သျှမ်းမြောက် ကျောက်မဲမြို့နယ် ပုံးလုံကျေးရွာဒေသခံ အမျိုးသားတစ်ဦးသည် ပြီးခဲ့သည့် အောက်တိုဘာတွင် မိုင်းနင်းမိခဲ့ပြီး ထိုမိုင်းထိဒဏ်ရာကြောင့် ခြေတစ်ဖက် ဖြတ်လိုက်ရကြောင်း သတင်းသိရသည်။
ထို အမျိုးသားမှာ အသက် (၅၆)နှစ်ရှိ ဦးစံညွန့်ဖြစ်ပြီး လက်ရှိတွင် ကျောက်မဲဆေးရုံ အရိုးကုဆောင်တွင် ဆေးကုသမှု ဆက်လက်ခံယူနေကြောင်း သိရသည်။
“ညာဘက် ဒူးအောက်ကနေ ဖြတ်လိုက်ရတာ၊ မန္တလေးမှာ သွားဖြတ်ပြီး ကျောက်မဲကို ပြန်သယ်လာတာ၊ လောလောဆယ် ကျောက်မဲဆေးရုံ အရိုးဆောင်မှာ ထားထားတယ်၊ ဆေးတွေဘာတွေ ထည့်ဖို့ လိုသေးတယ်လေ၊ ကျန်းမာရေးတော့ ကောင်းတယ်” ဟု ကျောက်မဲမြို့နယ် ကြက်ခြေနီသူနာပြုတပ်ဖွဲ့မှ ဒုတပ်ဖွဲ့ခွဲမှူး ဆရာမ လွေးဥမ္မာက သျှမ်းသံတော်ဆင့်ကို ပြောသည်။
ဦးစံညွန့်သည် ပြီးခဲ့သည့် အောက်တိုဘာလ (၁၄)ရက်တွင် ကျောက်မဲ − မိုင်းငေါ့လမ်း နမ့်မန်းကျေးရွာအနီး ချောင်းအတွင်း ခရုဆင်းကောက်စဥ် မိုင်းနင်းမိကာ ဒဏ်ရာရရှိခဲ့ပြီးနောက် ဟူးဆွန်ကျေးလက်ဆေးခန်းတွင် ဆေးကုသနေခဲ့တာဖြစ်ကြောင်း သိရသည်။
ထိုချိန်က ဟူးဆွန်ကျေးရွာအုပ်စုအနီး တိုင်းရင်းသားလက်နက်ကိုင်တပ်အကြား တိုက်ပွဲပြင်းထန်နေသည့်အတွက် ကျောက်မဲဆေးရုံသို့ လာရောက်ကုသရန် အခက်အခဲဖြစ်သဖြင့် ရက် (၂၀)ကြာမှ ကျောက်မဲဆေးရုံသို့ ရောက်ရှိလာခဲ့တာဖြစ်ကြောင်း ဒေသခံ တစ်ဦးက ပြောသည်။
အဆိုပါ မိုင်းထိဒဏ်ရာရရှိထားသည့် အမျိုးသား ဆေးကုသမှုခံယူနိုင်ရန်အတွက် ကျောက်မဲ ကြက်ခြေနီတပ်ဖွဲ့မှ သွားရောက်သယ်ယူကာ မန္တလေးဆေးရု့သို့ ပို့ဆောင်ကူညီပေးခဲ့တာဖြစ်ကြောင်း သိရသည်။
“ဒီလ ၄ ရက်နေ့က ကျမတို့အဖွဲ့ သွားသယ်လာခဲ့တာ၊ သယ်လာပြီး ကျောက်မဲဆေးရုံကနေတစ်ဆင့် မန္တလေးဆေးရုံကြီးကို အဲ့နေမှာပဲ ချက်ချင်း သွားပို့ခဲ့တယ်၊ အဲ့ချိန် သူ့ခြေထောက်ဒဏ်ရာက အရမ်းကို ဆိုးရွားနေပြီလေ” ဟု ဆရာမ လွေးဥမ္မာက ပြောသည်။
အထက်ပါ အမျိုးသား မိုင်းနင်းမိခဲ့သည့် နမ့်မန်းကျေးရွာအနီးတွင် ပြီးခဲ့သည့် (၂)လဝန်းကျင်ကလည်း ဒေသခံများ မိုင်းနင်းမိကာ (၃)ဦး ဒဏ်ရာရရှိခဲ့ပြီး (၁)ဦး သေဆုံးခဲ့သည်။
ထို့အပြင် ပြီးခဲ့သည့် နိုဝင်ဘာ (၁၃)ရက်နေ့က နောင်ဗြစ်ကျေးရွာ ဒေသခံ အမျိုးသမီးမှာလည်း လက်ဖက်ခြံသို့ သွားစဥ် မိုင်းနင်းမိမှုကြောင့် နားထင် မိုင်းစထိမှန် ဒဏ်ရာရရှိခဲ့ပြီး လက်ရှိမှာ ကျောက်မဲဆေးရုံတွင် ဆေးကုသမှု ခံရယူနေကြောင်း သိရသည်။
ကျောက်မဲမြို့နယ်အတွင်း မိုင်းထိ ဒဏ်ရာရရှိခြင်း၊ ဆေးကုသရန် အခက်ခဲကြုံနေခြင်းနှင့် ခြေတုလက်တု တပ်ဆင်ရန် အကူအညီများ လိုအပ်နေပါက ကျောက်မဲ ကြက်ခြေနီသူနာပြုတပ်ဖွဲ့မှ ဒုတပ်ဖွဲ့ခွဲမှူး ဆရာမ လွေးဥမ္မာ (ဖုန်းနံပါတ် 09 96355 0001)သို့ ဆက်သွယ်ကာ အကူအညီ တောင်းခံနိုင်ကြောင်း သိရသည်။
Leave a Comments