သျှမ်းပြည်တောင်ပိုင်း မိုင်းကိုင်မြို့နယ်တွင် သျှမ်းတပ် (၂) တပ်တိုက်ပွဲကြောင့် စစ်ရှောင်လာစဉ် ထော်လဂျီတိမ်းမှောက်ကာ တောင်ကြီးဆေးရုံတွင် ဆေးကုသနေသည့် အသက် (၈၆)နှစ်အဘွားသည် ခြေထောက်အရိုးကြွေမွဒဏ်ရသဖြင့် ခွဲစိတ်ကုသရန် လိုအပ်နေကြောင်း စုံစမ်းသိရသည်။
တောင်ကြီးမြို့ စဝ်စံထွန်းဆေးရုံတွင် ဆေးကုသမှုခံယူနေရသည့် စက်တင်ဘာ (၂၀)ရက်တွင် တိုက်ပွဲကြောင့် စစ်ရှောင်လာစဉ် ထော်လဂျီတိမ်းမှောက်ရာတွင် ဒဏ်ရာပြင်းထန်စွာ ရရှိခဲ့သည့် အသက် (၈၆)နှစ်အရွယ်ရှိ အဘွားသည် ခြေထောက်တွင် အရိုးကြေမွသွားသောကြောင့် ခွဲစိတ်ကုသရန် လိုအပ်နေကြောင်း လူနာစောင့်ပေးနေသည့် အမျိုးသမီး က သျှမ်းသံတော်ဆင့်ကို ပြောသည်။
“ ဟိုနေ့ကတော့ ခွဲခန်းထဲတခါဝင်ပြီးပြီ။ သူအနာကို ချုပ်ပေးထားလိုက်တယ်။ ပြီးတော့ ကျောက်ပတ်တီးစည်းထားတယ်။ စကားတွေလည်းပြောနိုင်ပြီ။ ဒူးကအရိုးကြေမွသွားလို့ ခွဲစိတ်ဖိုလိုသေးတယ်။အဖွားက အားမရှိသေးတော့ ခွဲစိတ်လို့မရသေးဘူး” ဟု ထို အဖွားကို စောင့်ပေးနေသည့် အမျိုးသမီး က ပြောသည်။
ထို အဖွားသည် တိုက်ပွဲကြောင့် စက်တင်ဘာ ၂၀ ရက်နေ့က ထွက်ပြေးတိမ်းရှောင်လာချိန်တွင် ထော်လာဂျီမှောက်ကာ ဒဏ်ရာပြင်းထန်စွာရရှိခဲ့သောကြောင့် စက်တင်ဘာ (၂၂) ရက်တွင် တောင်ကြီးမြို့ စဝ်စံထွန်းဆေးရုံသို့ ဆေးကုသရန် ရောက်ရှိလာခဲ့ခြင်းဖြစ်ကြောင်းသိရသည်။
ယခုလက်ရှိတွင် အဖွားသည် အသက်ကြီးလွန်သောကြောင့် ခွဲစိတ်ကုသရန်အတွက် ကိုယ့်ခံကောင်းရန်လိုအပ်ပြီး၊ အချိန်စောင့်ဆိုင်းရမည်ဖြစ်ကြောင်း အဘွားကို စောင့်ပေးနေသည့် သူက ပြောသည်။
“ အဖွားက အားမရှိသေးဘူးတဲ့။ ခွဲစိတ်ဖို့ကတော့ အချိန်ယူရအုံးမယ်လို့ ဆရာဝန်က ပြောတယ်။ ဒူးခေါင်းပြဲသွားတာလေ။ အဖွားက လည်း အသက်ကြီးပြီးဆိုတော့ ကိုယ့်ခံအားသိပ်မရှိတော့ဘူးလေ” ဟု ၎င်းအမျိုးသမီးက ဆိုသည်။
မိုင်းကိုင်မြို့နယ်တွင် တိုက်ပွဲကြောင့် ပြည်သူများထွက်ပြေးတိမ်းရှောင်လာရချိန်တွင် ထော်လာဂျီမှောက်ကာ အမျိုးသမီး (၃) ဦးဒဏ်ရာရရှိခဲ့ကြောင်းသိရသည်။
လက်ရှိမှာ မိုင်းကိုင်မြို့နယ်အတွင်း သျှမ်းတပ်(၂)တပ် တိုက်ပွဲကြောင့် စစ်ရှောင် (၃၀၀၀)ကျော်ထိရှိလာကြောင်းသိရသည်။
