သျှမ်းမြောက် ကျောက်မဲမြို့နယ် ကြူရှော(တောင်)ရွာအနီးတွင် ယနေ့ (နိုဝင်ဘာ ၁)ရက် မနက် ၈နာရီဝန်းကျင်က (၃)နှစ် ကလေးငယ် အပါအဝင် ဒေသခံ (၃)ဦး မိုင်းနင်းမိပြီး ထိခိုက်ဒဏ်ရာများ ရရှိခဲ့ကြောင်း စုံစမ်းသိရသည်။
ယနေ့ မနက်ပိုင်း ၈ နာရီ ဝန်းကျင်တွင် လယ်တောသို့ သွားသည့် ကြူရှော(တောင်)ရွာ ရွာသားတစ်ဦးနှင့် ကြူရှော (ကုန်းသာ)တွင် နေထိုင်သည့် သားအဖ (၂)ဦး တို့သည် မိုင်းနင်းမိကာ ဒဏ်ရာပြင်းထန်စွာ ရရှိသဖြင့် လားရှိုးဆေးရုံသို့ ပို့ဆောင်လိုက်ကြောင်း သတင်းရရှိသည်။
“အမျိုးသားတစ်ယောက်က စပါးရိတ်ဖို့ လယ်ကိုသွားရင်း မိုင်းနင်းမိတာ၊ ဖြစ်တာကတော့ ကြူရှော (တောင်) ရွာ ရဲ့ တောင်ဘက်မှာပါ၊ သူက ညာဘက် လက်မောင်းနဲ့ ခြေထောက်မှာ ဒဏ်ရာရသွားတယ်” ဟု ဒေသခံ တစ်ဦး က သျှမ်းသံတော်ဆင့်ကို ပြောသည်။
ထိုနည်းတူ ကြူရှော (ကုန်းသာ)နေ သားအဖ နှစ်ဦးမှာလည်း ထိုကျေးရွာမှ ကျောက်မဲမြို့တွင်းသို့ ဆင်းလာချိန် မိုင်းနင်းမိတာဖြစ်ကြောင်း သိရသည်။
“သားအဖက ရွာကနေ ကျောက်မဲကို ဆင်းလာမယ့်အချိန် မိုင်းနင်းမိတာလို့ ကြားတယ်၊ အဖေဖြစ်သူက ညာဘက် ခြေကျင်းဝတ်မှာ ဒဏ်ရာရတယ်၊ (၃)နှစ်သား ကလေးက တင်ပါးမှာ ထိသွားတယ်” ဟု ဒေသခံ တစ်ဦးက ပြောသည်။
လက်ရှိတွင် အဆိုပါ မိုင်းနင်းမိ ဒဏ်ရာရှိသူ ၃ ဦးကို ကျောက်မဲ နမ့်ခုံးရှမ်းများပရဟိတအသင်းနှင့် ပူးပေါင်းအဖွဲ့တို့က သွားရောက်သယ်ဆောင်ပေးခဲ့ပြီး ကျောက်မဲဆေးရုံမှ တစ်ဆင့် လားရှိုးဆေးရုံသို့ ပို့ဆောင်လိုက်ပြီဖြစ်ကြောင်း သိရသည်။
သျှမ်းပြည်မြောက်ပိုင်း ကျောက်မဲမြို့နယ်တွင် တိုင်းရင်းသားလက်နက်ကိုင်တပ်ဖွဲ့များအပြင် စစ်ကောင်စီလက်အောက်ခံ တပ်များလည်းရှိပြီး ထိုနယ်မြေအတွင်း မြေမြုပ်မိုင်းအသုံးပြုမှုကြောင့် ဒေသခံ အရပ်သားများ မကြာခဏ မိုင်းနင်းမိကာ ထိခိုက်သေဆုံးခဲ့ရကြောင်း၊ ထို့အပြင် မြေမြုပ်မိုင်းကြောင့် ခြေထောက်ဖြတ်လိုက်ရသူများလည်း ရှိနေကြောင်း သိရသည်။
