သျှမ်းအဆိုတော်အိမ် ကို TNLA မှ ဝင်ရောက်ဖျက်ဆီး၊ ပစ္စည်းများ ယူဆောင်သွား

0

သျှမ်းပြည်မြောက်ပိုင်း နမ္မတူမြို့နယ် ပန်လုံကျေးရွာရှိ သျှမ်းအဆိုတော် စိုင်းသျှန်ဖ ၏ နေအိမ်ကို တအောန်း ပလောင်အမျိုးသားတပ်မတော် (TNLA) က ဝင်ရောက် မွှေနှောက်ဖျက်ဆီးကာ ပစ္စည်းများယူဆောင်သွားကြောင်း သတင်းသိရသည်။

ဖြစ်စဉ်မှာ ပြီးခဲ့သည့် စက်တင်ဘာလ ၁၁ ရက်တွင် နမ္မတူမြို့နယ် ပန်လုံ ကျေးရွာအုပ်စုမှ အဆိုတော် စိုင်းရှန်ဖ နေအိမ်ကို TNLA တပ်သားများက ဝင်မွှေပြီး စတူရီယို အခန်းထဲရှိ ပစ္စည်းတချို့နှင့် စက်ခေါင်း၊ ရေစုပ်စက်တို့ကို ယူဆောင်သွားကြောင်း သတင်းသိရပါသည်။

“သူတို့လာသောင်းကျန်းသွားတဲ့အချိန်မှာ ကျနော်လည်း အိမ်မှာ ရှိမနေဘူး၊ သူတို့လာတာက ရွာလူကြီးလည်း မပါဘူး၊ သူတို့စစ်သားတွေပဲ ရောက်လာတယ်၊ ကျနော့်စတူဒီယို အခန်းကို သော့ဖျက်ပြီး ဝင်မွှေသွားတာ၊ Apple i5 ကွန်ပျူတာတစ်လုံး၊ (၂၂)ကောင် အင်ဂျင်စက်တစ်လုံး၊ Studio ခန်းပစ္စည်း၊ YAMAHA Keyboard တစ်လုံးနဲ့ ရေစုပ်စက်တစ်စုံ ယူသွားတယ်” ဟု အဆိုတော် စိုင်းသျှန်ဖ က သျှမ်းသံတော်ဆင့်ကိုပြောသည်။

ထိုလာရောက်အချိန်တွင် အဆိုတော် စိုင်းသျှန်ဖ ကိုယ်တိုင်နေအိမ်ထဲတွင် မရှိသည့်တွက် TNLA မှ ယူဆောင်သွားသည့် ပစ္စည်းအသေးစိတ်ကို မသိရှိရသေးကြောင်း၊ TNLA တပ်ဖွဲ့ မှ မည်သည့်အကြောင်းကြောင့်် လာရောက်မွှေနှောက်သည်ကိုလည်း မသိရှိကြောင်း စိုင်းသျှန်ဖ က ပြောသည်။

နမ္မတူမြို့နယ် ပန်လုံကျေးရွာအုပ်စုသည် သျှမ်းပြည်ပြန်လည်ထူထောင်ရေးကောင်စီ RCSS/SSA နှင့် တပ်ပေါင်းစုဖြစ်တဲ့ SSPP/SSA၊ တအာန်းပလောင် အမျိုးသားတပ်မတော်(TNLA) တို့က တိုက်ပွဲမကြာခဏ ဖြစ်ပွားသည့်နေရာဖြစ်သည်။

လက်ရှိ ပန်လုံရွာအတွင်းတပ်ပေါင်းစုတို့က နေရာယူထားကာ စိုင်းသျှမ်းဖ နေအိမ်ကို TNLA တပ်ဖွဲ့ မှ ဒုတိယအကြိမ် ဝင်ရောက်မွှေနှောက်ခြင်းဖြစ်ကြောင်းသိရသည်။

“ဘာကိုမသင်္ကာလို့ ဝင်စစ်မှန်းလည်း ကျနော်မသိဘူး၊ အရင် တစ်ခေါက်ကလည်း ဝင်စစ်ပြီးပြီ၊ ဟိုတစ်ချိန် ဝင်စစ်တုန်းကတော့ ရွာလူကြီးပါတယ်၊ အသိသက်သေတွေပါတယ်၊ ပစ္စည်းမှား တစ်ခုမှမှရှိလို့ သော့ပိတ်ပြီး ပြန်သွားတာ၊ အခုတစ်ကြိမ် ဝင်စစ်တာကတော့ အထဲက ပစ္စည်းတွေကိုလည်း မွှေနှောက်ဖျက်ဆီးသွားတာ၊ ပြီးတော့ ပစ္စည်းတွေလည်း ယူသွားတယ်၊ သက်သက်လုပ်တောပေါ့” ဟု စိုင်းသျှန်ဖ က ဆိုသည်။

အဆိုပါ ဖြစ်စဉ်များနှင့် ပက်သက်ပြီး တအာင်း (ပလောင်) အမျိုးသား တပ်မတော်ကို ဆက်သွယ်မေးမြန်းရာ အဆိုတော် စိုင်းသျှန်ဖ နေအိမ်ကို ဝင်ရောက်မှုသည် မှန်ကန်ကြောင်း ဖြစ်သော်လည်း အသေးစိတ် အချက် အလက်များကို မသိရှိရသေးကြောင်း TNLA မှ ပြောရေးဆိုခွင့်ရှိသူ ဗိုလ်မှူးမိုင်းအိုက်ကျော်က သျှမ်းသံတော်ဆင့်ကို ပြောသည်။

“ဝင်ရောက်စစ်ဆေးတာတော့ ဟုတ်ပါတယ်၊ အသေးစိတ် အချက်အလက်ကို သိရဖို့ ဒေသတွင်းက လှုပ်ရှားတဲ့အဖွဲ့ကိုလည်း ဆက်သွယ်မေးမြန်းထားပါတယ်၊ အခုတော့ မသိရှိရသေးဘူး” ဟု ဗိုလ်မှူး မိုင်းအိုက်ကျော်က သျှမ်းသံတော်ဆင့်ကို ပြောသည်။

ယခုလို အရပ်သား ပြည်သူနေအိမ်ကို ဝင်ရောက်ရှာဖွေမှုများသည် လုံခြုံရေးနှင့် စစ်ရေးဆိုင်ရာ အုပ်ချုပ်ရေး များအရ လုပ်ပိုင်ခွင့်ရှိသော်လည်း ပစ္စည်းများကို ဖျက်ဆီခြင်း၊ မဆိုင်သည့် ပစ္စည်းများကို ယူဆောင်သွားခြင်း များကို ယူဆောင်သွားခြင်းများ ပြုလုပ်ပါက စစ်ဘက်ဆိုင်ရာဥပဒေများအရ အရေးယူဆောင်ရွက်ဖို့ ရှိကြောင်းလည်း ဗိုလ်မှူးမိုင်းအိုက်ကျော်က ပြောသည်။

ဒေသတွင်းလှုပ်ရှားသည့် သျှမ်းတိုင်းရင်းသားလက်နက်ကိုင်များလည်း ရှိနေသည့် အတွက် ဒေသခံသျှမ်းပြည်သူများက နှိပ်စက်ခံနေရသည်ကို ဝင်ရောက်ကူညီဖြေရှင်း သင့်ကြောင်း ဒေသခံ တစ်ဦးလည်းဖြစ်သည့် အပြင် နစ်နာသူလည်း ဖြစ်နေသည့် အဆိုတော် စိုင်းသျှန်ဖက ပြောသည်။

Leave a Comments