သျှမ်းမြောက် ကျောက်မဲမြို့နယ်အတွင်း တိုင်းရင်းသားလက်နက်ကိုင်တိုက်ပွဲကြောင့် ထွက်ပြေးတိမ်းရှောင်ခဲ့သည့် စစ်ရှောင်(၄၀၀) ကျော်သည် သျှမ်းတောင် ရပ်စောက်မြို့နယ်သို့ ထပ်မံပြောင်းရွှေ့ တိမ်းရှောင်သွားကြောင်း သတင်းသိရသည်။
ဇန်နဝါရီလ ၂ ရက်တွင် ကျောက်မဲမြို့မှ စစ်ရှောင် (၄၀၀)ကျော်သည် သျှမ်းတောင် ရပ်စောက်မြို့နယ် ကျိုင်းခမ်းကျေးရွာအုပ်စုအတွင်းသို့ ပြောင်းရွှေ့ခဲ့တာဖြစ်ကြောင်း စစ်ရှောင်ကူညီသူများထံမှ သိရသည်။
“တချို့က ရပ်စောက်ဘက်ကို ပြောင်းသွားတယ်၊ အဓိကတော့ နေရပ်ပြန်ဖို့က စိတ်မချလို့၊ သူတို့အတွက် လုံခြုံမှု မရှိဘူးလို့ ပြောတာပဲ၊ စစ်ရှောင်စခန်းမှာ အလုပ်မရှိပဲ ရေရှည် နေမယ်ဆိုရင်လည်း အဆင်မပြေဘူး၊ နောက်တစ်ချက်က ကိုဗစ်ရောဂါကို ကြောက်တာပေါ့၊ လူအများစုဝေးပြီး နေရတာဆိုတော့ စိုးရိမ်ရတယ်လေ” ဟု စစ်ရှောင်များကို ကူညီပေးနေသည့် သျှမ်းစာပေနှင့်ယဉ်ကျေးမှုအသင်း ဥက္ကဌ လုံးလျန်းဟန် က သျှမ်းသံတော်ဆင့်ကို ပြောသည်။
ထို စစ်ရှောင်များသည် ရပ်စောက်မြို့နယ် ကျိုင်းခမ်းကျေးရွာအုပ်စုအတွင်းရှိ ဧက ၅၀၀ ခန့် ရှိသည့် မြေကွက်ပေါ်တွင် ယာယီတဲထိုးပြီး စုပေါင်း နေထိုင်နေတာဖြစ်ကြောင်း စိုင်းအောင်မြင့် က ဆိုသည်။
“နေရာသစ်ပြောင်းချင်တဲ့သူတွေ ရှိတယ် ဆိုတော့ ဝိုင်းဝန်းပြီးကူညီပေးလိုက်တာပါ၊ နေရာ ယာယီပြောင်းလိုက်တဲ့ သဘောပါပဲ၊ သူတို့ လုပ်ကိုင်စားသောက်ဖို့ လွယ်သွားတာပေါ့၊ ဆရာတော်တွေ ဦးဆောင်ပြီး တခြားတာဝန်ရှိသူတွေ ပူးပေါင်း ကူညီပေးတာပါ၊ ယာယီနေဖို့ နေရာနဲ့ စိုက်ပျိုးဖို့ရော နေရာတချို့တော့ ရှိတယ်၊ ရေရှည်နေဖို့အတွက်တော့ မဟုတ်ဘူး၊ ခုက ယာယီနေဖို့ တဲတွေ ထိုးထားပေးတယ်လို့တော့ သိရတယ်” ဟု စစ်ရှောင်များကို ကူညီပေးသူ စိုင်းအောင်မြင့် က ပြောသည်။
ပြီးခဲ့သည့် ရက်ပိုင်းက သျှမ်းပြည် သံဃာနှင့်ပြည်သူ ငြိမ်းချမ်းရေးပူးပေါင်းဆောင်ရွက်ရေးကော်မတီမှ ကျောက်မဲ သျှမ်းစာပေနှင့်ယဉ်ကျေးမှုမြေနေရာတွင် ရောက်ရှိခိုလှုံနေသည့် စစ်ဘေးရှောင်များအား လာရောက်တွေ့ဆုံဆွေးနွေးခဲ့ကြောင်း သိရသည်။
“သွားတွေ့တာ ဟုတ်ပါတယ်၊ တွေ့ပြီးတော့ သူတို့ ဘယ်လိုဖြစ်ချင်လဲ ဆိုတာတွေကို ဆွေးနွေးကြတာပါ၊ နေရပ်ပြန်ချင်ရင်လည်း ပြန်နိုင်အောင် ကူညီပေးမယ်၊ နောက်တစ်ခုက တစ်ခြားနေရာသစ်မှာ သွားနေမယ် ဆိုရင်လည်း တတ်နိုင်သလောက် ကူညီပေးမယ်လို့ ပြောခဲ့တယ်၊ ဘယ်နေရာကို ပြောင်းပါ၊ ဘယ်မှာနေပါ ဆိုတာတွေကိုတော့ မပြောခဲ့ရဘူး၊ ခု ရပ်စောက်ဘက် ပြောင်းတယ် ဆိုတာလည်း အခြေနေ အသေးစိတ်ကို မသိရသေးဘူး” ဟု သျှမ်းပြည် သံဃာနှင့်ပြည်သူ ငြိမ်းချမ်းရေး ပူးပေါင်းဆောင်ရွက်ရေး ကော်မတီမှ အရှင် ခေမိဿရ က မိန့်ပါတယ်။
ထိုပြောင်းရွှေ့သွားသည့် စစ်ရှောင်များမှာ ကျောက်မဲမြို့နယ် ဟူးဆွန်နှင့် ပုံးလုံကျေးရွာအုပ်စုမှ ဒေသခံအများစု ဖြစ်ပြီး ထပ်မံပြောင်းရွှေ့ရန် ပြင်ဆင်နေသည့် စစ်ရှောင်များလည်း ရှိသေးကြောင်း သိရသည်။
“ဖြစ်နိုင်ရင်တော့ တိုက်ပွဲကို မဖြစ်စေချင်တော့ဘူး၊ ထိုးစစ်ဆင်နေတာတွေ၊ ပစ်ခတ်နေတာတွေကို မလုပ်စေချင်တော့ပါဘူး၊ ပြည်သူတွေ နေရပ်ပြန်နိုင်ဖို့ကို စဉ်းစားပေးစေချင်တယ်၊ ပြည်သူကို စောင့်ရှောက်ပေးကြဖို့ လေးလေးနက်နက်တောင်းဆိုပါတယ်” ဟု အရှင် ခေမိဿရ က မိန့်ကြားလိုက်သည်။
လက်ရှိ ကျောက်မဲမြို့ပေါ်တွင် စစ်ဘေးရှောင် ၄၀၀ ကျော် ကျန်ရှိနေဆဲဖြစ်ကြောင်း သိရသည်။
