သျှမ်းမြောက် ကျောက်မဲ နှင့် သီပေါမြို့နယ် အကြား မန္တလေး – မူဆယ် ပြည်ထောင်စုလမ်းမကြီးအနီးတွင် တိုင်းရင်းသားလက်နက်ကိုင် အချင်းချင်း ထိတွေ့တိုက်ပွဲ နေ့စဉ်နီးပါး ဖြစ်နေကြောင်း သတင်းသိရသည်။
ကျောက်မဲနှင့် သီပေါမြို့နယ်အစပ် ဖြစ်သည့် ချောင်းချောက်၊ နောင်အန်း၊ ပိန်းမ္မန၊ ကြံခင်း၊ နမ့်အွမ်၊ ကျင်သီ ကျေးရွားအနီးနားတို့တွင် ပြီးခဲ့သည့် ရက်ပိုင်းက စပြီး တိုင်းရင်းသားလက်နက်ကိုင် အချင်းချင်း တိုက်ပွဲဖြစ်ပွားမှု နေ့စဉ်ရက်ဆက် ရှိနေကြောင်း သိရသည်။
“ဒီမနက်က ချောင်းချောက်၊ နောင်အန်းရွာနားမှာ ပစ်ခတ်သံတွေ ကြားတယ်၊ ကားတွေလည်း ခဏတော့ ရပ်စောင့်ကြတယ်၊ ပစ်ခတ်တာတွေ ရှိရင် လမ်း ပိတ်တယ်၊ ခုတော့ ကားတွေ ပုံမှန် ပြန်သွားနေပြီ၊ အသံလည်း ငြိမ်သွားပြီ၊ မနေ့ ညနေပိုင်းကတော့ လက်နက်ကြီးသံ ကြားသေးတယ်” ဟု လွယ်ခေါ်ကျေးရွာနေ ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် ဇန်နဝါရီ ၈ ရက်နေ့ ညပိုင်းက ကျောက်မဲ – သီပေါကြား သီပေါမြို့နယ် ကျင်သီကျေးရွာအုပ်စုအတွင်း တိုက်ပွဲပြင်းထန်ခဲ့ပြီး ခရီးသည်ယာဉ် ၂ စီးလည်း လက်နက်စ ထိမှန်ခဲ့သည်။
ထိုတိုက်ပွဲကြောင့် ဒေသခံပြည်သူများသည် သီပေါ ဘော်ကြိုဘုန်းကြီးကျောင်းသို့ ထွက်ပြေးတိမ်းရှောင်ခဲ့ပြီး ယမန်နေ့ (ဇန်နဝါရီ ၁၁) အထိ စစ်ဘေးရှောင်ပြည်သူ (၃၀၀)ကျော် ရှိခဲ့သည်။
“နောင်အန်းရွာကဆို လူသိပ်မရှိတော့ဘူး၊ မြို့ပေါ် အမျိုးအိမ်၊ အသိအိမ်တွေမှာ သွားနေကြတယ်၊ တချို့က ရှောင်နေတာ တပတ်ကျော်လောက် ရှိနေပြီ၊ ရွာကို မပြန်လာရဲသေးဘူး” ဟု ဒေသခံ အမျိုးသားတစ်ဦးကလည်း ပြောသည်။
ထို့အပြင် လက်ရှိ တိုင်းရင်းသား လက်နက်ကိုင်အချင်းချင်း တိုက်ပွဲဖြစ်ပွားနေသည့် နေရာနှင့် အနီးတဝိုက်တွင် ရှိသည့် နားပြိန်း၊ ကောင်းဟုန်း၊ လွယ်ဆာ နှင့် အခြားကျေးရွာမှ ဒေသခံများလည်း တိုက်ပွဲကူးစက်လာမည်ကို စိုးရိမ်သည့်အတွက် ကြိုတင်ထွက်ပြေး တိမ်းရှောင်နေကြကြောင်း သိရသည်။
