သျှမ်းမြောက် ကျောက်မဲမြို့နယ် ဟူးကွက်ကျေးရွာ ဒေသခံ အမျိုးသမီးတစ်ဦးသည် ပြီးခဲ့သည့် စက်တင်ဘာ (၂၇)ရက်နေ့က သေနတ်ဖြင့် ပစ်ခံရပြီး ဒဏ်ရာရရှိခဲ့ကြောင်း သတင်းရရှိသည်။
အဆိုပါ အမျိုးသမီးသည် ကျေးရွာအတွင်း ဟင်းရွက်ခူးနေစဉ် သေနတ်ဖြင့် ပစ်ခတ်ခံရမှုကြောင့် ညာဘက် လက်မောင်းတွင် ဒဏ်ရာရရှိခဲ့ကြောင်း သိရသည်။
“အမျိုးသမီးတစ်ယောက် သေနတ်ပစ်ခံရတယ်လို့တော့ ကြားတယ်၊ ဖြစ်စဉ်အသေးစိတ်ကိုတော့ မသိရဘူး၊ အဆက်အသွယ်လုပ်လို့လည်း မရဘူး” ဟု မြို့ပေါ်ရောက် ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် စက်တင်ဘာလ (၂၅)ရက်နေ့တွင် ဟူးကွက်ကျေးရွာအတွင်း RCSS/SSA နှင့် တပ်ပေါင်းစု ဖြစ်သည့် SSPP/SSA၊ TNLA တို့ တိုက်ပွဲပြင်းထန်ခဲ့မှုကြောင့် ရွာဘုန်းကြီးကျောင်း ထိခိုက်ပျက်စီးခဲ့ရပြီး သံဃာ (၂)ပါးလည်း ဒဏ်ရာရခဲ့ကြောင်း၊ ထို့အပြင် ကျေးရွာအတွင်းရှိ နေအိမ်အချို့ မီးလောင်ခဲ့ကြောင်း သိရှိရသည်။
အလားတူ ပြီးခဲ့သည့် ရက်ပိုင်းအတွင်း တပ်ပေါင်းစုကို ထမင်းသွားပို့သည့် ပန်လင်ရွာခံနှင့် နောင်စင်ရွာခံ အမျိုးသား (၂)ဦးတို့ ပစ်ခတ်ခံရပြီး ဒဏ်ရာရရှိခဲ့ကြောင်း၊ စက်တင်ဘာလ (၁၅)ရက်နေ့တွင်လည်း ကျေးရွာအနီး မိုင်းနင်းမိမှုကြောင့် ဒေသခံ (၂)ဦး ထိခိုက်ဒဏ်ရာရရှိခဲ့ကြောင်း သိရှိရသည်။
Leave a Comments