သျှမ်းပြည်တောင်ပိုင်း ဟိုပုံးမြို့နယ်ရှိ ထမ်စန့်ဂူ ကျောင်းထိုင် ကိုရင်လေး (အရှင်ပေါရိသ) သည် ကိုဗစ်-၁၉ ရောဂါဖြင့် ယနေ့ (စက်တင်ဘာ ၁)ရက် မနက် ၁၁နာရီ ၄၅မိနစ်တွင် ဟိုပုံးပြည်သူ့ဆေးရုံတွင် ပျံလွန်တော်မူကြောင်း စုံစမ်းသိရသည်။
ကိုရင်လေး သည် ကိုဗစ်-၁၉ ကူးစက်ခံရသည်မှာ ရက်ကြာလာနေပြီး၊ ထမ်စန့်ဂူတွင်သာ ဆေးကုသခံယူခဲ့ရာ ရောဂါ လက္ခဏာပြင်းထန်လာသည့်အတွက် ယမန်နေ့တွင် ဟိုပုံးပြည်သူ့ဆေးရုံသို့ ဆေးကုသခံယူခဲ့ကြောင်းသိရသည်။
“ကိုဗစ် ဖြစ်တာ ကြာပြီ။ ဆေးရုံလည်းမတက်ဘူး။ သူ့ကျောင်းမှာပဲ တစ်ပတ်ကျော်ရှိပြီ။ အပြင်လူတွေကို အတွေ့မခံဘူူး။ မနေ့ကမှ အခြေနေဆိုးလာမှ ဆေးရုံသွားကြတယ်လို့ပြောတယ်” ဟု ဟိုပုံးဒေသခံ အမျိုးသား တစ်ဦးက သျှမ်းသံတော်ဆင့် ကိုပြောသည်။
အဆိုပါ ကိုရင်လေးသည် ကိုဗစ်-၁၉ ပထမလှိုင်းစတင်ဖြစ်ပွားစဉ်ကတည်းက ထမ်စန့်ဂူသို့ ခရီးသွားများကို တားဆီးပိတ်ပင်ခြင်း မရှိပဲ ကိုရင်လေးကျောင်းလာလျှင် ၎င်းပေးသည့် အဆောင်များကို ဆောင်ထားလျှင် ကိုဗစ်-၁၉ မကူးစက်နိုင်ကြောင်း မိန့်ကြားတော်မူခဲ့ကြောင်း သိရှိရသည်။
“ကိုဗစ်-၁၉ စဖြစ်ကတည်းက ထမ့်ဆမ်းဂူတွေ သူ့ကျောင်းတွေကို ခရီးသွားတွေ လာနေတာကို တားဆီးတာတွေ မလုပ်စေရဘူး။ သူ့ကျောင်းလာရင် မကူးဘူး သူ့အဆောင်တွေ ဆောင်ရင် မကူးဘူးဆိုပြီး ပြောတယ်။ သူ့ကိုပြောတာလည်း လက်မခံဘူး။” ဟု ဟိုပုံးဒေသခံ အမျိုးသားတစ်ဦးကပြောသည်။
ကိုရင်လေး ပျံတော်မူသွားသည်မှာ သက်တော် (၄၇) နှစ်ရှိပြီး အသက် (၆) နှစ်မှ စတင်ပြီး သာသနာ့ဘောင်သို့ ဝင်ရောက်လာခဲ့ပြီး လက်သန်းကို ဖြတ်လှူထားပြီး ကိုရင်လေး စတင်ဝတ်ခဲ့ကြောင်း သိရသည်။
“ကျနော့်တစ်ယောက်တည်းရဲ့အမြင်ဆိုရင် ဆရာတော်က သာသနာပြုတဲ့ ကိစ္စက နိုင်ငံတစ်ဝန်းရှိတယ်။ ပအိုဝ်းဒေသတွေလည်း အများကြီးရှိတယ်။သာသနာနဲ့ ပတ်သက်ရင်တော့ အများကြီး ထိခိုက်သွားတယ် လို့တော့ ကျနော်မြင်ပါတယ်” ပအိုဝ်းတိုင်းရင်းသား တစ်ဦးကပြောသည်။
ကိုရင်လေးနေထိုင်သည့် ကျောင်းများ ထမ်စန့်ဂူများသည် လက်နက်ကိုင် အဖွဲ့အစည်းများ လက်နက်ဖြင့် အသင့်စောင့်ထားခြင်း ၎င်းသွားရာ နေရာသည် လက်နက်ကိုင်ဆောင်ထားသည့် လက်နက်ကိုင်များ လိုက်ပါသွားခဲ့ကြောင်းသိရသည်။
“သူက စကစ ကိုးကွယ်တဲ့ဟာပဲလေ။ သူ့ကျောင်းမှာကော ထမ်စန့်ဂူမှာကော လက်နက်ကိုင် အဖွဲ့အစည်း တွေ အစောင့်တွေ လူကို သေစေတဲ့ လက်နက်တွေနဲ့ သာသနာပြုတယ်လို့တော့ မခေါ်ဘူး ကျနော်တို့က သာသနာပြုပုဂ္ဂိုလ်လို့တော့ မသတ်မှတ်ထားဘူး။ ဘုရား နဲ့ သာသနာနိက အဆောက်အဦးတွေမှာ သေနတ်တွေနဲ့ နေတဲ့ ပုဂ္ဂိုလ်ဖြစ်တဲ့အတွက်ကြောင့်မလို့ ရဟန်းလို့လည်း မသတ်မှတ်ဘူး။ သာသနာပြု ပုဂ္ဂိုလ်လို့လည်း မသတ်မှတ်ထားဘူး။” သျှမ်းတောင် တောင်ကြီး မှ ပြည်သူတစ်ဦးက ပြောဆိုသည်။
စစ်ကောင်စီများ ၊ ပအိုဝ်းအမျိုးသား အဖွဲ့ချုပ် (PNO)အဖွဲ့အစည်းများ၊ ကျေးလက်ဒေသရှိ ပအိုဝ်းတိုင်းရင်းသားများ အများဆုံး ကိုရင်လေးကို ကိုးကွယ် ယုံကြည်ကြကြောင်း သိရှိရသည်။
“ကျေးလက်ဒေသက လူတွေကျတော့ အသိပညာနည်းတယ်။ သူပြောသမျှအကုန်ယုံတယ်ဆိုတော့ ကျေးလက်ဒေသက သူ့ကို ကိုးကွယ်တာများတယ်” ပအိုဝ်းတိုင်းရင်းသားတစ်ဦးကပြောသည်။
ကိုရင်လေးသည် ကိုဗစ်-၁၉ ဖြစ်ပွားချိန်တွင်လည်း အစိုးရမှ လူစုလူဝေး ပွဲတော် မကျင်းပဖို့ တားမြစ်သော်လည်း ၎င်း တပေါင်းလပြည့်နေ့မှာ လူစုလူဝေးဖြင့် ပွဲတော် ကျင်းပခဲ့ကြောင်းသိရှိရသည်။
ထမ်စန့်ဂူ သည် သျှမ်းပြည်တောင်ပိုင်း ဟိုပုံးမြို့နယ်တွင် ရှိပြီး မြန်မာနိုင်ငံတွင် နာမည်ကြီးသည့် ခရီးသွားသည့် နေရာတစ်ခုဖြစ်ပြီး ဟိုပုံးကိုရင်လေးကိုလည်း လူအများက လာရောက်ဖူးမျှော်ကြသည်ကို သိရှိရသည်။
Leave a Comments