သျှမ်းပြည်တောင်ပိုင်း ဟိုပုံးမြို့နယ် ဟိုပုံးကိုရင်လေး ဈာပနသွားလာပြီးနောက်ပိုင်း ကိုဗစ်- ၁၉ ပိုးတွေ့များပြားလာပြီး၊ ရုတ်တရက်သေဆုံးသူ နေ့တိုင်းနီးပါး ရှိလာကြောင်း စုံစမ်းသိရသည်။
အဆိုပါ ဟိုပုံးမြို့တွင် စက်တင်ဘာ တတိယအပတ်ထဲတွင် ကိုဗစ် ၁၉ ကြောင့် သေဆုံးသူ (၃) ဦးရှိပြီး ယမန်နေ့ စက်တင်ဘာ ၂၆ တွင် အသက် (၂၀) လူငယ်တဦး သေဆုံးသွားကြောင်း သိရသည်။
“ အရင်ပတ်က (၃) ယောက်သေသွားတယ်။ တယောက်က ဆေးရုံမှာသေသွားတယ်။ ထပ်တယောက်က လမ်းဘေးမှာလှဲကျပြီး သေသွားတယ်။ ကျန်တယောက်တော့ အိမ်မှာပဲ နေပြီးသေသွားတာ။ ပြီးတော့ မနေ့က တယောက်ထပ်သေသွားတယ်။ ကိုဗစ်ကြောင့်သေသွားတယ်လို့ ပြောရမှာပေါ့” ဟု ဟိုပုံးမြို့ ဒေသခံ အမျိုးသားတဦးက ပြောသည်။
ထိုအပြင် ဟိုပုံကိုရင်လေး ဈာပနကို သွားလာပြီးနောက်ပိုင်း ဟိုပုံးမြို့တွင် ကိုဗစ်- ၁၉ ပိုးတွေ့လူနာ များလာကြောင်း သိရသည်။
“ ကိုရင်လေး ဈာပနာသွားလာပြီးနောက်ပိုင်းမှာ ပိုးတွေ့လူနာပိုများလာတယ်။ အဓိကတော့ တောင်ပိုင်းရပ်ကွက်နဲ့ ဌာနဆိုင်ရာတွေမှာ ပိုပြီးတွေ့တယ်။ ရောဂါလက္ခဏာက တန်မပြဘူး။ အရှေ့တပတ်ကနေပြီးတော့ စတွေ့တာများတယ်။” ဟု ဟိုပုံးမြို့ ဒေသခံအမျိုးသားတဦး ကပြောသည်။
ထိုသို့ တောင်ပိုင်းရပ်ကွက်ထဲတွင် မိသားစုအလိုက် ကိုဗစ် ၁၉ ပိုးတွေ့ရှိနေကြရပြီး တရက်လျှင်ပျမ်းမျှ (၁၀) ဦးအထက်ပိုးတွေ့လာကြောင်း ဟိုပုံးမြို့ ဒေသခံက ပြောသည်။
ဟိုပုံးကိုရင်လေး ဈာပနာကို သွားလာသည့် ပြည်သူများအနေဖြင့် Quarantine ဝင်ရန်အတွက် ပအိုဝ်းအမျိုးသား အဖွဲ့ချုပ် က ထုတ်ပြန်ထားခဲ့သော်လည်း ပြည်သူမတချို့က Quarantine ဝင်ရောက်ခြင်းမရှိကြောင်းသိရသည်။
“ ဒီကလူလည်း Quarantine အကြောင်းသိထားကြတော့လည်း တချို့ကသိပ်မဝင်ကြဘူး။ အရင်ကတော့ ပုံမှန်ဆို ၁ယောက် ၂ ယောက်လောက်ပဲတွေ့တယ်။ တစ်ချို့ရက်ဆို ပိုးမတွေ့တဲ့ရက်လည်းရှိတယ်။ ခုနောက်ပိုင်းက တစ်ရက်ကို ၁၀ ယောက်ထိတိုးပြီးတွေ့လာတယ်” ဟု ဟိုပုံးမြို့ ဒေသခံတဦးက ပြောသည်။
ဟိုပုံးကိုရင်လေး ဈာပနာကို လိုက်ပါပို့ဆောင်ပေးခဲ့သည့်သူများသည် Mask ( နှာခေါင်းစည်း) တို့ကို တပ်ဆင်ထားခြင်းမရှိကြောင်း သိရသည်။
ဟိုပုံးမြို့တွင် လွန်ခဲ့သည် စက်တင်ဘာ (၂၂) ရက် မနက်ပိုင်း က ကိုဗစ် ၁၉ ကို လာထိုးရန် စောင့်ဆိုင်နေသည့် အမျိုးသားတဦး သေဆုံးသွားခဲ့ပြီး ယမန်နေ့ စက်တင်ဘာ ၂၆ ရက်နေ့ထိ ကိုဗစ် ၁၉ ပိုးတွေ့လူနာ (၈၃၃) ဦးရှိပြီး ဆေးကုသနေသူ (၈၉) ဦးနှင့် သေဆုံးသူ (၁၆) ဦးရှိပြီးဖြစ်ကြောင်း သိရသည်။
