သျှမ်းမြောက် ကျောက်မဲမြို့နယ်တွင် ရောက်ရှိခိုလှုံနေသည့် စစ်ရှောင် (၁၀၀၀)ဝန်ကျင် အတွက် စားနပ်ရိက္ခာ ပြတ်လပ်နေပြီဖြစ်ကြောင်း သတင်းသိရသည်။

ကျောက်မဲတွင် နေရပ်မပြန်နိုင်သေးသည့် စစ်ဘေးရှောင်ပြည်သူ (၁၀၀၀)ဝန်းကျင်ခန့် ကျန်ရှိနေဆဲဖြစ်ပြီး စားနပ်ရိက္ခာနှင့် ထင်းများ လိုအပ်နေတာဖြစ်ကြောင်း စစ်ရှောင်ကူညီသူများက ပြောသည်။

“ခုက စားနပ်ရိက္ခာတွေ ကုန်နေပြီ၊ ထင်းတွေ၊ ဆီတွေလည်း ကုန်သလောက်ဖြစ်နေပြီ၊ စစ်ရှောင်တွေကလည်း နေရပ်မပြန်နိုင်သေးဘူး၊ စစ်ရှောင်စခန်း တော်တော်များများ ခက်ခဲနေကြပြီ၊ အရင်ကတည်းက ရှိတဲ့ စစ်ရှောင်တွေရော၊ ဒီနောက်ပိုင်းမှ ရောက်လာတဲ့သူတွေရော ဟင်းတွေ ဆီတွေက မလုံလောက်တော့ဘူး” ဟု ကျောက်မဲ သျှမ်းစာပေနှင့်ယဉ်ကျေးမှုအသင်း ဥက္ကဌ လုံးလျန်းဟန် က သျှမ်းသံတော်ဆင့်ကို ပြောသည်။

ကျောက်မဲနှင့် သီပေါကြားတွင် ပြီးခဲသည့် ဇန်နဝါရီလက တိုင်းရင်းသားလက်နက်ကိုင်တပ် အချင်းချင်း တိုက်ပွဲဖြစ်ပွားမှုကြောင့် ဒေသခံ ရာချီ ထွက်ပြေးတိမ်းရှောင်ခဲ့ရသည်။

သီပေါ ဘော်ကြိုဘုန်းကြီးကျောင်းတွင်ရောက်ရှိခိုလှုံနေသော စစ်ဘေးရှောင်ပြည်သူများ နေရပ်ပြန်သွားကြသော်လည်း ကျောက်မဲမြို့ဘက်သို့ ထွက်ပြေးတိမ်းရှောင်ခဲ့ကြသည့် စစ်ဘေးရှောင်များ ယနေ့ထိ နေရပ်မပြန်နိုင်သေးပေ။

“ဒီ တစ်ရက် နှစ်ရက်တော့ တိုက်ပွဲကြီးကြီး ဖြစ်တာ မကြားရတော့ဘူး၊ လက်နက်ကြီးသံ တစ်ချက်တစ်ချက် ကြားနေရသေးလို့ မပြန်ရဲသေးတာ၊ အရမ်းပြန်ချင်နေပြီ၊ လက်ထဲမှာလဲ ဘာမှ မရှိတော့ဘူး၊ အိမ်ငှားနေဖို့ ကလည်း ပိုက်ဆံမရှိဘူး၊ ဘုန်းကြီးကျောင်းမှာပဲ လာနေနေတာ” ဟု ကျွဲကုန်း ဘုန်းကြီးကျောင်းတွင် လာရောက်ခိုလှုံနေသည့် စစ်ရှောင် သက်ကြီးအမျိုးသမီးတစ်ဦးက ပြောသည်။

ကျောက်မဲမြို့နယ်တွင် ယခုရက်ပိုင်းအတွင်း တိုက်ပွဲသံ ငြိမ်နေသော်လည်း ထွက်ပြေးတိမ်းရှောင်နေကြသည့် ပြည်သူများသည် တိုက်ပွဲ ထပ်မံဖြစ်ပွားမည်ကို စိုးရိမ်သည့်အတွက် စစ်ရှောင်ဘုန်းကြီးကျောင်းနှင့် မြို့တွင်း ဆွေမျိုးအိမ်များ၊ အိမ်ငှားများဖြင့် ဆက်လက်နေထိုက်လျက်ရှိကြောင်း သိရသည်။

လက်ရှိတွင် ဆွေမျိုးအိမ်များ၊ အိမ်ငှားများအပြင် သျှမ်းစာပေနှင့်ယဉ်ကျေးမှု စစ်ရှောင်စခန်း၊ မြို့တွင်း ရပ်ကွက် (၈) ဓမ္မာရုံ၊ နမ့်စစ်လင်း ဘုန်းကြီးကျောင်း၊ နားခေါ် ဘုန်းကြီးကျောင်း၊ ကျွဲကုန်း ဘုန်းကြီးကျောင်း၊ မိုင်းတင်းကျေးရွာအုပ်စုအတွင်းရှိ ကျေးရွာများနှင့် မိုင်းငေါ့မြို့တို့တွင် စစ်ဘေးရှောင်များ ခိုလှုံနေရဆဲ ဖြစ်ကြောင်း သိရသည်။