မိုင်းကိုင်မြို့နယ်ထိ စစ်ရှောင်ထွက်ပြေးခဲ့သည့် ကျောက်မဲစစ်ရှောင်များ သျှမ်းတောင် လဲချားမြို့နယ်တွင် အခြေချ နေထိုင်ရန် ပြင်ဆင်နေကြောင်း သတင်းရရှိသည်။
ပြီးခဲ့သည့် ဇူလိုင်လ က ကျောက်မဲမြို့နယ်အတွင်း တိုင်းရင်းသားလက်နက်ကိုင်များဖြစ်သည့် RCSS/SSA နှင့် တပ်ပေါင်းစုတို့ တိုက်ပွဲပြင်းထန်ခဲ့မှုကြောင့် ဒေသခံထောင်ချီ စစ်ရှောင်ထွက်ပြေးခဲ့ရပြီး ကျောက်မဲ၊ မိုင်းငေါ့မြို့တို့အပြင် အခြားမြို့နယ် ဆွေမျိုးများရှိရာသို့ စစ်ရှောင်ခိုလှုံနေရသူများလည်း ရှိခဲ့ကြောင်း သိရသည်။
“သူတို့က ကျောက်မဲဘက်ကနေ စစ်ရှောင်ခဲ့တာ၊ (၇)လပိုင်းကတည်းက မိုင်းကိုင်ဘက်ကို ရောက်နေ တာလို့ ပြောတယ်၊ ခုက လဲချားမြို့နယ် ဝမ်ဟိုင်ကျေးရွာအုပ်စုထဲမှာ အခြေချနေထိုင်နိုင်ဖို့ ပြင်ဆင်ပေး နေတာ” ဟု အဆိုပါ စစ်ရှောင်များကိုကူညီနေသည့် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ထိုစစ်ရှောင်များ အခြေချနေထိုင်ရန် သျှမ်းဧကရီကုမ္ပဏီမှ မြေနေရာလှူဒါန်းပေးထားတာဖြစ်ပြီး လဲချားမြို့ သံဃာ့နာယက ဟွေရင်ကျောင်းဆရာတော်၊ ဗဟိုသံဃာ့ဝန်ဆောင် ဟော်ခမ်းကျောင်း ဆရာတော်နှင့် ဝမ်ဟိုင်ကျေးရွာမှ တာဝန်ရှိသူတို့ ပူးပေါင်းကာ ယာယီတဲများ ဆောက်လုပ်ပေးနေကြောင်း သိရသည်။
“ခုက သူတို့ ယာယီနေထိုင်ဖို့ တဲလုပ်ပေးနေတာ၊ လူဦးရေက (၇၀)ကျော် ရှိတယ်၊ နောက်ထပ်လည်း တိုးလာနိုင်သေးတယ်” ဟု အထက်ပါ အမျိုးသမီးက ဆိုသည်။
အဆိုပါစစ်ရှောင်များ ယာယီနေထိုင်နိုင်ရန်အတွက် တဲများ ဆောက်လုပ်ရာတွင် သွပ်၊ ဝါး၊ အိုးခွက်ပန်းကန်၊ အိမ်သာတွေ အပြင် သောက်သုံးရေအတွက် အဝီစိတွင်းတူးရန်နှင့် ရေပိုက်များလည်း လိုအပ်နေတာဖြစ်ကြောင်း ၄င်းက ပြောသည်။
သျှမ်းပြည် ကျောက်မဲနှင့် မိုင်းကိုင်မြို့နယ်တို့တွင် တိုင်းရင်းသားလက်နက်ကိုင်တိုက်ပွဲကြောင့် စစ်ရှောင် ထောင်ချီရှိနေပြီး အများစုမှာ ကလေးနှင့် အမျိုးသမီးများသာဖြစ်ကြောင်း သိရှိရသည်။
Leave a Comments