သျှမ်းပြည်မြောက်ပိုင်း မူဆယ်ခရိုင် ပန်ဆိုင်းမြို့နယ် မုံကိုးမြို့ တွင် ကိုးကန့်တပ်မတော် (MNDAA) နှင့် စစ်ကောင်စီ တို့ တိုက်ပွဲကြောင့် ပြည်သူတစ်ဦး ကျည်ထိသေဆုံးသွားခဲ့ရကြောင်း စုံစမ်းသိရှိရသည်။
ယမန်နေ့ အောက်တိုဘာ (၁၇) နေ့လည် ၃ နာရီ ဝန်းကျင်က စစ်ကောင်စီ နှင့် ကိုးကန့်တပ်မတော် (MNDAA) တို့က တိုက်ပွဲဖြစ်ပွားခဲ့ပြီး သက်ကြီးဒေသခံ အမျိုးသား တစ်ဦး သေဆုံးခဲ့ကြောင်း သိရသည်။
“မနေ့က တိုက်ပွဲဖြစ်ပြီး လူတစ်ယောက် သေသွားတယ်။ သူက အိုနေပြီလေ။ ကျည်စ ထိမှန်ပြီး သေသွားတာ။ တိုက်ပွဲက တော်တော်ပြင်းတယ်။ မနေ့က သူတို့တိုက်ပွဲဖြစ်တာ ၁ နာရီလောက်ရှိတယ်။ ဆက်တိုက်ဖြစ်နေတာ” ဟု ပန်ဆိုင်းမြို့ ဒေသခံတစ်ဦး က ပြောသည်။
ယမန်နေ့တွင် တိုက်ပွဲဖြစ်ပွားပြီးနောက်ပိုင်း ည (၈)နာရီ ဝန်းကျင်တွင် ကိုးကန့်တပ်မတော် (MNDAA)တို့က ပန်ဆိုင်းမြို့နယ် ရဲစခန်းကို ထပ်မံသွားပစ်ခတ်ခဲ့ကြောင်း သိရသည်။
“ည ၈ နာရီကျတော့ သူတို့ ရဲစခန်းကို ထပ်လာပစ်သွားတယ်။ ထိခိုက်သူတော့ မရှိဘူးလို့ကြားတယ်။ ဒါပေမဲ့ ပျက်ဆီးမှုတွေတော့ရှိတယ်။ နေ့လည်ကဖြစ်ပြီးတော့ ည ၈ နာရီမှာ ထပ်တခါ ရဲစခန်းကို လာပစ်တာပါ” ဟု ဒေသခံတစ်ဦးက ပြောသည်။
ကိုးကန့်တပ်မတော် (MNDAA) နှင့် စစ်ကောင်စီ တိုက်ပွဲကြောင့် ပန်ဆိုင်းဒေသခံ ၂ ဦး၊ မုံးကိုးဒေသခံ ၁၁ ဦး၊ ဖောင်းဆိုင် ၄ ဦး စုစုပေါင်း (၁၇)ဦးတို့ ဒဏ်ရာရရှိခဲ့ကြောင်း သိရသည်။
သျှမ်းမြောက် ပန်ဆိုင်းမြို့နယ်ဘက်တွင် စစ်ကောင်စီ နှင့် ကိုးကန့်တပ်မတော် (MNDAA)၊ ကချင်လွတ်မြောက်ရေး တပ်မတော် KIA တို့ တိုက်ပွဲဖြစ်ပွားနေကြတာဖြစ်ကြောင်း သိရသည်။
