သျှမ်းပြည်မြောက်ပိုင်း နမ္မတူမြို့နယ် ရေအိုကျေးရွာဒေသခံ (၃) နှင့် မန်ဆာ ကျေးရွာဒေသခံ (၂) ဦးတို့ (၅)လကြာ ဖမ်းဆီးခံထားရပြီး ယနေ့ထိတိုင် ပြန်မလွှတ်ပေးသေးသဖြင့် ကျန်ရှိနေသည့် မိသားစုဝင်များ စားဝတ်နေရေးခက်ခဲနေကြောင်း စုံစမ်း သိရသည်။
ထိုအရပ်သား (၅)ဦးကို သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA)တို့ ဧပြီလပိုင်းအတွင်း ဖမ်းဆီးသွားခဲ့ရာ လက်ရှိမှာ (၅)လကျော်ရှိပြီး ယနေ့ထိ ပြန်လည် လွှတ်မြောက်လာခြင်း မရှိသေးသည့်အပြင် မိသားစုဝင်များနှင့်လည်း အဆက်အသွယ်မရရှိကြောင်း သိရသည်။
“ ဖမ်းသွားတာ ၄ – ၅ လလောက်ရှိတော့မယ်။ ဘာအဆက်သွယ်မှ ပြန်မရသေးဘူး။ ဆက်သွယ်လို့လည်း မရဘူး။ သူတို့ ပတ်သတ်တဲ့ သတင်းတွေ ဘာမှ မကြားရဘူး။ တစ်ခုခု ဖြစ်မှာကို စိုးရိမ်တယ်။” ဟု ရေအိုးကျေးရွာမှ အမျိုးသမီးတဦး ကသျှမ်းသံတော်ဆင့် ကိုပြာသည်။
ထို (၅) ဦးကို ဖမ်းဆီးသွားပြီးနောက်ပိုင်း နောက်တွင် ကျန်ရှိခဲ့သည့် မိသားစုဝင်များက စားဝတ်နေရေးပိုမို ခက်ခဲလာသည့်အတွက် အမြန်ပြန်လွှတ်ပေးရန်လည်း ဖမ်းဆီးခံရသည့် မိသားစုဝင် က ပြောသည်။
“ ဖမ်းဆီးသွားတာကြာပြီး။ ဘာသတင်းမှာလည်း မကြားရဘူး။ ကျမသားနဲ့ စကားပြောချင်တာတောင် မရဘူး။ ကျမသားက ငယ်ငယ်လေးပဲရှိသေးတယ်။ သူတို့ကို ဖမ်းသွားပြီး ကျမတို့ အိမ်မှာမနေရဲတော့ဘူး။ အိမ်လည်းပျက်စီးနေပြီ။ ကျမမှာ သမီးငယ်နဲ့ အမေအိုရှိနေတယ်။ ဆိုင်ကယ်လည်းမစီးတက်ဘူး။ စားဝတ်နေရေးအတွက် အရမ်းကို ခက်ခဲတယ်။ ပြန်လွတ်လာစေချင်တယ်။” ဟု ရေအိုကျေးရွာက ဖမ်းဆီးခံရသည့် ဦးကြာယုံ၏ အမျိုးသမီးက ပြောသည်။
ဖမ်းဆီးခံရသူများ၏ သတင်းကို တစ်စုံတစ်ရာမှ မကြားရသည့် အတွက်ကြောင့် မိသားစုဝင်များက စိုးရိမ်နေပြီး အမြန်ဆုံးပြန်လွှတ်လာပေးစေချင်ကြောင်း တောင်းဆိုလိုက်သည်။
“ ကျေးဇူးပြုပြီးတော့ အမြန်ဆုံးပြန်လွတ်လာပေးပါ။ ကျမတို့မှာလည်း အရမ်းခက်ခဲတယ်။ သူတို့ကိုလည်း စိုးရိမ်တယ်။ ကျမသားဆိုလည်း ငယ်ငယ်လေး ဘာအပြစ်မှ မရှိဘူး။ ပြန်လွှတ်လာပေးပါ” ဦးကြာယုံ၏ အမျိုးသမီးက ဆိုသည်။
ဖမ်းဆီးသွားသည့်သူကို ပြန်လွတ်ပေးခြင်းရှိမရှိကို RCSS ပြောခွင့်ရ ဗိုလ်မှူးကြီး စိုင်းခမ်းစံကို သျှမ်းသံတော်ဆင့် သတင်းဌာန မှ အကြိမ်ကြိမ်ဆက်သွယ်ခဲ့သော်လည်း ဆက်သွယ်၍မရခဲ့ပေ။
RCSS မှ ရေအိုကျေးရွာခံ ဦးကြာယုံ နှင့် ၎င်း၏ သားဖြစ်သူ နေလင်းစွာ၊ နေလင်းဦးကို လက်နက်ရှိထားသည်ဟုဆိုကာ ဖမ်းဆီးသွားပြီး မန်ဆာကျေးရွာဒေသခံ မိုင်းချစ်မောင်လေး နှင့် ဦးအိုက်ငင်းတို့ကို TNLA အတွက် ဆက်ကြေးကောက်သမား ဟုဆိုကာ ဖမ်းဆီးသွားကြောင်းသိရသည်။
