သျှမ်းမြောက် ကျောက်မဲမြို့နယ်တွင် တိုင်းရင်းသားလက်နက်ကိုင်တိုက်ပွဲကြား ထွက်ပြေးတိမ်းရှောင်နေစဉ် အရပ်သား (၂)ဦး လက်နက်ထိမှန် ဒဏ်ရာရရှိခဲ့ကြောင်း စုံစမ်းသိရသည်။
ယမန်နေ့ (သြဂုတ် ၂၆)ရက် ညနေ (၄)နာရီဝန်းကျင် တွင် ကျောက်မဲမြို့နယ် လွယ်ကုန်ကျေးရွာအနီး တိုင်းရင်းသားလက်နက်ကိုင်တပ်များဖြစ်သည့် RCSS/SSA နှင့် SSPP/SSA ၊ TNLA တို့ တိုက်ပွဲဖြစ်ပွားမှုကြောင့် ဒေသခံများ ထွက်ပြေးနေချိန် အရပ်သား (၂)ဦး လက်နက်ထိမှန်ခဲ့ကြောင်း သတင်းရရှိသည်။
“တစ်ယောက်က ရွာအစွန် စေတီနားကနေ စစ်ရှောင်ထွက်ပြေးဖို့လာရင်း မိုင်းနင်းမိပြီး ဒဏ်ရာရခဲ့တယ်၊ နောက်တစ်ယောက်က သူ့အိမ်ထဲမှာ စစ်ရှောင်ပြေးဖို့ အဝတ်တွေ ယူနေတဲ့အချိန်မှာ ထရံကို ကျည်ဖောက်ဝင်လာပြီး သူ့ပေါင်ကို လာထိတာ” ဟု စစ်ရှောင်အမျိုးသား တစ်ဦး က သျှမ်းသံတော်ဆင့်ကို ပြောသည်။
သေနတ်ကျည်ထိမှန်သည့်သူမှာ ဦးမောင်ဝင်း အသက် (၄၀)အရွယ်ခန့်ဖြစ်ပြီး ညာဖက်ပေါင်တွင် ဒဏ်ရာရရှိခဲ့ကြောင်း၊ နောက်တစ်ဦးမှာ အသက် (၅၀)အရွယ်ရှိ ဦးနာလိန် ဖြစ်ပြီး ခြေသလုံးတွင် မိုင်းစထိမှန် ဒဏ်ရာရရှိခဲ့ကြောင်း သိရသည်။
“ဒဏ်ရာတွေရထားတော့ လမ်းလည်းမလျှောက်နိုင်ဘူး၊ သွားကြိုရတယ်၊ ပန်စလော့ရွာနဲ့က လမ်းလျှောက်ရင် (၁)နာရီကျော်လောက်ကို ဝေးသေးတာ၊ သူတို့တွေ ဒီစစ်ရှောင်နေရာကို ရောက်လာတော့ မှောင်နေပြီ” ဟု စစ်ရှောင် အမျိုးသမီးတစ်ဦးက ဆိုသည်။
အဆိုပါ ဒဏ်ရာရသူထဲမှ ဦးမောင်ဝင်းသည် ညာဖက်ပေါင်တွင် နှစ်ဖက်ပေါက်သည့် ဒဏ်ရာရရှိထားသဖြင့် သြဂုတ် (၂၇)ရက် ယနေ့မနက်တွင် ကျောက်မဲမြို့ပေါ်သို့ ထပ်မံသယ်ယူခဲ့ကာ ဆေးကုသနေကြောင်း၊ ကျန်တစ်ဦးမှာ ပန်စလော့ စစ်ရှောင်စခန်းတွင်သာ ရှိနေကြောင်း သိရသည်။
ထို့အပြင် ရွာအတွင်း လက်နက်ကြီးကျရောက်မှုကြောင့် လူနေအိမ်ပျက်စီးမှုများလည်း ရှိကြောင်း စစ်ရှောင်များထံမှ ကြားသိရသည်။
“မနေ့က လက်နက်ကြီးသံ အကျယ်ကြီးပဲ ရွာဦးစေတီနားတွေမှာ ကျပြီး ပေါက်ကွဲတာရော၊ ရွာထဲ လူနေအိမ်နားမှာ ကျတာရော (၆)လုံးလောက်ရှိတယ်၊ နေအိမ် (၄)လုံးခန့်တော့ ပျက်စီးတာ တွေ့တယ်၊ အတိအကျတော့ မသိဘူး၊ နောက်ထပ်လည်း ထိခိုက်တာတွေ ရှိနိုင်သေးတယ်” ဟု စစ်ရှောင်ထွက်ပြေးလာသည့် လွယ်ကုန်ဒေသခံ အမျိုးသမီး တစ်ဦးက ပြောသည်။
ကျောက်မဲမြို့နယ် ပန်စလော့ စစ်ရှောင်စခန်းတွင် ယနေ့အထိ စစ်ရှောင်လူဦးရေ (၃၉၀)ဦး ရှိနေပြီး ကျန်းမာရေး မကောင်းသူ (၄)ဦး၊ ကိုယ်ဝန်သည် (၂)ဦးလည်း ပါဝင်ကြောင်း၊ ထို့အပြင် စားနပ်ရိက္ခာများ အရေးပေါ် လိုအပ်နေကြောင်း ဒေသခံများက ပြောသည်။
“စစ်ရှောင်တွေအတွက်က အစားအသောက်လည်း ခက်ခဲတယ်၊ တစ်ချို့ဆို ဘာမှကို မပါလာဘူး၊ အဝတ်တောင် အပိုမပါဘူး၊ ငိုယိုပြီးတော့ကို ပြေးလာကြတာ” ဟု ပန်စလော့ ကျေးရွာ ဒေသခံ တစ်ဦးက ပြောသည်။
သြဂုတ်လ (၁၁)ရက်နေ့မှစပြီး ကျောက်မဲမြို့နယ် ပန်ကွမ်၊ ပန်လင်၊ လွယ်ကုန်ကျေးရွာအနီးတွင် RCSS/SSA နှင့် SSPP/SSA၊ TNLA တို့အကြား တိုက်ပွဲ ပြန်လည်ပြင်းထန်လာခဲ့တာဖြစ်ကြောင်း၊ ထိုတိုက်ပွဲကြောင့် ထွက်ပြေးတိမ်းရှောင်နေရသည့် ဒေသခံ (၁၀၀၀)ကျော်ထိ ရှိနေပြီး စားနပ်ရိက္ခာများ လိုအပ်နေဆဲဖြစ်ကြောင်း စစ်ရှောင်ကူညီသူများထံမှ သိရသည်။
Leave a Comments