သျှမ်းမြောက် နမ္မတူမြို့နယ်အတွင်းရှိ ကိုဗစ်နှင့် လက်နက်ကိုင် တိုက်ပွဲများကြောင့် လိမ္မော်သီးစိုက်တောင်သူများသည် တင်ပို့ ရောင်ချခွင့် အတွက် စိုးရိမ်နေကြကြောင်း သတင်းရရှိသည်။
နမ္မတူမြို့နယ်တွင် ကိုဗစ်နှင့် တိုင်းရင်းသားလက်နက်ကိုင်ကြားတိုက်ပွဲများဖြစ်ပွားကာ လမ်းကြောပိတ်ဆို့နေသဖြင့် မကြာမီ လိမ္မော်သီးရာသီရောက်ပါက သီးနှံရောင်းချရန် ခက်ခဲမည်ကို စိုးရိမ်နေကြောင်း လိမ္မော်ခြံပိုင်ရှင်များက သျှမ်းသံတော်ဆင့်ကို ပြောသည်။
“အသီးရောင်းရဖို့က မလွယ်ဘူး၊ ရောဂါတွေကြောင့်လည်းပါတယ်၊ မြို့အဝင်အထွက်လည်း ခက်ခဲတယ်၊ နောက်ပြီး နိုင်ငံရေးအနေအထားကလည်း လုံခြုံမှုမရှိဘူး၊ ဘယ်အချိန်တိုက်ပွဲဖြစ်မလဲဆိုပြီး ကြောက်နေရတယ်” ဟု နမ္မတူမြို့နယ် မိုင်းရင်ကျေးရွာမှ လိမ္မော်သီးစိုက်တောင်သူ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ယခင်နှစ်က ၎င်း၏ ခြံမှ လိမ္မော်သီးများအား မူဆယ်၊ သိန္နီ၊ ပြင်ဦးလွင်နှင့် ရန်ကုန်မြို့နယ်အထိ တင်ပို့ရောင်းချခဲ့ရကြောင်း၊ သို့သော် ယခုနှစ်တွင် ကိုဗစ်ရောဂါကူးစက်မှု၊ နိုင်ငံရေးအနေအထား တို့ကြောင့် အခြားမြို့နယ်သို့ တင်ပို့ရောင်းချရန် ခက်ခဲနေကြောင်း သိရသည်။
လက်ရှိတွင် လိမ္မော်သီး တစ်ပိဿာလျှင် (၁၈၀၀)ကျပ်မှ (၂၀၀၀)ကျပ်ဝန်းကျင်ရှိနေကြောင်း၊ သို့သော် ခြံပြုစုစရိတ်များလာပြီး မြေသြဇာဈေးနှုန်းများလည်း တက်လာသည့်အတွက် ကုန်ကျစရိတ် ပိုမိုများပြားပြီး မှာယူသူ နည်းပါးနေတာဖြစ်ကြောင်း ဒေသခံထံမှ သိရသည်။
“ရောင်းဖို့သီးနှံက ရှိထားလည်း လာဝယ်တဲ့သူက မရှိ၊ အထွက်နှုန်းက ပုံမှန်ဆိုပေမယ့် ကုန်ကျစရိတ်က များတယ်၊ ခြံပြုစုထိန်းသိမ်းခလည်း ပိုများလာတယ်၊ ခုချိန်မရောင်းရရင် နောက်နှစ်အတွက်ကတော့ ပိုပြီးခက်ခဲပြီ” ဟု အထက်ပါ အမျိုးသမီးက ပြောသည်။
သျှမ်းမြောက်ရှိ မြို့နယ်များတွင် လိမ္မော်သီးအပြင် ရာသီ သီးနှံများဖြစ်သည့် နာနတ်၊ သံပုရာ၊ ကမ္ပလာ၊ ပြောင်းနှင့် အခြား တောင်ယာထွက်သီးနှံများလည်း ကိုဗစ်ရောဂါနှင့် လက်နက်ကိုင်တိုက်ပွဲများကြောင့် တင်ပို့ရောင်းချရန် ခက်ခဲနေကြ ကြောင်း သိရှိရသည်။
