သျှမ်းပြည်တောင်ပိုင်း မိုင်းကိုင်မြို့နယ်အတွင်း တိုင်းရင်းသားလက်နက်ကိုင်တိုက်ပွဲ အချင်းချင်းကြောင့် ဒေသခံ (၁၅၀၀)ကျော် ထွက်ပြေးတိမ်းရှောင်ရကြောင်း စုံစမ်းသိရှိရသည်။
မိုင်းကိုင်မြို့နယ် ဟိုနားကျေးရွာအုပ်စု ဟွေ့နွဲ့ကျေးရွာနှင့် ဟိုနားကျေးရွာတို့ အနီးတွင် တိုင်းရင်းသားလက်နက်ကိုင် အချင်းချင်းတိုက်ပွဲကြောင့် ကျေးရွာဒေသခံများ မိုင်းကိုင်မြို့ပေါ်သို့ ထွက်ပြေးတိမ်းရှောင်လာရကြောင်း မိုင်းကိုင်ဒေသခံ အမျိုးသားတစ်ဦးက ပြောသည်။
“မနေ့ကအထိ စစ်ရှောင် (၁၅၀၀)ကျော် ရှိတယ်။ တိုက်ပွဲနေရာက မြို့နဲ့ (၆) မိုင်လောက်ပဲဝေးတယ်။ အစားအသောက် နဲ့ ဆေးဝါးတွေတော့ လိုအပ်တယ်” ဟု မိုင်းကိုင်ဒေသခံ အမျိုးသားတစ်ဦးက ပြောသည်။
ဇန်နဝါရီ (၂)ရက်နေ့အထိ မိုင်းကိုင်မြို့ပေါ်ရှိ စစ်ရှောင် (၁၅၀၀)ကျော်သည် မွေတော်ကျောင်း (တောင်ကျောင်း)၊ နားလုံဘုန်းကြီးကျောင်း၊ လွယ်လိုင်ဘုန်းကြီးကျောင်း၊ ကျောင်းခမ်းဘုန်းကြီးကျောင်း၊ ဝိန်းငင်းဘုန်းကြီးကျောင်း၊ မြို့လယ်ဘုန်းကြီးကျောင်းနှင့် မြို့ပေါ်ရှိ ဆွေမျိုးအိမ်များတို့တွင် နေထိုင်နေရကြောင်း သိရသည်။
“တိုက်ပွဲက နေ့တိုင်းနီးပါး ဖြစ်နေတယ်။ ဘယ်အဖွဲ့တွေလည်းတော့ မသိရဘူး။ ပြောင်းတွေ စပါးတွေလည်း အကုန်မယူရသေးဘူး” ဟု စစ်ရှောင် အမျိုးသားတစ်ဦးက ပြောသည်။
သျှမ်းပြည်အတွင်းရှိ တိုင်းရင်းသား လက်နက်ကိုင်တော်လှန်ရေး အဖွဲ့အစည်းများအကြား ဖြစ်ပွားနေသည့် စစ်ပွဲများနှင့် မြန်မာနိုင်ငံနေရာအနှံအပြားတွင် ဖြစ်ပွားနေသည့် စစ်ပွဲများ ရပ်တန့်နိုင်ရေး နည်းလမ်းရှာဖွေကာ တိုင်းရင်းသားပြည်သူအပေါင်း လိုလားတောင့်တသည့် ဖက်ဒရယ်ဒီမိုကရေစီပြည်ထောင်စုတည်ဆောင်နိုင်ရေး စုပေါင်းဆောင်ရွက်ကြရန် ရှမ်းပြည်ညီညွှတ်ရေးကော်မတီ (CSSU)မှ ဇန်နဝါရီ ၁ ရက်နေ့တွင် ထုတ်ပြန်ချက် ထုတ်ခဲ့သည်။
သျှမ်းပြည်နေ တိုင်းရင်းသားလူမျိုးစု အားလုံး၏ ကိုယ်စားပြုသည့် ကိုယ်စားလှယ်များ စုပေါင်းရေးဆွဲသည့် သျှမ်းပြည် ဖွဲ့စည်းပုံအခြေခံဥပဒေ ပေါ်ပေါက်ရန်လိုအပ်ကြောင်း CSSU ၏ အတွင်းရေးမှူးချုပ် စိုင်းလိတ် က သျှမ်းသံတော်ဆင့် ကို ပြောသည်။
“သျှမ်းပြည်နယ် ဖွဲ့စည်းပုံ အခြေခံဥပဒေ ပေါ်ပေါက်ရေးအပေါ်မှာ အားလုံး လာရောက်ပြီးတော့မှ ပါဝင်ဆွေးနွေးကြဖို့ ဖြစ်တယ်။ အဲ့လို ပါဝင်ဆွေးနွေးနေရင်းနဲ့ နိုင်ငံရေးအရ ကျေလည်မှု ရသွားတာနဲ့ စစ်ရေးအရ တိုက်ခိုက်မှုတွေ ရပ်တန့်နိုင်လိမ့်မယ်လို့ ကျနော်တို့ မျှော်လင့်ယုံကြည်ထားပါတယ်။ နိုင်ငံရေးအရ ဆွေးနွေးနေရင်းနဲ့ စစ်ရေးအရ ပြေလည်စေမယ့် နည်းလမ်းကို ချဉ်းကပ်မှာ ဖြစ်ပါတယ်” ဟု စိုင်းလိတ်က ပြောသည်။
ပြီးခဲ့သည့် စက်တင်ဘာလမှ စတင်ကာ မိုင်းကိုင်မြို့နယ်အတွင်း တိုင်းရင်းသားလက်နက်ကိုင်အချင်းချင်း တိုက်ပွဲကြောင့် ဒေသခံအများအပြား ထွက်ပြေးတိမ်းရှောင်ခဲ့ရကြောင်း သိရသည်။
