သျှမ်းပြည် တောင်ပိုင်းဟိုပုံးမြို့နယ် အထွေထွေအုပ်ချုပ်ရေး ရုံးဝန်ထမ်းများ ကိုဗစ် ၁၉ ကာကွယ်ဆေး ထိုးပြီး သော်လည်း ကိုရိုနာဗိုင်းရပ်ပိုး ကူးစက်ခံနေရကြောင်း ဒေသခံများ ပြောပြချက်အရသိရသည်။

ယခုလ သြဂုတ်လ ပထမပတ်မှ စတင်ကာ စစ်ကောင်စီ စီမံချက်အတိုင်း ထိုးရသည့် ကိုဗစ် – ၁၉ ကာကွယ်ဆေးများ ထိုးပြီးသည့် ဟိုပုံးမြို့နယ် ထွေအုပ်ရုံးမှ ဝန်ထမ်းအချို့နှင့် တပ်မတော် ကွန်ပြူတာ နှင့်နည်းပညာသင်တန်းကျောင်း မှ တပ်သား အချို့ ကိုဗစ် – ၁၉ ကူးစက်ခံနေရကြောင်း ဟိုပုံးမြို့နယ် အုပ်ချုပ်ရေးအသိုင်းအဝိုင်းပြောပြချက်အရသိရသည်။

“ပြီးခဲ့တဲ့ တစ်ပတ်ကနေ သတင်းတွေစကြားခဲ့တာ၊ ထွေအုပ်ရုံးက ဝန်ထမ်းတချို့မှာ ကိုဗစ် – ၁၉ ကူးစက် ခံရတယ် ဆိုပြီး အရင်ဆုံးကြားတယ်၊ အဲ့နောက် ရုံးကို ဝန်ထမ်းတွေ မလာခိုင်းတော့တာ တွေ့ရတယ်၊ ပြီးတော့ တပ်ထဲမှာလည်း ကိုဗစ် ပိုးတွေ့တဲ့ တပ်သားတွေ မနည်းဘူးလို့လည်း ကြားတယ်” ဟု ဟိုပုံးမြို့နေ အမည်မဖေါ်လိုသူ တစ်ဦးက သျှမ်းသံတော်ဆင့်ကို ပြောသည်။

တိုင်းပြည်အာဏာကို တပ်မတော်သိမ်းပိုက် သည့်နောက်ပိုင်း ဝန်ထမ်းအများအပြား  CDM လှုပ်ရှားမှု တွင်ပါဝင်ခဲ့ကြသော်လည်း ယခု ကိုဗစ် ၁၉ ကူးစက်ခံရသည့် ဟိုပုံးမြို့နယ် ထွေအုပ်ရုံးဝန်ထမ်းအများစုသည် CDM လှုပ်ရှားမှုတွင် မပါဝင်သည့်၀န်ထမ်းများဖြစ်ကြကြောင်းသိရသည်။

လက်ရှိတွင် ဟိုပုံးမြို့နယ် အထွေထွေ အုပ်ချုပ်ရေးမှူး ရုံးမှ ဝန်ထမ်းများ ရုံးမတက်ရန်ပြောဆိုထားကြ သော်လည်း ရုံးဝန်းအတွင်းနှင့် ကျေးရွာအတွင်း ငှက်ပျောပင်များစိုက်ခိုင်းနေကြောင်းလည်း ဝန်ထမ်းတစ်ဉီးက ပြောပြသည်။

“ရုံးကပိတ်တယ်ဆိုပေမဲ့ ထွေအုပ်ရုံးက ငှက်ပျောပင်တွေစိုက်ရတယ်၊ ရွာတွေသွားပြီးငှက်ပျောပင် လိုက်စိုက် နေရတယ်ဗျ၊ ရုံးတွေအပြင် ရပ်ကွက်တွင်းက ဒေသတွင်းကူးစက်မှုလည်းများနေပါတယ်၊ စအွန်ကျေးရွာ ဖက် အထိ စိုက်ဖို့ညွှန်ကြားထားတယ်” ဟု အဆိုပါ ဝန်ထမ်းပြောသည်။

စစ်ကောင်စီ ထိုးနှံပေးနေသည့် ကိုဗစ်ကာကွယ်ဆေးများသည် တရုတ်နိုင်ငံထုတ် Sinopharm နှင့် Sinovac ကာကွယ်ဆေးများဖြစ်ပြီး ကိုဗစ်ကြောင့် မြန်မာနိုင်ငံ အတွင်း သေဆုံးသူ တစ်သောင်းလေး ထောင်ကျော်ရှိပြီဖြစ်ကြောင်း ကျန်းမာရေးဝန်ကြီးဌာနက သတင်းထုတ်ပြန်ထားသည်။