ကျောက်မဲမြို့နယ် တိုင်းရင်းသား လက်နက်ကိုင် အချင်းချင်း တိုက်ပွဲဖြစ်ပွားမှုကြောင့် ထွက်ပြေးတိမ်းရှောင် နေရသည့် စစ်ဘေးရှောင်ပြည်သူများ စောင်နှင့် အနွေးထည် လိုအပ်နေကြောင်း စုံစမ်းသိရသည်။

“ခုက အေးတဲ့ ရာသီ ဆိုတော့ စောင်တွေ အနွေးထည်တွေ လိုအပ်တယ်၊ တိမ်းရှောင်လာတဲ့သူတွေလည်း ပိုများလာတယ်၊ ခုဆို ဘုန်းကြီးကျောင်းတွေမှာရော၊ ရပ်ကွက်တွင်း ဆွေမျိုးအိမ်တွေမှာရော များတယ်၊ အိမ်ငှားနေတာတွေလည်း အများကြီး ရှိတယ်” ဟု သျှမ်းစာပေနှင့် ယဉ်ကျေးမှု အသင်း ဥက္ကဌ လုံးလျန်းဟန် က သျှမ်းသံတော်ဆင့်ကို ပြောသည်။

ကျောက်မဲနှင့် သီပေါ ကြား နောင်အန်း၊ ဗူးခါး၊ နားခေါ် ကျေးရွာအနီးတွင် တိုင်းရင်းသား လက်နက်ကိုင်များ ဖြစ်သည့် RCSS/SSA နှင့် တပ်ပေါင်းစု (SSPP/SSA ၊ TNLA)ပူးပေါင်းတပ်တို့ နေ့စဉ်ရက်ဆက် တိုက်ပွဲ ဖြစ်ပွားမှုကြောင့် ထိုကျေးရွာအနီးနေထိုင်သည့် ဒေသခံ ပြည်သူများ ထွက်ပြေးတိမ်းရှောင်နေရသည်။

“တချို့က ဒီလ အစောပိုင်းကတည်းက တိမ်းရှောင်ရတာ၊ နားခေါ် ဘုန်းကြီးကျောင်းမှာလည်း ၁၄၀ ကျော်လောက်ကို ရောက်နေတယ်၊ အဲ့အနီးနားက ဒေသခံတွေပဲ၊ တချို့က ရွာကို ပြန်ချင်တာ ရွာထဲ ဝင်ပြီးရင် ပြန်မထွက်ရဘူး ဆိုပြီး လက်နက်ကိုင် အဖွဲ့တွေ ပြောထားလို့ မပြန်ရဲကြဘူး” ဟု စစ်ဘေးရှောင် အမျိုးသမီးတစ်ဦးက ပြောသည်။

တိုင်းရင်းသားလက်နက်ကိုင် အချင်းချင်း နေ့စဉ်နီးပါး တိုက်ပွဲဖြစ်ပွားမှုကြောင့် စစ်ဘေးတိမ်းရှောင်သူ ပိုမိုများပြားလာပြီး နားခေါ် ဘုန်းကြီးကျောင်း၊ နမ့်စစ်လင်း ဘုန်းကြီးကျောင်း၊ ကျွဲကုန်းဘုန်းကြီးကျောင်းတို့တွင် လာရောက်ခိုလှုံနေသူဦးရေ ပိုများလာကြောင်း သိရသည်။

ယနေ့ (ဇန်နဝါရီ ၂၄)ထိ ကျောက်မဲမြို့နယ်တွင် နေရပ်မပြန်နိုင်သေးသည့် စစ်ဘေးရှောင်ပြည်သူ တစ်ထောင်ဝန်းကျင် ရှိနေကြောင်း စစ်ရှောင်ကူညီသူများထံမှ သိရသည်။