သျှမ်းပြည်မြောက်ပိုင်း နမ့်ခမ်းမြို့ တွင် သပိတ်ဦးဆောင်သူ လူငယ် (၄)ဦးကို စစ်ကောင်စီက ဖမ်းဆီးခေါ်ဆောင်သွားကြောင်း စုံစမ်းသိရှိရသည်။
ဇန်နဝါရီ ၂၉ ရက်မှ စတင်ကာ စစ်ကောင်စီ တပ်ဖွဲ့ဝင်များက နမ့်ခမ်းမြို့နယ်အတွင်းနေထိုင်ပြီး စစ်အာဏာရှင်ကို ဆန့်ကျင်သည့် လူငယ်များကို လိုက်လံဖမ်းဆီးစစ်ဆေးနေပြီး တချို့ လူငယ်များကို ပြန်လည်လွှတ်ပေးခဲ့ကြောင်း သိရသည်။
“ဖမ်းသွားတုန်းကတော့ အများကြီးပဲ။ နည်းနည်းပြန်လွတ်ပေးတာလည်းရှိတယ်လို့ ကြားတယ်။ ခုတော့ (၄)ယောက် ကျန်တယ်လို့ ပြောတယ်။ သူတို့က သပိတ်ဦးဆောင်တဲ့သူတွေလို့တော့ သတင်းထွက်တယ်။ သေချာတော့ မသိရဘူး” ဟု နမ့်ခမ်းမြို့ခံ တစ်ဦးက ပြောသည်။
ထိုဖမ်းဆီးသွားသည့် လူငယ် (၄)ဦးကို နမ့်ခမ်းအချုပ်ခန်းတွင် ထားရှိကြောင်း၊ လက်တလော လူမှုကွန်ရက်ပေါ်တွင် စစ်အာဏာရှင်ကို ဆန့်ကျင်သည့် လှုပ်ရှားမှုနှင့် စစ်တပ်ထုတ်ကုန် မသုံးစွဲရန် နှို့ဆော်သည့် စာများနှင့် သက်ဆိုင်မှုကြောင့် ဖမ်းဆီးသွားသည်ဟု နမ့်ခမ်းဒေသခံများ မှတ်ချက်ပြုကြသည်။
“သူတို့ (၄) ယောက်စလုံး နမ့်ခမ်းအချုပ်ခန်းမှာ ရှိထားတယ်လို့ကြားတယ်။ ဒီရက်ပိုင်း အွန်လိုင်းပေါ် ထုတ်ပြန်တဲ့စာတွေနဲ့လည်း သက်ဆိုင်တာပါမယ်။ မနေ့ မနက်ပိုင်းကလဲ လာဖမ်းသွားတာရှိတယ်” ဟု နမ့်ခမ်းဒေသခံ အမျိုးသား တစ်ဦးက ပြောသည်။
နမ့်ခမ်းမြို့တွင်း စစ်ကောင်စီ ထုတ်ကုန်များကို အသုံးမပြုရန်အတွက် နမ့်ခမ်းပျောက်ကြား အဖွဲ့က ထုတ်ပြန်ထားသည့် စာစောင်သည် လူမှုကွန်ရက် စာမျက်နှာပေါ် ပျံ့နှံ့နေကြောင်း သိရှိရသည်။
ထို ထုတ်ပြန်ချက်တွင် နမ့်ခမ်းမြို့ ပျောက်ကြားအဖွဲ့က ထုတ်ပြန်ထားသော်လည်း ဒေသခံ တချို့က နမ့်ခမ်းမြို့ပေါ် PDF ရှိ၊ မရှိ မသေချာကြောင်း ဒေသခံများက ပြောဆိုကြသည်။
နမ့်ခမ်းမြို့သည် စစ်ကောင်စီ တပ်ဖွဲ့အပါအဝင် တိုင်းရင်းသားလက်နက်ကိုင် ပေါင်းစုံ လှုပ်ရှားရာ နယ်မြေဖြစ်ပြီး တိုက်ပွဲများ မကြာခဏဖြစ်ပွားခဲ့သည်။
ယနေ့ ဖေဖော်ဝါရီ (၁)ရက်နေ့တွင် နမ့်ခမ်းမြို့ပေါ် လက်နက်ကြီးသံများ ကြားရသဖြင့် ဒေသခံပြည်သူများ စိုးရိမ် ထိတ်လန့်ပြီး စျေးဆိုင်များလည်း ပိတ်ထားကြောင်း သိရှိရသည်။
