သျှမ်းပြည်တောင်ပိုင်း မိုင်းကိုင်မြို့နယ်အတွင်းရှိ အရပ်သား သွားလာသည့်နေရာထိ မြေမြုပ်မိုင်းများ လာရောက်ထောင်ထားသည့်အတွက် စစ်ရှောင်ပြည်သူများ နေရပ်ပြန်ပါက မိုင်းအခြေအနေကို စိုးရိမ်နေကြကြောင်း စုံစမ်းသိရသည်။
အောက်တိုဘာ (၅) ရက်နေ့က ဟမ်းငိုင်းကျေးရွာအုပ်စု နော်ဆိုင်ကျေးရွာရှိ လိမ္မော်ခြံအတွင်း အမျိုးသား (၂) ဦးမြေမြုပ်မိုင်း နင်းမိသည့်အတွက် စစ်ရှောင်များသည် နေရပ်သို့ ပြန်လျှင် မိုင်းအန္တရာယ်ကို စိုးရိမ်နေကြကြောင်း စစ်ရှောင်များက ဆိုသည်။
“ကျမတို့ မပြန်ရဲသေးဘူး။ မြေမြုပ် လည်း ကြောက်ရတယ်။ လက်နက်ကြီး ကျမှာလည်း ကြောက်နေရတယ်” ဟု ဟမ်းငိုင်းကျေးရွာက အသက် (၂၅) နှစ်အရွယ် အမျိုးသမီး တစ်ဦးကပြောသည်။
မိုင်းကိုင်မြို့နယ်အတွင်းရှိ ကျေးရွာဒေသခံများ ခြံအတွင်း မြေမြုပ်မိုင်းနင်းမိခြင်းသည် ယခုမှ ရှိခဲ့ဖူးခဲ့ကြောင်း ဒေသခံများက ပြောဆိုကြသည်။
“စစ်ရှောင်တွေ ပြန်သွားရင်လည်း သူတို့ခြံတွေ တောင်ယာတွေ သွားချိန်မှာ မြေမြုပ်မိုင်း တွေ နင်းမိမှာ စိုးရိမ်နေတယ်။ မြေမြုပ်မိုင်းနဲ့ ပတ်သက်ပြီး အသိပညာပေးတွေ ရှိဖို့ လိုအပ်နေတယ်” ဟု ဟမ်းငိုင်း စစ်ရှောင် ကော်မတီဝင် တစ်ဦး ကပြောသည်။
လက်ရှိ မိုင်းကိုင်မြို့နယ်အတွင်း သျှမ်းတပ် (၂) တပ် တိုက်ပွဲများ တင်းမာနေပြီး စစ်ရှောင်များလည်း နေ့စဉ်နှင့် အမျှ နေရပ်သို့ ထွက်ပြေးတိမ်းရှောင်နေရကြောင်း စုံစမ်းသိရှိရသည်။
မိုင်းကိုင်မြို့နယ်အတွင်း လှုပ်ရှားနေသည့် လက်နက်ကိုင်တပ်ဖွဲ့များသည် မြေမြုပ်မိုင်းကို စတင်အသုံးပြုလာကြပြီး၊ တိုက်ပွဲပြီးသွားပါက မိမိတပ်ဖွဲ့ထောင်ထားသည့် မိုင်းကို ရှင်းလင်းသွားခြင်းမရှိသည့်အတွက် ပြည်သူများသာ ခံနေရကြောင်း လူ့အခွင့်အရေး နှင့် ပတ်သက်ပြီး ဆောင်ရွက်နေသည့် အမျိုးသမီး တစ်ဦးကဆိုသည်။
မြေမြုပ်မိုင်း အသုံးပြုမှုကို နိုင်ငံတကာ ပိတ်ပင်တားဆီးထားသော်လည်း မြန်မာနိုင်ငံဟာ မြေမြုပ်မိုင်း အများဆုံး အသုံးပြုသည့် နိုင်ငံတစ်နိုင်ငံဖြစ်ကြောင်း သိရှိရသည်။
လက်ရှိ မိုင်းကိုင်မြို့နယ်တွင်း ဖြစ်ပွားသော တိုင်းရင်းသား လက်နက်ကိုင် တိုက်ပွဲကြောင့် စစ်ရှောင်များ ပန်ကေတုကျေးရွာအုပ်စု ၊ ဟမ်းငိုင်းကျေးရွာအုပ်စု ၊ ဝိန်းငင်းဘုန်းကြီးကျောင်း စသည့် ဘေးလွတ်ရာသို့ ထွက်ပြေးတိမ်းရှောင်နေကြရသည်။
Leave a Comments