သျှမ်းမြောက် ကျောက်မဲမြို့နယ် ဗူးခါးကျေးရွာအနီး တိုင်းရင်းသားလက်နက်ကိုင်တိုက်ပွဲဖြစ်ပွားမှုကြောင့် ရွာတွင်းသို့ လက်နက်ကြီးစ ကျရောက်ခဲ့ကာ ဒေသခံများ ထွက်ပြေးတိမ်းရှောင်ခဲ့ရကြောင်း သတင်း သိရသည်။
ယမန်နေ့ (ဇန်နဝါရီ ၁၇)ရက် နေ့လည်ပိုင်းတွင် ဗူးခါး၊ ချောင်းချောက်၊ နောင်အန်းကျေးရွာအနီး တိုင်းရင်းသား လက်နက်ကိုင်အချင်းချင်း တိုက်ပွဲဖြစ်ပွားခဲ့ပြီး ဗူးခါးရွာတွင်းသို့ လက်နက်ကြီး ကျရောက်ခဲ့ကြောင်း ဒေသခံများက ပြောသည်။
“လက်နက်ကြီးကျတာ ဟုတ်တယ်၊ လက်နက်ကြီးစ က ဂိုဒေါင်ကို လာထိတာ၊ လူထိခိုက်တာတော့ မရှိဘူး၊ ရွာမှာလည်း လူသိပ်မရှိကြတော့ဘူးလေ၊ တချို့က အရင်ရက်တွေကတည်းက တိမ်းရှောင်နေကြတာ” ဟု ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ထိုကျေးရွာအနီးတဝိုက်ရှိ ဒေသခံ ပြည်သူများသည် ပြီးခဲ့သည့် ၁၀ ရက်ဝန်းကျင်ကတည်းက မြို့ပေါ်နှင့် ရပ်ကွက်ကျေးရွာတို့တွင် ထွက်ပြေးတိမ်းရှောင်ခဲ့ကြောင်း သိရသည်။
တိမ်းရှောင်နေရသည့် ပြည်သူများ နေရပ်ကို ပြန်လိုသော်လည်း တိုက်ပွဲရပ်တန့်ခြင်း မရှိသေးသည့်အတွက် မြို့ပေါ်ရှိ နမ့်စစ်လင်း ကျောင်းတိုက်နှင့် ဆွေမျိုးအိမ်များ၊ ရပ်ကွက်အတွင်း အိမ်ငှားဘဝများဖြင့် နေထိုင်နေရကြောင်း သိရသည်။
“တိုက်ပွဲက ရွာနဲ့ အရမ်းနီးလို့ ရှောင်ထားရတာ၊ အသံတွေက အရမ်းကျယ်တယ်၊ လက်နက်ကြီးသံတွေရော၊ ညဆိုလည်း ကောင်းကောင်း မအိပ်ရဲဘူး၊ အဲ့ကြောင့် မိသားစုလိုက် အိမ်လာငှားနေတာ၊ အိမ်ပြန်ချင်လည်း မပြန်ရဲသေးဘူး၊ တချို့ကတော့ ခဏ ပြန်သွားကြည့်တာတွေ ရှိတယ်” ဟု နားခေါ်ကျေးရွာမှ သက်ကြီး အမျိုးသမီးတစ်ဦးက ပြောသည်။
တိုင်းရင်းသား လက်နက်ကိုင်တပ်တွေဖြစ်သည့် သျှမ်းပြည် ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) နှင့် တပ်ပေါင်းစု တို့သည် ယမန်နေ့ (ဇန်နဝါရီ ၁၇)ရက် ညပိုင်း ၇ နာရီ ဝန်းကျင်တွင်လည်း ထိုကျေးရွာအနီး တိုက်ပွဲဆက်လက်ဖြစ်ပွားခဲ့ကြောင်း သိရှိရသည်။
