထန်ခဲ့မှုကြောင့် ဒေသခံပြည်သူများ သျှမ်းပြည်တောင်ပိုင်းအတွင်းရှိ မြို့နယ်များသို့ ထွက်ပြေးတိမ်းရှောင်ခဲ့ရပြီး ယခုရက်ပိုင်းတွင် နေရပ်ပြန်သွားကြကြောင်း သိရသည်။

“ဒီ တစ်ရက် နှစ်ရက်မှာပဲ ပြန်သွားကြတယ်။ တစ်ရက်နည်းနည်း ပြန်သွားတာ။ တိုက်ပွဲငြိမ်တဲ့နေရာမှာ နေတဲ့သူတွေပဲ ပြန်သွားတာပါ။ ပြန်တယ်ဆိုပေမယ့် တိုက်ပွဲက ဘယ်ချိန်ဖြစ်လာမလဲ မသိတော့ စိုးရိမ်နေကြသေးတယ်။ စစ်ရှောင်တွေကတော့ ပြန်ချင်နေကြပြီ။ တိုက်ပွဲအခြေနေကို မသိလို့ မပြန်ကြသေးတာ အများကြီးကျန်သေးတယ်” ဟု နောင်တရားစစ်ဘေးရှောင်များကို ကူညီနေသည့် ဦးခွန်ဆန်းဦးက သျှမ်းသံတော်ဆင့်ကို ပြောသည်။

ယခုရက်ပိုင်းအတွင်း နောင်တရားစစ်ရှောင်နေရာမှ ကရင်နီပြည် လွိုင်ကော်မြို့နယ်အပါအဝင် အခြားနေရပ်သို့ ပြန်သွားသည့် စစ်ဘေးရှောင် (၁၀၀)ဝန်းကျင် ရှိနေပြီး နောက်ထပ် နေရပ်ပြန်ရန် ပြင်ဆင်နေသည့်သူများလည်း ရှိနေကြောင်း သိရသည်။

လက်ရှိ ပင်လောင်းမြို့နယ် နောင်တရားမြို့တွင် စစ်ဘေးရှောင် တစ်ထောင်ဝန်းကျင် ကျန်ရှိနေဆဲဖြစ်ပြီး ထိုစစ်ဘေးရှောင်များ ရေရှည်ဆက်နေရမည်ဆိုပါက စားနပ်ရိက္ခာများနှင့် ၄◌င်းတို့၏ ဘဝ ရပ်တည်နိုင်ရေးအတွက် အခက်ခဲရှိလာနိုင်ကြောင်း စစ်ရှောင်ကူညီသူတစ်ဦးက ပြောသည်။

“လတ်တလောကတော့ အခက်ခဲ သိပ်မရှိဘူး၊ ဒါပေမယ့် သူတို့(စစ်ရှောင်)ဒေသမှာ တိုက်ပွဲတွေ ဆက်ဖြစ်ပြီး နေရပ်မပြန်နိုင်ရင်တော့ စားနပ်ရိက္ခာတွေခက်ခဲလာနိုင်တယ်။ ပြီးတော့ သူတို့ဘဝ ပြန်လည်ထူထောင်ရေးတွေ လုပ်ရမယ်ဆိုတော့ ဒါလည်း ခက်ခဲနိုင်တာပေါ့” ဟု နောင်တရားဒေသခံ အမျိုးသားတစ်ဦးက ပြောသည်။

နောင်တရားတွင် ရောက်ရှိခိုလှုံနေသည့် စစ်ဘေးရှောင်များထဲမှ အသက် ၁၅ နှစ်အောက် ကလေးငယ် ၂၀၀ ဝန်းကျင်ကိုလည်း ဒေသခံ ပရဟိတ ဆရာ/မ များက အခြေခံ စာပေသင်ကြားမှုများ ပြုလုပ်ပေးနေကြောင်း သိရသည်။

ထိုစစ်ရှောင်များသည် ပြီးခဲ့သည့် ဇန်နဝါရီလ ၁၀ ရက် ဝန်းကျင်မှ စပြီး ကရင်နီပြည်မှ သျှမ်းပြည် တောင်ပိုင်း ပင်လောင်းမြို့နယ် အတွင်းသို့ ထွက်ပြေးတိမ်းရှောင်ခဲ့ကြသူများဖြစ်ကြောင်း သိရသည်။