မိုင်းကိုင်မြို့နယ်အတွင်း စစ်ရှောင် (၅၀၀၀) ကျော်ထိရှိလာ

0

သျှမ်းပြည်တောင်ပိုင်း မိုင်းကိုင်မြို့နယ်အတွင်း စစ်ရှောင်များ (၅၀၀၀) ကျော်ရှိပြီး ကိုဗစ်-၁၉ ကာကွယ်ရေးသုံး ပစ္စည်း နှင့် အသိပညာပေးများ အရေးပေါ် လိုအပ်နေကြောင်း စုံစမ်းသိရှိရသည်။

ထိုစစ်ရှောင်များသည် မိုင်းကိုင်မြို့နယ် ပန်ကေတုကျေးရွာအုပ်စုမှာ (၃၆၀၀) ကျော် ရှိပြီး၊ ဟမ်းငိုင်းကျေးရွာအုပ်စုမှာ (၁၂၀၀) ကျော်ရှိပြီး ၊ ဝိန်းငင်းဘုန်းကြီးကျောင်း (၁၀၀)ကျော် ၊ လမ်ဘေး တစ်ချို့မှာ တဲဖြင့် လာဆောက်ထားသည့် ဒေသခံ (၁၅၀) ကျော် နှင့် မိုင်းကိုင်မြို့တွင်းရှိ ဆွေမျိုး အသိမိတ်ဆွေအိမ်များဖြင့် သွားရောက်ခိုလှုံထားသည့် သူများလည်း ရှိကြောင်း စုံစမ်းသိရှိရသည်။

“ခု စစ်ရှောင်တွေ လာနေတဲ့ ပန်ကေတုကျေးရွာမှာ ကိုဗစ်-၁၉ အတည်ပြု လူနာ တစ်ဦးရှိသွားပြီ။ အဲ့ကြောင့် အရမ်းစိုးရိမ်ရတယ်။ ကိုဗစ်-၁၉ အသိပညာပေးလည်း အရမ်းလိုအပ်နေတယ်။ပြီးတော့ ကာကွယ်ရေးသုံးပစည်းတွေလည်း လိုအပ်နေတယ်” ဟု စစ်ရှောင်ကူညီပေးနေသည့် ကော်မတီဝင် တစ်ဦးကပြောသည်။

အောက်တိုဘာ (၄) ရက်နေ့က ပန်ကေတုကျေးရွာမှာ အမျိုးသမီး တစ်ဦး ကိုဗစ်-၁၉ အတည်ပြု လူနာ တစ်ဦးတွေ့ရှိခဲ့ကြောင်း တာဝန်ရှိသူထံမှ သိရှိရသည်။

“သူက ဟိုခဲကျေးရွာက ဒေသခံဖြစ်တယ်။ သူနဲ့ ထိတွေတဲ့သူတွေ စစ်ဆေးကြည့်တော့ ပိုးမတွေ့ရဘူး။ ခု မိုင်းကိုင် ပြည်သူ့ဆေးရုံမှာ ဆေးကုသမှု ခံယူနေတယ်” ဟု ပန်ကေတု စစ်ရှောင်စခန်း ကော်မတီ တစ်ဦး ကပြောသည်။

လက်ရှိ မိုင်းကိုင်မြို့နယ်တွင်းရှိ စစ်ရှောင်စခန်းများသည် မီးဖိုချောင်သုံး အခြေခံ စားနပ်ရိကာများလည်း လိုအပ်နေကြောင်း သိရှိရသည်။

စက်တင်ဘာ (၁၄) ရက်နေ့က စတင်ပြီး သျှမ်းတပ် (၂) တပ် တိုက်ပွဲကြောင့် မိုင်းကိုင်မြို့နယ်တွင်းရှိ ဒေသခံပြည်သူများ နေ့စဉ်နှင့်အမျှ စစ်ဘေးတိမ်းရှောင်နေရသည်။
တိုက်ပွဲကြောင့် ကုန်းပေါင်းကျေးရွာရှိ ဒေသခံ (၄) ဦး လက်နက်ကြီး ထိမှန်ပြီး တစ်ဦး သေဆုံးသွားခဲ့သည်။

Leave a Comments