သျှမ်းမြောက် ကျောက်မဲမြို့နယ်တွင် တိုင်းရင်းသား လက်နက်ကိုင်အချင်းချင်း တိုက်ပွဲကြောင့် ဒေသခံ ရာကျော် ထပ်မံထွက်ပြေး တိမ်းရှောင်ခဲ့ရကြောင်း သတင်း သိရသည်။
ကျောက်မဲနှင့် သီပေါ မြို့နယ်အစပ်ရှိ ချောင်းချောက်၊ နောင်အန်ကျေးရွာပတ်ဝန်းကျင် မန္တလေး – မူးဆယ် ပြည်ထောင်စုလမ်းမကြီး အနီးတွင် တိုင်းရင်းသားလက်နက်ကိုင်အချင်းချင်း တိုက်ပွဲဖြစ်ပွားမှုကြောင့် ကျေးရွာဒေသခံများ ထွက်ပြေးတိမ်းရှောင်နေရကြောင်း သိရသည်။
“ထွက်ပြေးလာတာ ဒီနေ့နဲ့ဆို ၃ ရက်ရှိပြီ၊ ဘယ်လိုပြောရမလဲကို မသိတော့ဘူး၊ ကြောက်တယ်လေနော့၊ မိသားစုလိုက် ထွက်ပြေးလာတာ၊ တချို့က ဆိုင်ကယ်နဲ့ပဲ ထွက်လာကြတယ်၊ လမ်းလျှောက်လာတာ လည်းရှိတယ်၊ ရွာမှာ အိမ်စောင့်တချို့ပဲ ကျန်တယ်” ဟု လွယ်ဆာကျေးရွာမှ နမ့်စစ်လင်းကျောင်းတိုက်တွင် လာရောက်ခိုလှုံနေသူ စစ်ရှောင်အမျိုးသားတစ်ဦးက သျှမ်းသံတော်ဆင့်ကို ပြောသည်။
ကျောက်မဲမြို့ပေါ်ရှိ နမ့်စစ်လင်း ကျောင်းတိုက်တွင် စစ်ရှောင် ၁၀၀ ကျော် ရောက်ရှိခိုလှုံနေပြီး စားနပ်ရိက္ခာများ လိုအပ်နေသေးကြောင်း ကျောင်းထိုင်ဆရာတော်ထံမှ သိရသည်။
ထိုစစ်ဘေးရှောင်များမှာ နားပြိန်းကျေးရွာအုပ်စု၊ ကောင်းဟုန်း၊ လွယ်ဆာ၊ နောင်လျန်ကျေးရွာ ဒေသခံများ ဖြစ်ကြကြောင်း သိရသည်။
ထို့အပြင် ရပ်ကွက်များအတွင်း အိမ်ငှားလိုက်ရှာပြီး နေထိုင်သူများလည်း နေ့စဉ်ရှိနေကြောင်း ဒေသခံများက ပြောသည်။
“နားခေါ်ဘက်က အမျိုးတွေ အိမ်မှာ လာနေရတယ်၊ ရွာမှာ မနေရဲဘူး၊ တိုက်ပွဲနဲ့ နီးလို့ ဒီမှာပဲ လာနေကြတာ၊ တစ်ပတ်လောက်ကို ရှိနေပြီ၊ ခုထိ မပြန်ရဲသေးဘူး၊ ရပ်ကွက်ထဲမှာလည်း အိမ်ငှားလိုက်ရှာတဲ့သူတွေ နေ့တိုင်းကို ရှိနေတယ်၊ စစ်ရှောင်လာတဲ့သူလို့ ပြောတယ်” ဟု နမ့်တုံရပ်မှ ဒေသခံ အမျိုးသမီးတစ်ဦးက ပြောသည်။
နမ့်စစ်လင်းကျောင်းတိုက် အပြင် နောင်ပိန်ကျေးရွာအုပ်စု၊ မြို့ပေါ်အခြားရပ်ကွက်နှင့် ဆွေမျိုးအိမ်တို့တွင်လည်း ရောက်ရှိခိုလှုံနေသည့် စစ်ဘေးရှောင်ပြည်သူ ရာချီရှိနေကြောင်း သိရသည်။
ကျောက်မဲနှင့်သီပေါမြို့နယ် အစပ်ဖြစ်သည့် ဗူးခါး၊ ချောင်းချောက်၊ နောင်အန်၊ နောင်မွန်၊ ပိန်းမ္မန ကျေးရွာအနီးတို့တွင် ယမန်နေ့အထိ တိုင်းရင်းသားလက်နက်ကိုင်တပ် တိုက်ပွဲ ဆက်လက်ဖြစ်ပွားနေသည်။
နေ့စဉ်ရက်ဆက်ဖြစ်ပွားသည့် ထိုတိုက်ပွဲကြောင့် လွယ်ဆာ၊ နောင်လျန်၊ နားပြိန်း၊ ကောင်းဟုန်း၊ နားပုံ နှင့် အနီးနားကျေးရွာတို့မှ ဒေသခံပြည်သူများ ထပ်မံထွက်ပြေးတိမ်းရှောင်ဖို့ ပြင်နေကြောင်း သိရသည်။
ပြီးခဲ့သည့် ဇန်နဝါရီ ၈ ရက်မှ စပြီး ကျောက်မဲ – သီပေါ မြို့နယ် အစပ်တွင် ဖြစ်ပွားခဲ့သည့် တိုင်းရင်းသားလက်နက်ကိုင် တိုက်ပွဲကြောင့် သီပေါ ဘော်ကြိုဘုရားကြီးကျောင်းတွင်လည်း စစ်ဘေးရှောင် (၃၀၀) ကျော် ရောက်ရှိခိုလှုံနေရသည်။
တိုက်ပွဲများ အမြန်ဆုံး ရပ်တန့်ပေးရန် စစ်ဘေးရှောင်ပြည်သူများ၊ သံဃာတော်များ၊ ဒေသခံတို့မှ အကြိမ်ကြိမ် မေတ္တာရပ်ခံ တောင်းဆိုမှုများ ပြုလုပ်ခဲ့ကြသော်လည်း တိုင်းရင်းသားအချင်းချင်း တိုက်ပွဲဖြစ်ပွားမှုက ရပ်တန့်နိုင်ချင်း မရှိသေးပေ။
