သျှမ်းတောင် မိုင်းကိုင်မြို့နယ် တိုက်ပွဲနှင့် နီးစပ်နေသည့် လဲချားမြို့နယ်ရှိ ကျေးရွာတချို့မှ ဒေသခံများသည် စားနပ်ရိက္ခာများကို မြို့ထဲသို့ ပို့ဆောင်သိမ်းဆည်းနေကြကြောင်း စုံစမ်းသိရှိရသည်။
လက်ရှိ တိုက်ပွဲဖြစ်ပွားနေသည့် မိုင်းကိုင်မြို့နယ်နှင့် နီးစပ်နေသည့် လဲချားမြို့နယ် တက်မောက်ကျေးရွာ၊ ဟိုလုမ်းကျေးရွာ၊ နမ့်လေကျေးရွာ တစ်ကြောသည် တိုက်ပွဲဖြစ်ပွားမည်ကို စိုးရိမ်သဖြင့် စားနပ်ရိက္ခာများ မြို့တွင်းသို့ သယ်ဆောင်သွားရခြင်းဖြစ်ကြောင်း တက်မောက်ကျေးရွာ ဒေသခံတစ်ဦးက ပြောသည်။
“ဒီ ၂ ရက် ၃ ရက်က အခြေနေ သိပ်မကောင်းဘူး။ ဘာလို့လဲဆိုတော့ ရွာဘက်ကဒေသခံတွေ ဆန်တွေ စားနပ် ရိက္ခာတွေ မြို့ထဲ သယ်သွားကြတယ်” ဟု တက်မောက်ကျေးရွာခံ အမျိုးသားတစ်ဦးက ပြောသည်။
မိုင်းကိုင်မြို့နယ်အတွင်း တိုင်ရင်းသား လက်နက်ကိုင်အချင်းချင်း တိုက်ပွဲကြောင့် မိုင်းကိုင်မြို့နှင့် (၁၅)မိုင်သာ ဝေးကွာသည့်အတွက် မိုင်းကိုင်မြို့ပေါ်ရှိ ဒေသခံများလည်း စိုးရိမ်နေကြကြောင်း သိရှိရသည်။
“လက်ရှိ ရိက္ခာတွေ သယ်နေတဲ့ ဒေသခံရွာတွေကလည်း မိုင်းကိုင်မြို့နယ်နဲ့ တအားနီးတယ်။ အဲ့တော့ တိုက်ပွဲဖြစ်လာမှာကို စိုးရိမ်ကြတယ်။ ဒီနေ့ပါရင် (၃)ရက်လောက်ရှိပြီ သယ်နေကြတာ။ မနေ့ကလည်း တစ်နေကုန်ပဲ နေ့ကော ညကော သယ်နေကြတာ” ဟု လဲချားဒေသခံအမျိုးသား တစ်ဦးက ပြောသည်။
မိုင်းကိုင်မြို့နယ်အတွင်း တိုက်ပွဲဖြစ်ပွားမှုကြောင့် စစ်ရှောင်တချို့လည်း လဲချားမြို့နယ်ရှိ ဆွေမျိုးများနေအိမ်သို့ လာရောက် ခိုလှုံသည့် သူများလည်းရှိကြောင်း သိရှိရသည်။
အလားတူ လက်နက်ကိုင်တိုက်ပွဲကြောင့် ကျေးသီးမြို့နယ်အတွင်းရှိ ဒေသခံတချို့သည် လဲချားမြို့နယ်အတွင်းသို့ လာရောက်အခြေချ နေထိုင်သည့် သူများလည်းရှိနေကြောင်း သိရှိရသည်။
Leave a Comments