သျှမ်းပြည်တောင်ပိုင်း ကလောမြို့ရှိ မြို့နယ်ပြည်သူ့ဆေးရုံမှ CDM လုပ်သည့် ဝန်ထမ်းများ ဖိအားပေးခြိမ်းခြောက် ခံနေရကြောင်း စုံစမ်းသိရှိရသည်။
ကလောမြို့ပြည်သူ့ဆေးရုံမှ CDM မပြုလုပ်သည့် ဝါရင့် သူနာပြုဆရာမကြီး တစ်ဦးသည် CDM လုပ်ဆောင်သည့် ဝန်ထမ်းများ၏ အမည်စာရင်းနှင့် ကိုယ်ရေးအချက်အလက်များကို ထွေအုပ်ရုံးသို့ ပို့ဆောင်ပေးပြီး အလုပ်ပြန်ဆင်းရန် ခြိမ်းခြောက်စာများ ပေးပို့လာကြောင်း ကလောမြို့မှ ဒေသခံတစ်ဦးက သျှမ်းသံတော်ဆင့်ကို ပြောသည်။
“သူက (သူနာပြုဆရာမကြီး) ဒီကလောဆေးရုံကို ရောက်တာ ကြာနေပြီ၊ မြို့ခံလိုလည်းဖြစ်နေပြီ၊ သူက စစ်တပ် ထောက်ခံသူပေါ့၊ အခုက ဆေးရုံမှာ ဝန်ထမ်းအင်အားလည်း နည်းနေတော့ CDM လုပ်ထားတဲ့ ဝန်ထမ်းတွေကို အလုပ်ပြန်ဆင်းခိုင်းတယ်၊ စာရင်းတွေကလိုလည်း ထွေအုပ်ရုံးကို ပို့ထားပြီ၊ အလုပ်လာဆင်းလာ မလာရင်တော့ မင်းတို့ အဖြစ်နဲ့ မင်းတို့ပဲ ဆိုပြီးတော့ CDM ဝန်ထမ်းတွေကို ခြိမ်းခြောက်စာပို့ခဲ့တယ်” ဟု အထက်ပါ ပုဂ္ဂိုလ်က ပြောသည်။
CDM လုပ်ဆောင်ခြင်းမရှိသည့် တပ်ထောက်ခံသူ သူနာပြုဆရာမကြီးသည် CDM လုပ်ဆောင်သည့် ဝန်ထမ်းများ ကို အလုပ်ပြန်မဆင်းပါက တရားစွဲခံရမည်ဖြစ်ကြောင်း သို့မဟုတ် အလုပ်ထုတ်ခံရမည်ဖြစ်ကြောင်း ကဲ့သို့သော ခြိမ်းခြောက်စာများကို ပေးပို့နေသည့်အတွက် တချို့သော CDM လုပ်ဆောင်သည့် ဝန်ထမ်းများသည်လည်း မိမိတို့ မိသားစု ထိခိုက်လာမည်ကို စိုးရိမ်သောကြောင့် အလုပ်ပြန်ဆင်းနေကြောင်းလည်း သတင်းသိရသည်။
“ ဝန်ထမ်းတော်တော်များများက မတ်လ ကတည်းက CDM လုပ်ထားတာ ဆိုတော့ တချို့ကလည်း စားဝတ်နေ ရေးအတွက် အရမ်းခက်ခဲနေ ကြပြီလေ၊ ပြီးတော့ ဆရာမကြီးကလည်း တရားစွဲမယ်ဆိုတာတွေ ပြောလာတော့ တချို့က မိသားစုကို ထိခိုက်မှာစိုးလို့ အလုပ်ပြန်ဆင်းတာလည်းရှိတယ်၊ မဆင်းရင်လည်း တခြားအလုပ်ရှိမှ အဆင်ပြေတော့မှာ” ဟု ကလောမြို့ ဆေးရုံဝန်ထမ်းနှင့်နီးစပ်သူ တစ်ဦးက သျှမ်းသံတော်ဆင့်ကို ပြောသည်။
စစ်တပ်မှနိုင်ငံတော် အာဏာကို သိမ်းယူပြီးနောက် အာဏာရှင်လက်အောက် တာဝန်ထမ်းဆောင်လိုခြင်းမရှိသည့် ဌာနဆိုင်ရာ အသီးသီးမှ ဝန်ထမ်းအများစုသည် အကြမ်းမဖက် အမိန့်မနာခံ အာဏာဖီဆန်ခြင်းဟူသည့် CDM ပြုလုပ်ပြီး ဆန့်ကျင်မှုတွင် ကျန်းမာရေးဌာနမှ ဝန်ထမ်းအများဆုံးပါဝင်ကာ ယင်းတို့အနက် ကလောမြို့နယ် ပြည်သူ့ဆေးရုံမှ ကျန်းမာရေးဝန်ထမ်းများလည်း ပါဝင်သည်။
Leave a Comments