သျှမ်းပြည်မြောက်ပိုင်း သီပေါမြို့နယ် ဘော်ကြိုဘုန်းကြီးကျောင်းတွင် ရောက်ရှိနေသည့် စစ်ဘေးရှောင် (၄၅၀)ကျော် သည် စိုးရိမ်စိတ်ဖြင့် နေရပ်ကို ပြန်သွားကြောင်း စုံစမ်းသိရှိရသည်။
လက်ရှိ အချိန်ထိ သီပေါမြို့နယ်အတွင်း နယ်မြေတည်ငြိမ်မှု မရှိသေးသော်လည်း စစ်ဘေးရှောင်များသည် နေအိမ်ကို စိုးရိမ်ရသောကြောင့် ဇန်နဝါရီ ၂၉ ရက်မှစကာ နေရပ်သို့ ပြန်သွားကြောင်း သိရသည်။
“နယ်မြေတည်ငြိမ်မှုတော့ မရှိသေးဘူး။ အခုတော့ စစ်ရှောင်တွေ အကုန်ပြန်သွားပြီ။ သူတို့လည်း နေအိမ်ကို စိတ်ပူလို့ထင်တယ်။ အဲကြောင့် အကုန်ပြန်သွားကြပြီ။ တချို့ကတော့ မပြန်ချင်သေးပေမယ့် ပြန်သွားကြပြီ။ သူတို့ နယ်မြေ မငြိမ်းချမ်းသေးတော့ အကုန်ပြန်လာမှာကိုပဲ စိုးရိမ်တယ်” ဟု သီပေါမြို့နယ် စစ်ရှောင်များကို ကူညီပေးနေသည့် အမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ စစ်ရှောင်များသည် ကျေးရွာအုပ်ချုပ်ရေးမှူးမှ လာခေါ်သဖြင့် နေရပ်ပြန်ရကြောင်း၊ တချို့ စစ်ရှောင်များ မပြန်ချင်သေးသော်လည်း နေအိမ်ကိုစိုးရိမ်သောကြောင့် ပြန်သွားရကြောင်း သိရသည်။
“အုပ်ချုပ်ရေးမှူး ပြန်လာခေါ်လို့ ပြန်သွားရတာရှိတယ်။ တချို့ စစ်ရှောင်တွေကတော့ မပြန်ချင်သေးဘူး။ ရွာထဲမှာလည်း စစ်သားတွေရှိနေသေးတော့ မပြန်ချင်တာ။ မပြန်ရင်လည်း နေအိမ်ကို စိတ်ပူရလို့ ပြန်သွားကြတာထင်တယ်။ စစ်ရှောင်တွေ အကုန်လုံးတော့ ပြန်သွားပြီ” ဟု စစ်ရှောင်များကို ကူညီပေးနေသည့် အမျိုးသားတစ်ဦးက ပြောသည်။
သီပေါမြို့နယ် စစ်ရှောင်များသည် ကျင်သီကျေးရွာအုပ်စု ကျင်သီနှင့် ပုံဖမ်းကျေးရွာမှ အများစုဖြစ်ပြီး ဇန်နဝါရီ ၉ ရက်နေ့ကတည်းက တိမ်းရှောင်လာကြသူများ ဖြစ်သည်။
သီပေါမြို့နယ်နှင့် ကျောက်မဲမြို့နယ်တို့တွင် ရှမ်းပြည်ပြန်လည်ထူထောင်ရေးကောင်စီ၊ ရှမ်းပြည်တပ်မတော် (RCSS/SSA) နှင့် မြောက်ပိုင်းမဟာမိတ် (SSPP/SSA) (TNLA) တို့ တိုက်ပွဲဖြစ်ပွားပြီး ဒေသခံရာချီ ထွက်ပြေးတိမ်းရှောင်နေရကြောင်း သိရသည်။
Leave a Comments