(၁) လနီးပါး ထွက်ပြေးလာသည့် စစ်ရှောင်တစ်ချို့ နေရပ်သို့ ပြန်သွား

0

သျှမ်းပြည်တောင်ပိုင်း မိုင်းကိုင်မြို့နယ်အတွင်းရှိ စစ်ရှောင်များအချို့ နေရပ်သို့ ပြန်သွားပြီဖြစ်ကြောင်း စုံစမ်းသိရှိရသည်။

ပုံစာ- နေရပ်ပြန်ရန် ပြင်ဆင်နေသည့် စစ်ရှောင်များ

စက်တင်ဘာ (၁၄) ရက်နေ့ကတည်းက သျှမ်းတပ် (၂) တပ်တိုက်ပွဲကြောင့် ဟိုခဲကျေးရွာအုပ်စုရှိ ဒေသခံများ ထွက်ပြေးတိမ်းရှောင်ခဲ့ရကြောင်း သိရှိရသည်။

“မနေ့တော့ တစ်နေ့လုံး လက်နက်သံတွေ မကြားရတော့ဘူး။ ဒီနေ့တော့ မပြောတတ်သေးဘူး။ ဟိုခဲကျေးရွာအုပ်စုထဲက ကျေးရွာ တွေ အများကြီး ပြန်သွားကြပြီ သူတို့လာတာလဲ တစ်လ ရှိတော့မယ် အဲ့ကြောင့် သူတို့လဲ ပြန်ချင်နေကြပြီ” ဟု စစ်ရှောင်များကို ကူညီပေးနေသည့် ကော်မတီဝင် တစ်ဦး ကပြောသည်။

လက်ရှိ မိုင်းကိုင်မြို့နယ်အတွင်း စစ်ရှောင်များ (၃၀၀၀) ကျော် ကျန်ရှိနေပြီး ၎င်းတို့သည် ဟမ်းငိုင်းကျေးရွာအုပ်စုမှာ (၁၀၀၀) ခန့် နှင့် ပန်ကေတု ကျေးရွာအုပ်စုမှာ (၂၁၀၀) ကျော်ခန့် ရှိနေသေးကြောင်း စုံစမ်းသိရှိရသည်။

“၃ ထောင်ကျော်လောက်တော့ ကျန်သေးတယ်။ ဟိုခဲကျေးရွာအုပ်စုထဲက တိုက်ပွဲတွေ ငြိမ်သွားပြီ။ နောက်ဆုံးလာဖြစ်တာက ပန်ကေတုမှာပဲ လာဖြစ်တော့တာ” ဟု ပန်ကေတု က စစ်ရှောင်ကူညီပေးသူ တစ်ဦးကပြောသည်။

အောက်တိုဘာ (၉) ရက်နေ့က စပြီး ဟိုခဲကျေးရွာအုပ်စု နှင့် ဟမ်းငိုင်းကျေးရွာအုပ်စုထဲ အတွင်းရှိ ကျေးရွာတစ်ချို့ စစ်ဘေးတိမ်းလာသည့် ဒေသခံများ နေရပ် ပြန်သွားကြပြီဖြစ်သည်။

“တိုက်ပွဲနဲ့ မနီးတဲ့ ကျေးရွာ တစ်ချို့တွေတော့ အိမ်အခြေနေကို ပြန်ကြည့်ကြတယ်။ ဒီ ၂ ရက် ၃ ရက်အတွင်းတော့ တိုက်ပွဲ ကြီးကြီးမားမားတော့ မရှိဘူး။ စစ်ရေးတင်းမာတာတွေတော့ ရှိတယ်။ တိုက်ပွဲတော့ ငြိမ်နေသေးတယ်”ဟု RCSS ၏ပြောရေးဆိုခွင့်ရှိသူ ဒုဗိုလ်မှူး ခမ်းစံ က သျှမ်းသံတော်ဆင့် ကိုပြောသည်။

သျှမ်းတပ် (၂) တပ် တိုက်ပွဲကြောင့် မိုင်းကိုင်မြို့နယ်အတွင်းရှိ ဟိုခဲကျေးရွာအုပ်စု ဟမ်းငိုင်းကျေးရွာအုပ်စု ပန်ကေတုကျေးရွာအုပ်စု ရှိ ဒေသခံများ (၅၀၀၀) ကျော် နေရပ်သို့ ထွက်ပြေးတိမ်းရှောင်ခဲ့ရသည်။

တိုက်ပွဲကြောင့် ဒေသခံများ လက်နက်ကြီး (၄) ဦးထိမှန်ပြီး တစ်ဦး သေဆုံးခြင်း၊ ခြံအတွင်း မြေမြုပ်မိုင်း နင်းမိပြီး (၂) ဦး ဒဏ်ရာ ရရှိခဲ့ခြင်း များ ရှိခဲ့သည်။

Leave a Comments