သျှမ်းပြည်အရှေ့ပိုင်း မိုင်းဆတ်မြို့နယ်တွင် မိုးအဆက်မပြတ်ရွာသွန်းမှုကြောင့် တောင်မြေပြိုကျရာ လမ်းဆောက်လုပ်ရေးအလုပ်သမား ၃ ဦး မြေပိမိသေဆုံးကြောင်းသိရသည်။
ဇူလိုင်လ ၂၇ ရက်နေ့က မိုင်းဆတ်နှင့် မိုင်းကုတ်မြို့အကြား ၀မ့်လွယ်ဆောဝ်ရွာအနီးတွင် ၃ နေရာမြေပြိုကျရာ လမ်းဆောက်လုပ်ရေးအလုပ်သမားများနေထိုင်သည့်တဲများပေါ်သို့ လည်း မြေပြိုကျပိမိသဖြင့် သေဆုံးမှုများ ရှိခဲ့ခြင်းဖြစ်သည်။
“အလုပ်သမားနားနေတဲ့နေရာမှာပြိုကျတယ်။ ၃ ယောက် ပိမိသေဆုံးတယ်။ သူတို့အလောင်းတွေကို လမ်းဦးစီးဌာနက ပြန်ရှာတယ်။ ဇူလိုင် ၂၈ ရက်မှာ ပြန်လည်တွေ့ရှိပါတယ်။ အဲ့နေ့မှာရှင်းလင်းပြီးတော့မှဘဲ ကားတွေသွားလာနိုင်တယ် ။ သေဆုံးသွားတဲ့့ ၃ ယောက်က ယောက်ကျားတွေချည်းချည်းဘဲ။ ပြည်မ ကနေလာပြီးအလုပ်လုပ်တဲ့သူတွေဖြစ်ပါတယ် ”- ဟု မိုင်းဆတ်ဒေသခံ စိုင်းဆု ကပြောသည်။
ဇူလိုင်လအတွင်း မိုးအဆက်မပြတ်ရွာသွန်းမှုကြောင့် မိုင်းဆတ်မြို့နယ် နမ့်ကုတ်ချောင်းရေကြီးကာ ဆိုင်းခေါင်ရွာ၊ ၀မ့်မိုင်ပန်ဟိုင်းရွာသားများ၏ လယ်ယာမြေဧက ရ၀ ကျော်ပျက်စီးဆုံးရှုံးခဲ့ရကြောင်း သိရသည်။ အလားတူ သျှမ်းပြည်မြောက်ပိုင်း တောင်ပိုင်းတချို့တို့တွင်လည်း မိုးသည်းရေကြီးမှုများကြောင့် လယ်ယာမြေနှင့်ဒေသတွင်းလူထုတော်တော်များများ ရေဘေးကြုံခဲ့ရသည် ။
Leave a Comments