သျှမ်းပြည်တောင်ပိုင်း မိုင်းကိုင်မြို့နယ်ရှိ ဟိုခဲကျေးရွာအုပ်စု နောင်လျှော်ကျေးရွာရှိ စစ်ရှောင်စခန်းအနီး သျှမ်းတပ်(၂)တပ် လက်နက်ကြီးသံကြောင့် စစ်ရှောင်များထပ်မံ ထွက်ပြေးတိမ်းရှောင်နေရကြောင်း စုံစမ်းသိရသည်။

ယနေ့ စက်တင်ဘာ (၁၉) ရက် နေ့လည် (၁၂) နာရီခွဲချိန်မှစတင်ပြီး သျှမ်းတပ် (၂) တပ် တိုက်ပွဲပြင်းထန်သဖြင့် နောင်လျှော်ရွာ တွင် တိမ်းရှောင်နေသည့် စစ်ရှောင်များ နှင့် ဒေသခံများ ထွက်ပြေးနေရကြောင်း ထပ်မံထွက်ပြေးနေရသည်။

“လက်နက်ကြီးသံတွေက ကျနော်တို့ နေတဲ့နေရာနဲ့ အရမ်းနီးတော့ ကြားနေရတယ်။ ကျနော် တို့ ထွက်ပြေးနေတာ ဘယ်မှာ သွားမလဲတော့ မသိသေးဘူး။ ခုလမ်းပေါ်မှာပဲ ရှိနေတုန်းပဲ” ဟု နောင်လျှော် စစ်ရှောင်စခန်းမှာ ထွက်ပြေးနေသည့် အမျိုးသား တစ်ဦးက သျှမ်းသံတော်ဆင့် ကိုပြောသည်။

လက်ရှိမှာတော့ နေထိုင်သည့် နေရာ အခက်ခဲဖြစ်သဖြင့် လမ်းပေါ်မှာပဲ ရှိနေသဖြင့် လက်နက်ကြီးသံ ငြိမ်သွားလျှင် နောင်လျှော်ဘုန်းကြီးကျောင်းသို့ ပြန်သွားမည်ဟု စုံစမ်းသိရှိရသည်။

“ဘယ်မှာ သွားရမလဲ မသိသေးဘူး။ ခု လမ်းပေါ်မှာ ရှိနေတုန်းပဲ။လက်နက်ကြီးသံ ငြိမ်သွားရင် နောင်လျှော်ဘုန်းကြီးကျောင်းပဲ ပြန်သွားမယ်ထင်တယ်။ သွားစရာ နေရာ မရှိတော့” ဟု စစ်ရှောင်သူ တစ်ဦး ကပြောသည်။

သျှမ်းတပ် (၂) တပ် တိုက်ပွဲကြောင့် နောင်လျှော်ကျေးရွာရှိ စစ်ရှောင် ပြည်သူများ နှင့် နောင်လျှော်ဒေသခံများလည်း စိုးရိမ်ထိတ်လန့်ပြီး ထွက်ပြေးနေကြသဖြင့် ထွက်ပြေးသည့်သူ စာရင်း အတိအကျကို စုံစမ်းနေဆဲဖြစ်သည်။

“ဒီနေ့ ကျနော်တို့ (RCSS) နဲ့ SSPP ဟိုခဲကျေးရွာ အနီးတဝှိက် တိုက်ပွဲဖြစ်တာ ဟုတ်ပါတယ်။ တိုက်ပွဲ (၄)ရက်လောက်ရှိပြီဖြစ်တာ” ဟု RCSS မှ ပြောရေးဆိုခွင့်ရှိသူ ဗိုလ်မှူးခမ်းစံ ကသျှမ်းသံတော်ဆင့် ကိုပြောသည်။

အဆိုပါတိုက်ပွဲကိစ္စနှင့် ပတ်သက်ပြီး SSPP/SSAကို သျှမ်းသံတော်ဆင့် မှ အကြိမ်ကြိမ် ဆက်သွယ်မေးမြန်းခဲ့သော်လည်း မရရှိခဲ့ပေ။

သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) နှင့် သျှမ်းပြည်တိုးတက်ရေးပါတီ၊ သျှမ်းပြည်တပ်မတော် (SSPP/SSA) တို့သည် ဇွန်လဆန်းပိုင်းကတည်းက တိုက်ပွဲဖြစ်ပွားသဖြင့် ဒေသခံ ပြည်သူများ မကြာခဏ စစ်ဘေးရှောင်နေရကြောင်းသိရသည်။

ထိုတိုက်ပွဲကြောင့် သျှမ်းပြည်သူလူထုများ၊ သံဃာတော်များ၊ တိုက်ပွဲ ရပ်ပေးရန် တောင်းဆိုပေမယ့် သျှမ်းတပ် (၂) တပ်က ထိုးစစ်ဆင်မှု ရပ်တန့်ခြင်း မရှိခဲ့ပေ။