ထိုင်းနိုင်ငံ ချင်းမိုင်မြို့နယ်အတွင်း တရားမဝင် ဝင်ရောက်လာခဲ့သည် မြန်မာရွှေ့ပြောင်းအလုပ်သမားများကို ကိုဗစ် ၁၉ ကာကွယ်ဆေး အခမဲ့ ထိုးနှံပေးမည်ဖြစ်ကြောင်း စုံစမ်းသိရှိရသည်။

ထိုကိုဗစ် ၁၉ ကာကွယ်ဆေးကို အစိုးရဆေးရုံများတွင် အခမဲ့ ထိုးနှံပေးသွားမည်ဖြစ်ပြီး ထိုင်းနိုင်ငံတွင်း နေထိုင်ခွင့် လက်မှတ်မရှိသူများလည်း ရွှေ့ပြောင်းအလုပ်သမားအရေး ဆောင်ရွက်ပေးနေသည့်အဖွဲ့အစည်းများက ဝင်ရောက်ညှိနှိုင်းပေးပြီး ဆေးထိုးနိုင်ရန် ဆောင်ရွက်သွားမည်ဖြစ်ကြောင်း သိရသည်။

“ပုံမှန်ဗီဇာရှိတဲ့သူတွေကတော့ အေးဆေးလာထိုးလို့ရတယ်။ ဒါပေမဲ့ ဗီဇာတွေ လက်မှတ်တွေမရှိတဲ့သူကတော့ သက်ဆိုင်ရာတာဝန်ရှိသူတွေကနေ စစ်ဆေးပေးပြီး ဆေးထိုးပေးသွားဖို့ရှိတယ်။ လက်မှတ်မရရှိသေးတဲ့သူတွေလည်း ရတယ်။ ဗီဇာလုပ်ဖို့ လျှောက်ထားတဲ့သူတွေပေါ့နော်” ဟု ရွှေ့ပြောင်းသမားများ ကိုဗစ် ၁၉ ကာကွယ်ဆေးထိုးနိုင်ရန်အတွက် ကူညီပေးနေသည့် MAP ၏ FM 99 Radio ဒါရိုက်တာ စိုင်းဆိုင်မိဏ်း မိဏ်းကွဏ်း က သျှမ်းသံတော်ဆင့်ကို ပြောသည်။

ထိုင်းနိုင်ငံအတွင်း နေထိုင်သည့်သူများအနေဖြင့် ကိုဗစ် – ၁၉ ကာကွယ်ဆေး ထိုးနှံထားခြင်းမရှိပါက မြို့တွင်းသွားလာမှု ခက်ခဲလာနိုင်ကြောင်း သိရသည်။

“တကယ်လို့မထိုးရင်တော့ ကိုဗစ်ကို မကာကွယ်နိုင်ဘူး။ နောက်ဆိုရင် ရဲတွေကလည်း ကိုဗစ် ကာကွယ်ဆေးထိုးပြီးပြီလား လို့ စစ်လာနိုင်တယ်။ မထိုးထားဘူးဆိုရင် အလုပ်လုပ်ပိုင်ခွင့်တွေ၊ သွားလာမှုတွေက ခက်ခဲမှုရှိလာနိုင်တယ်” ဟု MAP ၏ FM 99 Radio ဒါရိုက်တာ စိုင်းဆိုင်မိဏ်း မိဏ်းကွဏ်းက ပြောသည်။

ချင်းမိုင်မြို့အတွင်းတွင် ယနေ့ နိုဝင်ဘာ ၈ ရက်နေ့ထိ ကိုဗစ် ၁၉ ပိုးတွေ့လူနာ (၂၀၀၁၁)ဦးရှိပြီး လက်ရှိဆေးကုသမှု ခံယူနေသူ (၄၇၉၀)ဦးနှင့် သေဆုံးသူ (၇၂)ဦး ရှိနေကြောင်း သိရသည်။

ချင်းမိုင်မြို့တွင်း တရားမဝင်နေထိုင်နေသည့် ရွှေ့ပြောင်းအလုပ်သမားများအနေဖြင့် ကိုဗစ် ၁၉ ကာကွယ်ဆေး ထိုးနှံလိုပါက MAP ၏ FM 99 Radio (053328134) (053328130) သို့ ဆက်သွယ်စုံစမ်းပြီး ထိုးနှံနိုင်ကြောင်း သိရသည်။