သျှမ်းမြောက် ကျောက်မဲမြို့နယ်တွင် တိုင်းရင်းသား လက်နက်ကိုင်ဖြစ်သည့် မြောက်ပိုင်းမဟာမိတ် တပ်ပေါင်းစုဖြစ်သည့် (TNLA ၊ SSPP/SSA)နှင့် RCSS/SSA တိုက်ပွဲဖြစ်ပွားမှုကြောင့် ဒေသခံ ရွာလုံးကျွတ်နီးပါး ထွက်ပြေးတိမ်းရှောင်နေရကြောင်း သတင်းသိရသည်။

“လွယ်ဆာရွာအနီးမှာ လက်နက်ကြီး ကျတယ်လို့ ကြားတယ်၊ လွယ်ဆာရွာက ဒီနေ့ တိုက်ပွဲတွေ ဖြစ်နေတဲ့ နေရာနဲ့ သိပ်မဝေးဘူး၊ လွယ်ဆာ၊ နောင်လျန်၊ ကောင်းဟုန်း၊ နားပြိန်းကျေးရွာတွေက တကြောထဲပဲ၊ ရွာကလူတွေ ထွက်ပြေးကြပြီ၊ ဘယ်သူမှ မရှိတော့ဘူး” ဟု ကျောက်မဲဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ကျောက်မဲမြို့၏ တောင်ဘက် ၇ မိုင်ခန့် ကွာဝေးသည့် ကောင်းဟုန်းကျေးရွာတွင်လည်း ဒေသခံ ၃ ပုံ ၁ ပုံခန့်သာ ကျန်ရှိတော့ကြောင်း သိရသည်။

“တိုက်ပွဲ ဖြစ်တဲ့ နေရာနဲ့ သိပ်မဝေးဘူး၊ မပြောနိုင်ဘူးလေ၊ တိုက်ပွဲက ဒီဘက်ရောက်လာနိုင်တယ်ဆိုတော့ ကြောက်လို့ ထွက်ပြေးကြတာပေါ့၊ ရွာမှာ အိမ်စောင့်တဲ့သူပဲ ကျန်တော့တယ်၊ ကျွဲနွားတွေ စောင့်ကြည့်ဖို့ပေါ့” ဟု ကောင်းဟုန်းကျေးရွာမှ မြို့ပေါ်သို စစ်ရှောင်လာသည့် အသက် (၆၀)ဝန်းကျင် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ယနေ့ (ဇန်နဝါရီ ၁၂)ရက် နံနက် ၉ ဝန်းကျင်မှ စပြီး ကျောက်မဲမြို့နှင့် (၇)မိုင်ခန့် ဝေးသည့် ချောင်းချောက်၊ ပိန်းမ္မန နှင့် နောင်အန်းကျေးရွာ အနီးတို့တွင် တိုင်းရင်းသားလက်နက်ကိုင်အချင်းချင်း တိုက်ပွဲဖြစ်ပွားခဲ့ကြောင်း၊ နေ့လည်ပိုင်းတွင် တိုက်ပွဲငြိမ်သွားပြီးနောက် ညနေပိုင်း ၅ နာရီဝန်းကျင်တွင် ကျောက်မဲအဝင် ခဲမွန်၊ ဗူးခါးနှင့် တိုးဂိတ်အနီးရှိ ပန်ဟုတ်ကျေးရွာအနီးတို့တွင် တိုက်ပွဲဆက်လက်ဖြစ်ပွားခဲ့ကြောင်း သိရသည်။

“ခုက နှမ်းတွေ စိုက်ထားတာ မရိတ်သိမ်းရသေးဘူး၊ အဒေါ်တို့ သျှမ်းတွေကတော့ ထမင်းစားလိုက် ထွက်ပြေးလိုက်နဲ့ ဘာစီးပွားရေးမှကို မဖြစ်တော့ဘူး၊ တစ်နေရာပြီး တစ်နေရာ ပြေးနေရတယ်” ဟု နားပြိန်းကျေးရွာမှ မြို့ပေါ်သို့ စစ်ရှောင်ထွက်ပြေးလာသည့် သက်ကြီး အမျိုးသမီးတစ်ဦးကလည်း ပြောသည်။

လက်ရှိတိုက်ပွဲဖြစ်ပွားနေသည့် နေရာအနီးတဝိုက်မှ ဒေသခံများသည့် ကျောက်မဲမြို့ပေါ်ရှိ ဆွေမျိုးအိမ်များနှင့် ရပ်ကွက်အချို့တွင် အိမ်ငှားနေထိုင်နေရကြောင်း သိရသည်။

ထို့အပြင် ပြီးခဲ့သည့် ဇန်နဝါရီ ၈ ရက်နေ့ ညပိုင်းက ကျောက်မဲ – သီပေါကြား ကျင်သီကျေးရွာအုပ်စုအနီး ဖြစ်ပွားသည့် တိုင်းရင်းသားလက်နက်ကိုင်အချင်းချင်း တိုက်ပွဲကြောင့် သီပေါမြို့နယ် ဘော်ကြိုဘုန်းကြီးကျောင်းဝန်းတွင်လည်း စစ်ဘေးရှောင်ပြည်သူ (၃၀၀)ကျော် ရောက်ရှိခိုလှုံနေကြောင်း သိရသည်။