သျှမ်းပြည်မြောက်ပိုင်း မူဆယ်ခရိုင် ပန်ဆိုင်းမြို့နယ်အတွင်းတွင် တိုက်ပွဲဖြစ်ပွားနေမှုကို အခွင့်ကောင်းယူပြီး တရုတ်တို့က နယ်မြေကျူးကျော် ခြံစည်းရိုးခတ်ယူမှုများ ဆက်တိုက်ပြုလုပ်နေကြောင်း စုံစမ်းသိရသည်။
ပန်ဆိုင်းမြို့နယ်အတွင်းသို့ တရုတ်ဘက်မှ အောက်တိုဘာ (၂၀)ရက်နေ့ကစပြီး နယ်မြေကျူးကျော်လာခဲ့ခြင်းဖြစ်ပြီး လက်ရှိတွင် နမ့်ယန်းချောင်းတစ်လျှောက် ခြံစည်းရိုးခတ်ယူမှု ပြီးစီးသလောက်ဖြစ်နေကြောင်း ပန်ဆိုင်း ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“သူတို့စပြီး လာခတ်ကတည်းက ရွာသူရွာသားတွေ ပန်ဆိုင်းအုပ်ချုပ်ရေးမှူးကို သွားပြောပေမဲ့ အုပ်ချုပ်ရေးမှူးက ဘာမှ မလုပ်ပေးဘူး၊ ခုတော့ ဒီပန်ဆိုင်း နယ်စပ် ဝမ်းတိန်နားက နမ့်ယန်းချောင်းတစ်လျှောက် ခတ်လိုက်တာ ပြီးသွားပြီ” ဟု ပန်ဆိုင်းရွာခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
တရုတ်တို့ နယ်မြေကျူးကျော် ခြံစည်းရိုးခတ်ယူမှုများကို ရွားများအနေဖြင့် သွားရောက်ကန့်ကွက်မှုများ ပြုလုပ်လို သော်လည်း ဒေသတွင်း ဖြစ်ပွားနေသည့် တိုက်ပွဲများကြောင့် မလုပ်ဆောင်နိုင်ခဲ့ကြောင်းလည်း အထက်ပါ အမျိုးသားက ပြောသည်။
“ပြည်သူတွေ တိုက်ပွဲကို ရှောင်ရတိမ်းရ ဖြစ်နေချိန်မှာ သူတို့က နယ်မြေကျူးကျော်ပြီး ခြံစည်းရိုးခတ်ယူတာပေါ့၊ သွားကန့်ကွက်ဖို့ဆိုလည်း တရုတ်တွေကျူးကျော်မှုလာတဲ့နေရာ မရောက်ခင် တိုက်ပွဲတွေကဖြစ်နေတော့ သေနတ် လာမှန်မှာလည်း ကြောက်နေရတယ်” ဟု ၎င်းက ပြောသည်။
ယင်းကဲ့သို့ တရုတ်ဘက်မှ ကျူးကျော်ခြံခတ်သည့်ကိစ္စကို ပန်ဆိုင်းမြို့နယ် အုပ်ချုပ်ရေးမှူးထံ သွားရောက်တင်ပြသော်လည်း ဖြေရှင်းပေးခြင်းမရှိကြောင်း ဒေသခံများက ပြောသည်။
“ကျနော်တို့ဘက်ကို တရုတ်တွေက နယ်မြေကျူးကျော်မှုလုပ်နေတယ်လို့ ပန်ဆိုင်းကျေးရွာအုပ်ချုပ်ရေးမှူးကို တင်ပြတယ်။ ဘာမှလာမဖြေရှင်းပေးဘူး။ လာလည်းမကြည့်ပေးဘူး၊ သူက မသိသလိုပဲနေနေတာ” ဟု မန့်မိုင်ကျေးရွာ ဒေသခံတစ်ဦးက ပြောသည်။
စစ်တပ်မှ နိုင်ငံတော်အာဏာသိမ်းယူပြီးနောက်ပိုင်း တရုတ်နိုင်ငံနှင့် နယ်စပ်ဖြစ်သည့် ကျေးရွာဒေသများတွင် တရုတ်တို့က နယ်မြေကျူးကျော်လာပြီး ခြံစည်းရိုးပိုမိုခတ်လာခဲ့ကြောင်း သိရသည်။
