သျှမ်းပြည်တောင်ပိုင်း မိုင်းကိုင်မြို့အတွင်းသို့ ယနေ့ (ဇန်နဝါရီ ၁၂)ရက် မွန်းလွဲပိုင်း ၃ နာရီဝန်းကျင်တွင် သျှမ်းပြည်တိုးတက်ရေးပါတီ၊ သျှမ်းပြည်တပ်မတော် SSPP/SSA တပ်သား ၃၀၀ ဝန်းကျင် ရောက်ရှိလာကြောင်း သတင်းသိရသည်။
“ပန်ကေတုဘက်နေ လာတာပါ၊ ကားတွေနဲ့ အင်အားက ၃၀၀ ဝန်းကျင်လောက်ရှိပါတယ်၊ သူတို့က မိုင်းကိုင်မြို့ အဝင် ဆိုင်းဘုတ်အနီးမှာ နားနေတာ တွေ့ရပါတယ်၊ ဘယ်ဘက်ကို ဆက်သွားလဲတော့ မသိရဘူး” ဟု မိုင်းကိုင်မြို့ ခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ယင်းကဲ့သို့ အင်အားများစွာရှိသည့် စစ်ကြောင်းကို မြင်လေ့မရှိသည့် မိုင်းကိုင်မြို့မှ ဒေသခံများအနေဖြင့် ထိတ်လန့်ပြီး တချို့က နေအိမ်များစွန့်ခွာကာ လဲချားဘက်သို့ တိမ်းရှောင်ထွက်ပြေးလာကြောင်း ဒေသခံ အမျိုးသားတစ်ဦးက ပြောသည်။
“ဒီလို နယ်မြေမငြိမ်မသက်ဖြစ်နေတဲ့အပေါ်မှာ စစ်သားတွေ ထပ်တွေ့လိုက်တော့ တိုက်ပွဲတွေထပ်ဖြစ်လာတော့မလား ဆိုပြီး ဒေသခံတချို့က ကြောက်ကြတယ်၊ အဲ့ကြောင့် လဲချားဘက်ကို ထွက်ပြေးလာတယ်၊ အခု လဲချားမြို့ တွင်းမှာ စစ်ရှောင်တွေနဲ့ ပြည့်နေတော့မယ်” ဟု ဒေသခံအမျိုးသားတစ်ဦးက ပြောသည်။
ယင်းကဲ့သို့ SSPP/SSA တပ်သားများ မြို့ရွာလမ်းမကြီးထက်အထိ တွေ့မြင်ရခြင်းနှင့် ပတ်သက်ပြီး SSPP/SSA ၏ ပြောရေးဆိုခွင့်ရှိသူ ဗိုလ်မှူး စိုင်းဖုန်းဟန်က သာမာန်ဖြစ်ရပ်ဖြစ်စဥ်များသာ ဖြစ်သည့်အတွက် ကြောက်စရာမလိုကြောင်း သျှမ်းသံတော်ဆင့်ကို ပြောသည်။
“ဒီနေ့ ကျနော်တို့တပ်သားတွေ မိုင်းကိုင်ဘက်ကို ရောက်သွားတယ်လို့ ကြားမိပါတယ်၊ ဒါပေမဲ့ကြောက်စရာ မလိုပါဘူး၊ ပြည်သူကိုလည်း ဘာမှ မထိခိုက်စေရဘူး၊ ဒါပေမဲ့ ပြည်သူတွေ ကြောက်နေတယ်ဆိုတာက အရင်က အဲ့ဒီ ဒေသအတွင်းမှာ ကျနော်တို့တပ်ဖွဲ့ကို မတွေ့ဖူးသေးလို့နေမှာပါ” ဟု ဗိုလ်မှူး စိုင်းဖုန်းဟန်က သျှမ်းသံတော်ဆင့်ကို ပြောသည်။
ပြီးခဲ့သည့် စက်တင်ဘာလကတည်းက စတင်ခဲ့သော မိုင်းကိုင်မြို့နယ်အတွင်းမှ တိုက်ပွဲနှင့် ပတ်သက်ပြီး ဆွေးနွေးညှိနှိုင်းရန်အတွက် သျှမ်းပြည်တိုးတက်ရေးပါတီ၊ သျှမ်းပြည်တပ်မတော်မှ တံခါးဖွင့် ကြိုဆိုနေကြောင်းလည်း ဗိုလ်မှူး စိုင်းဖုန်းဟန်က ပြောသည်။
ယနေ့ ဇန်နဝါရီ (၁၂)ရက်ထိ နှစ်ဘက် စစ်ရေးတင်းမာနေလျက်ရှိသည့် မိုင်းကိုင်မြို့အတွင်းမှ တိုင်းရင်းသား လက်နက်ကိုင်တို့၏ တိုက်ပွဲကြောင့် စစ်ရှောင်များ နေ့တိုင်းနီးပါးရောက်ရှိလာပြီး စားနပ်ရိက္ခာများ၊ ကလေး နို့မှုန့်များနှင့် ကိုဗစ် – ၁၉ ကာကွယ်ရေးပစ္စည်းများ အရေးပေါ် လိုအပ်နေကြောင်း သတင်းသိရသည်။
Leave a Comments