သျှမ်းပြည်မြောက်ပိုင်း နမ္မတူမြို့နယ်တွင် မြောက်ပိုင်းမဟာမိတ်တပ်ဖွဲ့နှင့် သျှမ်းပြည်ပြန်လည် ထူထောင်ရေးကောင်စီ သျှမ်းပြည်တပ်မတော်တို့ကြားစစ်ရေးတင်းမာ မှုများကြောင့်ဒေသခံလူထု ရာနှင့်ချီ နေရပ်မှ ထွက်ပြေးတိမ်းရှောင်နေကြကြောင်းသိရသည်။

နမ္မတူမြို့နယ်အတွင်း မြောက်ပိုင်းမဟာမိတ်တပ်ဖွဲ့နှင့် RCSS/SSA ကြားစစ်ရေးတင်းမာမှုကြောင့် သြဂုတ်လ ၁၅ ရက်နေ့က ပန်လုံအုပ်စုဒေသခံများမှာ သီပေါမြို့နယ်ရှိ မန်လီအုပ်စုဘုန်းကြီးကျောင်းသို့လည်းကောင်း အောင်မင်္ဂလာဘိုးတော် ဘုန်းကြီးကျောင်းသို့လည်းကောင်းတိမ်းရှောင်ရောက်ရှိနေကြခြင်းဖြစ်သည်။

သီပေါမြို့နယ် SNLD ပါတီအတွင်းရေးမှူး စိုင်းလောဝ်ဆိုင်က – “၂ ဘက်စစ်ရေးတင်းမာမှုတွေဖြစ်နေတဲ့အပြင် ပစ်ခတ်တိုက်ခိုက်မှုသံတွေပါကြားရလို့ ပန်လုံအုပ်စုဒေသခံ ၃၈၀ က မန်လီကျောင်းကိုရောက်နေတယ်။ အောင်မင်္ဂလာဘိုးတော်ဘုန်းကြီးကျောင်းကို ၂၀၀ ရောက်နေတယ်ကြားတယ်။ တိုက်ပွဲကြီးမားကျယ်ပြန့်လာ မှာကိုစိုးရိမ်နေကြတယ်လေ။ သူတို့တွေကို စစ်ဘေးရှောင်ကူညီရေးအဖွဲ့ကနေ ကူညီစောင့်ရှောက် မှုပေးနေပါတယ် “- ဟု သျှမ်းသံတော်ဆင့်အားပြောသည်။

ပန်လုံအုပ်စုသည် နမ္မတူမြို့နယ်တောင်ဘက် ၂၄ မိုင်ခန့်အကွာတွင်တည်ရှိသည်။ ပန်လုံအုပ်စုအတွင်း ကျေးရွာ ၈ ရွာရှိရာ နမ့်ဆီလင်း၊ ပန်ဟတ်ရွာ၊ ၀မ့်ဆာရွာ၊ ၀မ့်ခယ်ရွာ၊ ပန်လုံရွာ၊ နားခိုလျံရွာ နှင့် ပန်ဆပေရွာတို့ဖြစ်ကြ သည်။ ၈ ရွာလုံးနီးပါးမှဒေသခံများလက်ရှိတွင်ထွက်ပြေးတိမ်းရှောင်နေကြရသည်။

အောင်မင်္ဂလာဘိုးတော်ဘုန်းကြီးကျောင်းရောက် အသက် ရ၀ ကျော်အရွယ် စစ်ဘေးရှောင်အဖွားတဦးက – “ဟင်းချက်နေတုန်း လက်နက် ကြီး သံထွက်တော့ ပြေးတာပေါ့။ ထမင်းဟင်းဘယ်စားဖြစ်မလဲ။ အဖွားလည်း မြေးလေးကိုဆွဲပြီး ထော်လာ ဂျီရှိတဲ့အိမ်ကိုတန်းပြေးတာ။ အဖွားတို့က ထော်လာဂျီမရှိတော့ သူများကိုမမှီရင်ခက်တော့မှာပေါ့ “- ဟု  စစ်ဘေးရှောင်များကူညီရေးအဖွဲ့မှ ပေးကမ်းလှူဒါန်းသော ထမင်းထုတ်နှိုက်စားရင်း ပြောဆိုသည်။

သျှမ်းပြည်မြောက်ပိုင်း နမ္မတူမြို့နယ်တွင် အစိုးရတပ်အပြင် မြောက်ပိုင်းမဟာမိတ်တပ်ဖွဲ့နှင့် သျှမ်းပြည် တပ်မ တော် RCSS/SSA တို့လှုပ်ရှားသည်။ ထို့အတွက်တိုက်ပွဲများမကြာခဏဖြစ်ပွါးပြီး ဒေသခံများမှာ လည်းတနှစ် ပတ်လုံးစစ်ဘေးရှောင်နေရသဖြင့်လယ်ယာလုပ်ငန်းများလစ်ဟင်းနေရကြောင်းလည်း စစ်ဘေး ရှောင်များက ပြော ဆိုသည်။