သျှမ်းပြည်တောင်ပိုင်း မိုင်းကိုင်မြို့နယ်အတွင်း တိုင်းရင်းသား လက်နက်ကိုင်များကြား စစ်ရေးတင်းမာမှုကြောင့် စစ်ရှောင် (၇၀၀)ကျော် ယနေ့ထိ နေရပ်သို့ မပြန်နိုင်သေးကြောင်း စုံစမ်းသိရှိရသည်။
ထို စစ်ရှောင်များသည် မိုင်းကိုင်မြို့နယ် ဝိန်းငင်းဘုန်းကြီးကျောင်းတွင် (၁၆၀)ကျော်၊ ဟမ်းငိုင်းကျေးရွာအုပ်စုရှိ ကုန်းစုံဘုန်းကြီးကျောင်းတွင် (၂၆၀)ကျော်နှင့် ပန်ကေတုကျေးရွာအတွင်း ကုန်းလိုင်းဒေသခံ စစ်ရှောင် (၂၈၀)ကျော် ကျန်ရှိနေကြောင်း သိရသည်။
“ကျမတို့ ရောက်လာတာ (၂)ပတ်ရှိတော့မယ်။ ခုထိ မပြန်ရဲသေးဘူး။ နှစ်ဘက်စစ်ရေး တင်းမာနေသေးတယ်။ လက်နက်သံတွေလည်း တစ်ချက်တစ်ချက် ကြားနေရသေးတယ်” ဟု ဝိန်းငင်းစစ်ရှောင်စခန်းက အမျိုးသမီး တစ်ဦး က ပြောသည်။
ပန်ကေတုကျေးရွာအတွင်း ကုန်းလိုင်းဒေသခံ စစ်ရှောင် (၂၈၀)ကျော်သည် လက်ရှိတွင် ပန်ကေတုကျေးရွာ ဒေသခံများ၏ ဂိုဒေါင်များ၊ ခြံဝန်းများအတွင်းတွင် တဲထိုးပြီး နေထိုင်လျက်ရှိကြောင်း သိရသည်။
“ကျနော်တို့ ရောက်တာ (၂)လကျော်ပြီ၊ ခုချိန်ထိတော့ မပြန်ရဲသေးဘူး။ စစ်ရေးတင်းမာတာတွေရှိတယ်” ဟု ပန်ကေတုကျေးရွာတွင် ရောက်ရှိနေသည့် စစ်ရှောင်အမျိုးသားတစ်ဦးက ပြောသည်။
မိုင်းကိုင်မြို့နယ်အတွင်း တိုင်းရင်းသားလက်နက်ကိုင် အချင်းချင်း တိုက်ပွဲကြောင့် (၄)လကျော် ကာလအတွင်း စစ်ရှောင်များ ထောင်ချီ ထွက်ပြေးတိမ်းရှောင်ခဲ့ရပြီး လက်ရှိအချိန်ထိ နေရပ်သို့ မပြန်နိုင်သေးပေ။
Leave a Comments