သျှမ်းတောင် မိုင်းကိုင်မြို့နယ် ကိုဗစ်-၁၉ ကူးစက်ခံရသည့် မွေးဖွားစ စစ်ရှောင်အမျိုးသမီးတစ်ဦးသည် ကလေးမွေးဖွားပြီး (၂)နာရီအကြာ သေဆုံးခဲ့ကြောင်း စုံစမ်းသိရသည်။
မိုင်းကိုင်မြို့နယ် ယနေ့ (အောက်တိုဘာ ၁၄)ရက် ကိုဗစ်-၁၉ ကူးစက်ခံထားရသည့် မွေးဖွားစ စစ်ရှောင်အမျိုးသမီးတစ်ဦးသည် ကလေးမွေးဖွားပြီး (၂)နာရီအကြာ နေ့လည် ၁နာရီခွဲကျော်တွင် သေဆုံးသွားကြောင်း သတင်းရရှိသည်။
အဆိုပါ မွေးဖွားစ စစ်ရှောင်အမျိုးသမီးသည် အသက် (၂၉)နှစ်အရွယ်သာရှိပြီး မိုင်းကိုင်မြို့နယ် တုံလောကျေးရွာအုပ်စု၊ ပန်ပွဲကျေးရွာတွင်နေထိုင်သည့်သူဖြစ်ပြီး၊ သျှမ်းတပ် (၂)တပ် တိုက်ပွဲကြောင့် မိုင်းကိုင်မြို့ ရပ်ကွက်(၅) ပန်ကတ်တွင် စစ်ဘေးရှောင် လာသည့် သူဖြစ်သည်။
“သူက (မွေးဖွားစ ကိုဗစ်-၁၉ အမျိုးသမီး) မနက် ၁၁နာရီခွဲမှာ ကလေးမွေးတယ်။ ကလေးကို ရိုးရိုးပဲ မွေးတာ။ နေ့လည် ၁နာရီခွဲမှာ မိခင်ဆုံးသွားတယ်”ဟု မိုင်းကိုင် ပရဟိတ လုပ်ဆောင်နေသည့် အမျိုးသားတစ်ဦးက သျှမ်းသံတော်ဆင့်ကို ပြောသည်။
ထိုမွေးဖွားစ အမျိုးသမီးသည် ကိုယ်ဝန်(၈)လရှိပြီး ကိုဗစ်-၁၉ ကူးစက်ခံထားရသည့် သူဖြစ်ကာ ပန်ကတ်တွင် ဆေးကုသနေစဉ် မသက်သာသဖြင့် မိုင်းကိုင်မြို့နယ် ပြည်သူ့ဆေးရုံသို့ ခေါ်ဆောင်လာခဲ့ရကြောင်း သိရသည်။
လက်ရှိမှာ မိခင်ဖြစ်သူဆုံးပါးသွားခဲ့ရပြီး ကလေးငယ်မှာ ကိုဗစ်-၁၉ ကူးစက်ခံရမှု ရှိ၊ မရှိမသိရသေးကြောင်း၊ မွေးကင်းစ ကလေးငယ်သည် (၆)ပေါင်ရှိကြောင်း လည်း ပရဟိတ အမျိုးသား က ပြောသည်။
“ကလေးကတော့ ကိုဗစ်-၁၉ ကူးစက်၊ မကူးစက်တော့ မသိရသေးဘူး။ ကလေး ကတော့ (၆)ပေါင်ရှိတယ်လို့ ကြားတယ်”ဟု ၎င်း က ဆိုသည်။
ယနေ့ (အောက်တိုဘာ ၁၄)ရက် တွင် မိုင်းကိုင်မြို့နယ် အတွင်း ကိုဗစ်-၁၉ အတည်ပြု လူနာသစ် (၃)ဦး တွေ့ရှိပြီး သေဆုံးသူ တစ်ဦးရှိကြောင်းသိရသည်။
မိုင်းကိုင်မြို့နယ်တွင် ကိုဗစ်-၁၉ အတည်ပြုလူနာ စုစုပေါင်း (၁၁၅)ဦး၊ သေဆုံးသူ (၃)ဦး နှင့် ကုသနေသူ (၁၀)ဦးရှိကြောင်းသိရသည်။
ထိုမိုင်းကိုင်မြို့နယ် သျှမ်းတပ် (၂)တပ် တိုက်ပွဲကြောင့် စစ်ရှောင် ထောင်ချီ ရှိပြီး၊ ကိုယ်ဝန်ဆောင် မိခင်များ၊ လမ်းတွင် မီးဖွားစ မိခင်များလည်းရှိကြောင်းသိရသည်။
Leave a Comments