သျှမ်းပြည်တောင်ပိုင်း မိုင်းကိုင်မြို့နယ် စစ်ရေး တင်းမာမှု ဆက်လက်ရှိနေသဖြင့် နေရပ်မပြန်နိုင် သေးသည့် စစ်ရှောင်များအတွက် စောင်အထူများ လိုအပ်ကြောင်း စုံစမ်းသိရှိရသည်။
မိုင်းကိုင်မြို့နယ် ပန်ကေတုကျေးရွာအုပ်စု နှင့် ဟမ်းငိုင်းကျေးရွာအုပ်စု တို့မှာ ကျေးရွာပေါင်း (၂၀) ခန့် ထွက်ပြေးခဲ့ရပြီး စစ်ရှောင် (၃၂၀၀) ကျော် ရှိထားကြောင်းသိရသည်။
“ဆောင်းဝင်လာပြီဆိုတော့ ဒီနေ့မနက် တော်တော်အေးလာတယ်။ စစ်ရှောင်တွေ အိမ်မပြန်ရသေးရင် စားစရာတွေအပြင် စောင်အထူတွေလည်း လိုအပ်လာမယ်။ ကွင်းပြင်က မိုးကာတဲအောက်မှာ နေရတာဆိုတော့ ပိုအေးမှာပဲ” ပန်ကေတု ကျေးရွာစစ်ရှောင် ကော်မတီ ဝင် တစ်ဦး က သျှမ်းသံတော်ဆင့် ကိုပြောသည်။
လက်ရှိချန်ထိ သျှမ်းတပ် (၂) တပ် စစ်ရေးတင်းမာမှုကြောင့် ဒေသခံများ နေရပ်သို့ မပြန်နိုင်သေးကြောင်း သိရှိရသည်။
“ပြီးခဲ့တဲ့ (၃) ရက် (၄) ရက်က ပြန်သွားတဲ့ သူတွေက ဟိုခဲကျေးရွာအုပ်စုက ဒေသခံတွေပဲ။ အဲ့ဘက်တော့ တိုက်ပွဲတော့ ငြိမ်သွားပြီလို့ ပြောလို့ရတာပေ့ါ။ ခုကျန်နေတဲ့ စစ်ရှောင်တွေက ပန်ကေတုကျေးရွာအုပ်စုထဲက ကျေးရွာတွေ နဲ့ ဟမ်းငိုင်းကျေးရွာအုပ်စုထဲက ကျေးရွာတွေ ဖြစ်တယ်” ဟု စစ်ရှောင်များကို ကူညီပေးနေသူ တစ်ဦး ကပြောသည်။
ပန်ကေတုကျေးရွာမှာ စစ်ရှောင်များ (၂၂၃၃) ဦးရှိထားပြီး ဟမ်းငိုင်းကျေးရွာမှာ စစ်ရှောင် (၉၈၈) ဦး ရှိထားကြောင်း သိရှိရသည်။
မိုင်းကိုင်မြို့နယ်အတွင်း သျှမ်းတပ် (၂) တပ်တိုက်ပွဲကြောင့် စစ်ရှောင်များ စက်တင်ဘာ (၁၄) ရက်မှစပြီး ထွက်ပြေးတိမ်းရှောင်ခဲ့ရသဖြင့် တစ်လနီးပါး ရှိပေမယ့် စစ်ရှောင်များ နေရပ်သို့ မပြန်နိုင်သေးပေ။
တိုက်ပွဲတွင်း လက်နက်ကြီးထိမှန်ပြီး တစ်ဦး သေဆုံးကာ ၃ ဦး ဒဏ်ရာ ရရှိခဲ့ခြင်း၊ မြေမြုပ်မိုင်း (၂) ဦး နင်းမိပြီး ထိခိုက်ဒဏ်ရာ ရရှိခဲ့သူများလည်း ရှိခဲ့ကြောင်းသိရသည်။
Leave a Comments