သျှမ်းပြည် မြောက်ပိုင်း မူဆယ်ခရိုင် မုံးကိုးမြို့နယ် ဖောင်းဆိုင်းကျေးရွာနှင့် အနီးပတ်ဝန်းကျင်တွင် တိုက်ပွဲ များ နေ့စဉ် ဖြစ်ပွားမှုကြောင့် တရုတ်နယ်စပ်မျဉ်းပေါ် မြန်မာဘက်ခြမ်း မုံးကိုး မြို့ပေါ်သို့ စစ်ဘေးရှောင်များ ထပ်မံ တိုးလာကြောင်း သတင်း သိရသည်။
ပြီးခဲ့သည့် သြဂုတ်လ ၃ ရက်နေ့မှ စတင်ကာ နေ့စဉ်နေ့တိုင်း ဖြစ်ပွားတဲ့ တိုက်ပွဲကြောင့် စစ်ဘေးရှောင် ဦးရေများလည်း နေ့တိုင်းတိုးပွားလာလျက်ရှိပြီး လက်ရှိစာရင်းအရ မြန်မာ – တရုတ်နယ်စပ်ဖက် စစ်ဘေး ရှောင်သူ ဦးရေ ၁၅၀၀ ခန့်ရှိကြောင်း သိရသည်။
“တိုက်ပွဲက နေ့တိုင်းဖြစ်နေတော့ စစ်ရှောင်တွေကလည်း နေ့တိုင်းတိုးလာတယ်၊ အခုတော့ စာရင်း တိတိကျကျ မသိရသေးဘူး၊ ဒါပေမဲ့ ၁၅၀၀ ဝန်းကျင်လောက်တော့ သေချာတယ်၊ ထွက်ပြေးလာတဲ့ အိမ်ထောင်စုက ၃၀၀ နီးပါးရှိတယ်လေ” ဟု စစ်ဘေးရှောင်များကို ကူညီပေးနေသည့် အသင်းမှ အဖွဲ့ဝင် တစ်ဦးက သျှမ်းသံတော်ဆင့်ကို ပြောသည်။
အာဏာသိမ်း စစ်ကောင်စီ နှင့် ကိုးကန့် တပ်မတော် MNDAA တို့၏ မူဆယ်ခရိုင် ပန်ဆိုင်းမြို့နယ်အတွင်း ဖြစ်ပွားသည့် တိုက်ပွဲကြောင့် ဒေသခံပြည်သူများ စစ်ဘေးတိမ်းရှောင် ထွက်ပြေးနေကြရပြီး လက်ရှိအချိန်ထိ စစ်ရေးတင်းမာမှုများ ရှိနေသောကြောင့် ဒေသခံများက နေရပ်မပြန်နိုင်သေးကြောင်းလည်း သိရသည်။
ထို့အပြင် မူဆယ်ခရိုင် မုံးကိုးမြို့နယ်အတွင်းမှလည်း တိုက်ပွဲများဖြစ်ပွားနေသည့်အတွက် မုံးကိုးမြို့ပေါ်သို့ စစ်ဘေးရှောင် ရောက်လာသည့် ဒေသခံပြည်သူများ ၆၀၀ ခန့်နီးပါးခန့် ရှိနေကြောင်းလည်း သိရသည်။
“မနေ့ကလည်း တိုက်ပွဲဖြစ်တော့ မနေ့က လာတဲ့ စစ်ဘေးရှောင်လည်း ရှိတယ်၊ ဒီနေ့လည်း စစ်ဘေးရှောင် တွေ ထပ်ရောက်လာတယ်၊ ဒါပေမဲ့ စာရင်း အတိကျတော့ မသိရသေးဘူး၊ အခုတော့ ထေရဝါဒ ဗဟိုသာသ နာပြုကျောင်းနဲ့ ကချင်ဘာသာရေးကျောင်း (KBC) နဲ့ ခရိယာန်ကျောင်းတွေမှာ ၆၀၀ လောက်ရှိနေပြီလေ” ဟု မုံးကိုးမြို့မှ ဒေသခံ လူငယ်တစ်ဦးက သျှမ်းသံတော်ဆင့်ကို ပြောသည်။
လက်ရှိမုံးကိုးမြို့ပေါ်သို့ရောက်ရှိလာသော စစ်ဘေးရှောင် များအတွက် မုံးကိုးမြို့ပေါ်ရှိ ကချင်လူငယ် ယဉ်ကျေးမှုဖွဲ့နှင့် တခြားသော အဖွဲ့အစည်းများ၊ အလှူရှင်များစုပေါင်းပြီး ကူညီထောက်ပံ့ပေးမှုများ ပေးနေသော်လည်း အချိန်ကြာလာလျှင် ခက်ခဲနိုင်ကြောင်းလည်းသိရသည်။
မုံးကိုးမြို့နယ်အတွင်း ဖြစ်ပွားသည့် စစ်ကောင်စီတပ်နှင့် ကိုးကန့်တပ်မတော်တို့၏ သုံးရက်တာ (သြဂုတ် ၃၁ရက်မှစတင်ကာ စက်တင်ဘာ (၁)ရက် အထိ) အပြင်းအထန် တိုက်ခိုက်ခဲ့ရသည့် တိုက်ပွဲတွင် စစ်ကောင်စီ ဘက်မှ (၂၃)ဦး ကျဆုံးကာ ကိုးကန့်တပ်ဘက်မှ (၂)ဦး ကျဆုံးခဲ့ကြောင်း ကိုးကန့် သတင်းထုတ်ထားပါသည်။
Leave a Comments