မိုင်းကိုင်မြို့နယ် လိမ္မော်ခြံထဲ အရပ်သား(၂)ဦး မိုင်းနင်းမိ

0

သျှမ်းပြည်တောင်ပိုင်း မိုင်းကိုင်မြို့နယ် ဟမ်းငိုင်းကျေးရွာအုပ်စုရှိ လိမ္မော်ခြံတွင် အရပ်သား (၂) ဦး မိုင်းနင်းမိကာ ဒဏ်ရာပြင်းထန်ကြောင်း စုံစမ်းသိရှိရသည်။

ဟမ်းငိုင်းကျေးရွာအုပ်စု နော်ဆိုင်ကျေးရွာရှိ လိမ္ပော်ခြံ အတွင်း အောက်တိုဘာ (၅)ရက် ည (၃)နာရီခွဲတွင် အသက် (၅၀) ကျော် အမျိုးသား (၂) ဦး မြေမြုပ်မိုင်း နင်းမိခဲ့ပြီး ဒဏ်ရာပြင်းထန်စွာရရှိကာ ယနေ့ ( အောက်တိုဘာ ၆)ရက် မနက်ပိုင်း (၉ )နာရီခန့် တွင် မိုင်းကိုင်ပြည်သူ့ဆေးရုံသို့ ပို့ဆောင်ပေးခဲ့ကြောင်း ဟမ်းငိုင်းကျေးရွာ အသက် (၄၀)ဝန်းကျင်ရှိ အမျိုးသားတစ်ဦး က သျှမ်းသံတော်ဆင့် ကိုပြောသည်။

“ မနေ့က မိုင်းထိတာ။ ဒီနေ့မနက်မှ ဆေးရုံပို့နိုင်ခဲ့တယ်။ အဲ့ ၂ ယောက် ထဲက တစ်ယောက်တော့ ဒဏ်ရာ ပြင်းထန်တယ် ” ဟု အသက် (၄၀)ကျော် အမျိုးသား တစ်ဦး က ဆိုသည်။

မိုင်းနင်းမိသူ အသက် (၅၀) အရွယ် လုံးဆန်ဉာဏ် သည် ခြေထောက် တွင် ဒဏ်ရာပြင်းထန်စွာ ရရှိခဲ့ပြီး၊ အသက် (၅၂) နှစ်အရွယ် ရှိ လုံးအောင်သည် ခြေထောက် နှင့် ကျောကုန်းမှာ မိုင်းစ ထိမှန်ခဲ့ကြောင်း သိရသည်။

“သူတို့ မိုင်းနင်းမိတဲ့ နေရာက တိုက်ပွဲဖြစ်တဲ့ နေရာ မဟုတ်ဘူး။ နော်ဆိုင်ကျေးရွာမှာရှိတဲ့ လိမ္မော်ခြံထဲက တဲအနီးနားမှာ ဖြစ်တာ။ မိုင်းကိုင်မြို့နယ်မှာ ဒီလို မိုင်းနင်းမိတာ တခါမှ မကြားဖူးဘူး” ဟု ဟမ်းငိုင်းဒေသခံ စစ်ဘေးရှောင် ကူညီပေးသည့် အမျိုးသား တစ်ဦးကပြောသည်။

လက်ရှိ မိုင်းကိုင်မြို့နယ်အတွင်း ဟိုင်းငိုင်းကျေးရွာအုပ်စု နှင့် ပန်ကေတုကျေးရွာအုပ်စုအတွင်း တိုက်ပွဲများ ဆက်လက်ပြင်းထန်နေကြောင်း သတင်းရရှိသည်။

“မနေ့လည်း တစ်နေ့လုံးကြားနေရတယ်။ ပန်ကေတုကနေပြီး အသံတွေ ကြားနေရတယ်။ မနေ့ကလည်း (၃၀၀)ကျော် စစ်ရှောင်လာတယ် ” ဟု ဟမ်းငိုင်းကျေးရွာရှိ ရှိသည့်စစ်ရှောင် တစ်ဦး ကပြောသည်။

တိုက်ပွဲကြောင့် စက်တင်ဘာ (၁၄) ရက်နေ့ကစတင်ပြီး သျှမ်းတပ် (၂) တပ် တိုက်ပွဲကြောင့် ဒေသခံ မိသားစု (၄)ဦး လက်နက်ကြီးထိမှန်ကာ တစ်ဦး လက်နက်ကြီး သေဆုံးပြီး ၊ (၃)ဦး ဒဏ်ရာရရှိခဲ့ကာ ဒေသခံ ပြည်သူများ (၃၀၀၀) ကျော် နေရပ်စွန့်ခွာ ထွက်ပြေးတိမ်းရှောင်ခဲ့ရကြောင်းသိရသည်။

Leave a Comments