သျှမ်းပြည်တောင်ပိုင်း မိုင်းကိုင်မြို့နယ် ဟိုနားကျေးရွာအုပ်စုအတွင်း တိုင်းရင်းသားလက်နက်ကိုင်များ စစ်ရေးတင်းမာမှုကြောင့် ဒေသခံများ ထွက်ပြေးတိမ်းရှောင်နေကြောင်း စုံစမ်းသိရှိရသည်။
ပြီးခဲ့သည့် ဒီဇင်ဘာ (၂၉)ရက်မှ စတင်ပြီး မိုင်းကိုင်မြို့နယ် ဟိုနားကျေးရွာအုပ်စုအတွင်း တိုင်းရင်းသား လက်နက်ကိုင်အချင်းချင်း တိုက်ပွဲဖြစ်ပွားခဲ့ပြီး လက်ရှိအချိန်ထိ စစ်ရေးတင်းမာနေဆဲဖြစ်သဖြင့် ဒေသခံပြည်သူများ ဆက်လက် ထွက်ပြေးတိမ်းရှောင်နေရကြောင်း သတင်းရရှိသည်။
လက်ရှိတွင် မိုင်းကိုင်မြို့နယ် ဟိုနားကျေးရွာအုပ်စုအတွင်းရှိ ကျေးရွာ (၇)ရွာမှ ဒေသခံများသည် မိုင်းကိုင်မြို့ပေါ်သို့ ထွက်ပြေးတိမ်းရှောင်နေရသည်။
“နှစ်ဖက် စစ်ရေးက အရမ်းတင်းမာနေတော့ ကြိုတင်ပြီး ရှောင်ထားတာတွေရှိတယ်။ ခုနက ဒေသခံတွေရဲ့ ပစ္စည်းတွေ ထော်လဂျီပေါ် သယ်လာတာ (၇)စီး (၈)စီးလောက်ရှိပြီ။ တိုက်ပွဲပြင်းထန်လာမှာကို အရမ်းစိုးရိမ်ကြတယ်။ ဟိုနားကျေးရွာအုပ်စုထဲတော့ ရွာတိုင်းနီးပါး ထွက်ပြေးတိမ်းရှောင်ထားတယ်လို့ သိရတယ်” ဟု မိုင်းကိုင်ဒေသခံ အမျိုးသားတစ်ဦးက ပြောသည်။
ဟိုနားကျေးရွာအုပ်စုသည် မိုင်းကိုင်မြို့နှင့် (၁၅)မိုင်ခန့်သာ ကွာဝေးသဖြင့် မြို့တွင်းထဲထိ တိုက်ပွဲဖြစ်ပွားလာမည်ကို ဒေသခံများ စိုးရိမ်နေကြကြောင်း စုံစမ်းသိရှိရသည်။
“မြို့နဲ့လဲ (၁၅)မိုင်လောက်ပဲ ဝေးတော့တယ်။ မြို့ထဲက သူတွေလဲ စိတ်ပူကြတယ်။ တိုက်ပွဲတွေ မြို့တွင်းထဲထိ ဖြစ်လာမှာကို စိုးရိမ်ကြတယ်။ လက်နက်ကိုင်တွေလဲ မြို့ရဲ့အနီးဝန်းကျင်မှာ ရှိနေကြတယ်လို့ သိရတယ်” ဟု စစ်ရှောင်များ လာရောက်နားခိုသည့် မွေတော်ကျောင်းအနီးမှာ နေထိုင်သည့် အမျိုးသမီးတစ်ဦးက ပြောသည်။
ဇန်နဝါရီ (၂)ရက်နေ့အထိ မိုင်းကိုင်မြို့ပေါ်ရှိ စစ်ရှောင် (၁၅၀၀) ကျော်သည် မွေတော်ကျောင်း (တောင်ကျောင်း)၊ နားလုံဘုန်းကြီးကျောင်း၊ လွယ်လိုင်ဘုန်းကြီးကျောင်း၊ ကျောင်းခမ်းဘုန်းကြီးကျောင်း၊ ဝိန်းငင်းဘုန်းကြီးကျောင်း မြို့လယ်ဓမ္မာရုံ၊ မြို့ပေါ်ရှိ ဆွေမျိုးအိမ်များအပြင် တပေါင်းပွဲလုပ်သည့် နေရာ၊ ညောင်ပင်အောက်များတွင်လည်း လာရောက်နေထိုင်ကြရကြောင်း စုံစမ်းသိရှိရသည်။
“မနေ့ နဲ့ ဒီနေ့တော့ တိုက်ပွဲဖြစ်တာ မကြားရဘူး။ ဒါပေမယ့် ဒေသခံတွေတော့ မပြန်ရဲသေးဘူး။ စစ်ရေးတင်းမာနေသေးတဲ့အချိန်ဖြစ်လို့ ပြန်ရင်လဲ ဘယ်ချိန် တိုက်ပွဲပြန်ဖြစ်မယ်ဆိုတာ မသိရဘူး” ဟု ထွက်ပြေးတိမ်းရှောင်လာသည့် စစ်ရှောင်အမျိုးသား တစ်ဦးက ပြောသည်။
ယနေ့ (ဇန်နဝါရီ ၄ ရက်)ထိ မိုင်းကိုင်မြို့ပေါ်သို့ ထွက်ပြေးလာသည့် စစ်ရှောင်စာရင်း အတိအကျ မသိရှိရသေးပေ။
သျှမ်းပြည်အတွင်း တိုင်းရင်းသားလက်နက်ကိုင် အချင်းချင်းကြားဖြစ်ပွားသည့် တိုက်ပွဲကြောင့် သျှမ်းပြည်လူထု ထောင်ချီသည် နေရပ်ကို စွန့်ခွာပြီး ထွက်ပြေးနေရကြောင်း သိရသည်။
သျှမ်းပြည်အတွင်းရှိ တိုင်းရင်းသား လက်နက်ကိုင်တော်လှန်ရေး အဖွဲ့အစည်းများအကြား ဖြစ်ပွားနေသည့် စစ်ပွဲများနှင့် မြန်မာနိုင်ငံနေရာအနှံအပြားတွင် ဖြစ်ပွားနေသည့် စစ်ပွဲများ ရပ်တန့်နိုင်ရေး နည်းလမ်းရှာဖွေကာ တိုင်းရင်းသားပြည်သူအပေါင်း လိုလားတောင့်တသည့် ဖက်ဒရယ်ဒီမိုကရေစီ ပြည်ထောင်စု တည်ဆောင်နိုင်ရေး စုပေါင်းဆောင်ရွက်ကြရန် ရှမ်းပြည်ညီညွတ်ရေးကော်မတီ (CSSU)မှ ဇန်နဝါရီ ၁ ရက်နေ့တွင် ထုတ်ပြန်ချက် ထုတ်ခဲ့သည်။
သို့သော်လည်း သျှမ်းပြည်အတွင်းတွင် တိုင်းရင်းသားလက်နက်ကိုင်အချင်းချင်း ယနေ့ချိန်ထိ စစ်ရေးတင်မားမှု ရှိနေသေးကြောင်း သိရသည်။
